ކޮންގޯގެ ބްރިޖެއް ހުޅުވުމުގެ ރަސްމިއްޔާތުގައި ބްރިޖު ވެއްޓިއްޖެ

ކޮންގޯގައި ހަދާފައިވާ ބްރިޖެއް ހުޅުވުމުގެ ރަސްމިއްޔާތު ކުރިއަށްދަނިކޮށް އެ ބްރިޖް ވެއްޓިއްޖެއެވެ.

ސޯޝަލް މީޑިއާގައި އާއްމުވެފައިވާ ވީޑިއޯއިން ފެންނަ ގޮތުގައި ބްރިޖް ވެއްޓެނީ ބްރިޖް ހުޅުވުމަށް ރިބަން ކަނޑާލާތަނުންނެވެ. ބްރިޖު ވެއްޓުނު ވަގުތު އެ ބްރިޖްމަތީގައި ރަސްމިއްޔާތުގެ ޝަރަފުވެރި މެހެމާނާއި އިތުރު ބައެއް ފަރާތްތައްވެސް ތިއްބެއެވެ.

މީޑިއާ ރިޕޯޓުތައް ބުނާގޮތުގައި މި ހާދިސާގައި އެއްވެސް މީހަކަށް ސީރިއަސް އަނިޔާއެއް ނުވެއެވެ. އަދި ވެއްޓުނު މީހުން ވަގުތުން ސަލާމަތްކޮށްފައިވާ ކަމަށްވެސް ވަނީ ރިޕޯޓްކޮށްފައެވެ.

ވީޑިއޯތަކުން ފެންނަގޮތުގައި އެ ބްރިޖަކީ ކުޑަ ބްރިޖެކެވެ.

މި ހާދިސާއާއެކު ސޯޝަލް މީޑިއާގައި ގިނަ ބަޔަކު ދަނީ ފާޑުކިޔަމުންނެވެ. އެގޮތުން، ބޮޑެތި ޚަރަދުކޮށްފައި ކޮލިޓީ ދަށްކޮށް ބްރިޖް އެޅުމަކީ ރައްޔިތުންގެ ފައިސާއިން ވައްކަންކުރުން ކަމަށް ގިނަ ބަޔަކު ވަނީ ބުނެފައެވެ.

ބައެއް ފަރާތްތަކުން ވަނީ ސޯޝަލް މީޑިއާގައި މި ވީޑިއޯ ހިއްސާކޮށް، ޖޯކުވެސް ޖަހާފައެވެ. ބްރިޖް އައްސާފައިހުރީ ރިބަނުންކަމަށް ބުނެ ބައެއްް ފަރާތްތަކުން ޖޯކު ޖަހާފައިވާއިރު، މިއީ އެފްރިކާގެ ފުރިހަމަ އިންޖިނިއަރިންގ ފެންނަ މަސައްކަތެއްކަމަށް ބުނެވެސް ބައެއް މީހުން ވަނީ ޖޯކު ޖަހާފައެވެ.