ކާމިލް ދީދީ ސްކޫލަކީ ކުރިއަށް އޮތްތާނގައި ޕްރީ ސްކޫލަކަށް ވާނެ ތަނެއް: މުޖާހިދު
6 ސެޕްޓެމްބަރު 2022 | އަންގާރަ 17:14ކާމިލް ދީދީ ޕްރައިމަރީ ސްކޫލުގައި ކިޔަވާ ކުދިންނަށް ސަލާހުއްދީން ސްކޫލުން ޖާގަ ދޭނެ ކަމަށް ވިދާޅުވި
ރާއްޖެޓީވީގެ ޕްރޮގްރާމެއްގައި އެޑިކޭޝަންގެ ޑެޕިއުޓީ މިނިސްޓަރ މުޖާހިދު ވާހަކަދައްކަވަނީ
ހުޅުމާލެ ދެވަނަ ފިޔަވަހީގައި އާދީއްތަ ދުވަހު ހުޅުވި ކާމިލް ދީދީ ޕްރައިމަރީ ސްކޫލަކީ ކުރިއަށް އޮތްތާނގައި ޕްރީ ސްކޫލަކަށް ވާނެ ތަނެއް ކަމަށް އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ އަހުމަދު މުޖާހިދު ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީގައި ވާހަކަދައްކަވަމުން މުޖާހިދު ވިދާޅުވީ ކާމިލް ދީދީ ސްކޫލް ޕްރައިމަރީ ސްކޫލެއްގެ ގޮތުގައި ހުޅުވީ ދެވަނަ ފިޔަވަހީގައި ދިރިއުޅޭ ކުޑަކުދިންނަށް ފަސޭހަ ކޮށްދިނުމުގެ ގޮތުން ކަމަށެވެ. އެގޮތުން، ދެވަނަފިޔަވަހިން ފުރަތަމަ ފިޔަވައްސަށް އަދި މާލެއަށް ވެސް ދަތުރު ކުރާ ކުދިން ދެވަނަ ފިޔަވަހީގައި ދިރިއުޅޭ ކަމަށާއި ވަގުތީގޮތުން ހުޅުވި ސްކޫލާއެކު އެ ކުދިންނާއި ބެލެނިވެރިންނަށް ވަރަށް ބޮޑު ލުޔެއް ލިބިގެން ގޮސްފައިވާ ކަމަށް އޭނާ ވިދާޅުވިއެވެ.
މުޖާހިދު ވިދާޅުވީ ދެވަނަ ފިޔަވަހީގައި ޓަވަރުތައް އަޅަމުންދިޔައިރު ތައުލީމު ފޯރުކޮށްދޭނެ ތަންތަނާއި އެހެނިހެން ޚިދުމަތް ފޯރުކޮށްދޭނެ ތަންތަން އެޅުމުގެ މަސައްކަތް އެއްވެސް ވަރަކަށް ކޮށްފައި ނުވާ ކަމަށެވެ. އެހެންވެ، އެ ސަރަހައްދުގައި މީހުން ދިރިއުޅެން ފެށުމުން ވީހާވެސް އަވަހަށް ދަރިވަރުންނަށް ތައުލީމު ފޯރުކޮށްދޭނެ ތަނެއް ހެދުމުގެ މަސައްކަތް ކުރަން ޖެހުނު ކަމަށާއި ކާމިލް ދީދީ ސްކޫލް ޕްރައިމަރީ ސްކޫލެއްގެ ގޮތުގައި ވަގުތީގޮތުން ހުޅުވަން ޖެހުނީ މީގެ ސަބަބުން ކަން އޭނާ ފާހަގަ ކުރެއްވިއެވެ.
މީގެ އިތުރުން ކާމިލް ދީދީ ޕްރައިމަރީ ސްކޫލުގައި މިވަގުތު ތައުލީމު ހާސިލް ކުރާ ދަރިވަރުންނަށް ސަލާހުއްދީން ސްކޫލް ހުޅުވުމުން އެ ސްކޫލުން ފުރުސަތު ލިބޭނެ ކަމަށް ވެސް މުޖާހިދު ވިދާޅުވިއެވެ. އެގޮތުން، އަންނަ އަހަރުގެ ޖެނުއަރީ މަހު ހުޅުވަން ތައްޔާރުވަމުން އަންނަ އެ ސްކޫލުން 3000 އެއްހާ ދަރިވަރުންނަށް ފުރުސަތު ހުޅުވާލާނެ ކަމަށް އޭނާ ވިދާޅުވިއެވެ.
ކާމިލް ދީދީ ޕްރައިމަރީ ސްކޫލް ހުޅުވުމާއެކު ސޯޝަލް މީޑިއާގައި ބައެއް ފަރާތްތަކުން ވަނީ އެ ސްކޫލަށް ފާޑުކިޔައިފައެވެ. އެގޮތުން އެއީ 23 މިލިއަން ރުފިޔާ ޚަރަދުކޮށްގެން އަޅާ ސްކޫލެއްގެ ފެންވަރު ނޫންކަމަށް ބުނެ ފާޑުކިޔައިފައިވެއެވެ.
މި ވާހަކަތަކަށް ރައްދު ދެއްވަމުން މުޖާހިދު ވިދާޅުވީ 23 މިލިއަން ރުފިޔާއަކީ ހަމައެކަނި އެ ސްކޫލަށް ޚަރަދު ކުރި ފައިސާގެ އަދަދު ނޫން ކަމަށެވެ. އެއީ ކާމިލް ދީދީ ޕްރައިމަރީ ސްކޫލުގެ އިތުރުން ޖަމީލް ދީދީ ޕްރީ ސްކޫލަށް ކުރާ ޚަރަދު ކަމަށާއި ދެ ސްކޫލް ވެސް ތަރައްގީކޮށް ނިމޭނީ ޕްރީސްކޫލުގެ ގޮތުގައި ކަމަށް އޭނާ ވިދާޅުވިއެވެ.
މުޖާހިދު ވިދާޅުވީ ދެ ސްކޫލްގެ މަސައްކަތް ނިމޭއިރު ސްކޫލެއްގައި ހުންނަން ޖެހޭ ހުރިހާ ޚިދުމަތެއް ހުންނާނެ ކަމަށެވެ. އަދި މިފަދަ ވާހަކަތައް ދެއްކުމުގެ ސަބަބުން ކުދިންނަށް އޭގެ ނޭދެވޭ އަސަރު ކުރާނެ ކަމަށާއި އެފަދަ ވާހަކަތައް ދެއްކުމުގެ ކުރިން ވިސްނުމަށް އޭނާ ވަނީ އެދިފައެވެ.
އެޑިއުކޭޝަން މިނިސްޓްރީން އަންނަނީ ހުޅުމާލެ ދެވަނަ ފިޔަވަހީގައި ކާމިލް ދީދީ ޕްރައިމަރީ ސްކޫލާއި ޖަމީލް ދީދީ ޕްރީ ސްކޫލާއި ސަލާހުއްދީން ސްކޫލުގެ އިތުރުން ކޮންޓްރެކްޓަރ ފައިންނޭންސްގެ އުސޫލުން އިތުރު ސްކޫލެއްގެ މަސައްކަތް ވެސް ކުރަމުންނެވެ. މި ސްކޫލް އަންނަ އަހަރުގެ ދިރާސީ އައު އަހަރަށް ހުޅުވުމަށް ތައްޔާރުވަމުން އަންނަ ކަމަށް މުޖާހިދު ވިދާޅުވިއެވެ.
