ކަރަންޓަކީ ދައުލަތުންދޭ ހިދުމަތެއް، ގްރޭޓަރ މާލެއެކޭ ރަށްރަށެކޭ ހަމަހަމަވާންޖެހޭނެ – މެންބަރު ޝިޔާން
ގެސްޓްހައުސްއެއް ހިންގާ ފަރާތްތަކަށް ކަރަންޓްބިލާއި ފެންބިލް ދައްކާފައި ދެން އިތުރަށް މުވައްޒަފުންގެ މުސާރަ ދޭނެ އެއްޗެއް ނޯވޭ
މާލެ އާއި ރަށްރަށުގެ ކަރަންޓުގެ އަގު އެއްހަމައެއްގައި ބެހެއްޓުމަށް ވަނީ ހުށަހަޅާފައި
ކަރަންޓަކީ ދައުލަތުންދޭ ހިދުމަތެއް ކަމަށާއި، އެހެންކަމުން އެ ހިދުމަތް ދޭއިރުގައި ގްރޭޓަރ މާލެއެކޭ ރަށްރަށެކޭ ހަމަހަމަވާންޖެހޭނެ ކަމަށް ތޮއްޑޫ ދާއިރާގެ މެންބަރު ހަސަން ޝިޔާން ވިދާޅުވެއްޖެއެވެ.
މެންބަރު ޝިޔާން މިހެން ވިދާޅުވީ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އާއި ފެނަކަ ކޯޕަރޭޝަން ލިމިޓެޑްއިން ކަރަންޓްގެ ޚިދުމަތް ފޯރުކޮށްދެމުން ގެންދާ ރަށްރަށާއި ގްރޭޓަރ މާލެ ސަރަޙައްދުގައި ވިޔަފާރިތަކަށް ބިލު ކުރަމުންގެންދާ ރޭޓާއި ބޭންޑް ކުރުންތަކުގައި ގެންގުޅޭ ތަފާތުކުރުންތައް ނައްތާލައި ބޭންޑާއި ރޭޓް ހަމަހަމަ ކުރުމަށް ގޮވާލައި އެކަން ސަރުކާރުގެ ސަމާލުކަމަށް ގެނައުމަށް ހުށަހަޅާ ޤަރާރު މަޖިލީހަށް އިއްވަމުންނެވެ.
މެންބަރު ޝިޔާން ވިދާޅުވީ މި ގަރާރު ހުށަހެޅުއްވުމުގެ ބޭނުމަކީ އެމްޑީޕީން ރިޔާސީ އިންތިހާބާއި، މަޖިލިސް އަދި ކައުންސިލް އިންތިހާބުގެ ކެމްޕެއިންތަކުގައި ރަށްރަށަށް ކުރި ދަތުރުތަކުގައި، ވިޔަފާރިވެރިން، ހާއްސަކޮށް ކުދި ވިޔަފާރިވެރިން ކުރާ ޝަކުވާތަކަށް ހައްލެއް ގެނެސްދެއްވުން ކަމަށެވެ.
ޝިޔާން ވިދާޅުވީ ފެނާއި ކަރަންޓުގެ ހިދުމަތް އެއްހަމައެއްގައި ގެނައުމަށްޓަކައި މުހިންމު ކަމެއްގެ ގޮތުގައި ދެކެވަޑައިގަންނަވާތީ ގަރާރު ހުށަހަޅުއްވާފައިވާ ކަމަށެވެ.
މެންބަރު ޝިޔާން ހުށަހަޅުއްވާފައިވާ ގަރާރުގައި ބުނެފައިވަނީ ސްޓެލްކޯ އިން ކަރަންޓުގެ ހިދުމަތް ފޯރުކޮށްދެމުންދާ އއ، އދ، ވ އަދި ކ އަތޮޅުގެ ރަށްތަކާއި އަދި ފެނަކަ ކޯޕަރޭޝަން އިން ހިދުމަތްދޭ ރަށްރަށުގައި ވިޔަފާރިތަކަށް ބިލްކުރުމުންގެންދާ ރޭޓްތައް ބޮޑުކަމަށެވެ. އަދި ގްރޭޓަރ މާލެ ސަރަހައްދާ ދެމެދު ބިލްކުރުމާ ބޭންޑް ކުރުމުގައި ހުރި ތަފާތުކުރުމުގެ ޝަކުވާތަކާއި ކަންބޮޑުވުންތައް އެ ސަރަހައްދުގައި ގެސްޓް ހައުސްތަކާއި، ޑައިވް ސެންޓަރުތަކާއި، ހޮޓޯ، ރެސްޓޯރެންޓް އަދި ލޯކަލް ފިހާރަތައް ހިންގަމުންދާ ކުދި ވިޔަފާރިވެރިން ކުރަމުންދާ ކަމަށެވެ.
އަދި އެފަރާތްތަކުގެ ވިޔަފާރި ހިންގުމަށްޓަކައި މުވައްޒަފުންނަށް މުސާރަދިނުމާއި، ޓެކްސް ދެއްކުމުގެ އިތުރުން ކަރަންޓުގެ އަގު ބޮޑުވުމުގެ ސަބަބުން ބިލްތައް ދެއްކުމަށްފަހު ފައިދާވާނެ މިންވަރަށް ފައިސާ ނުހުންނަ ކަމަށެވެ. މި ވިޔަފާރިތައް ހިނގަމުންގެންދަނީ ގެއްލުމުގައި ކަން ފާހަގަކޮށް، އެ ތަފާތުކުރުންތައް ނައްތާލާ ހަމަހަމަކުރުމަށް އެކި ފޯރަމްތަކުގައި ވަކާލާތުކޮށް، ކަންބޮޑުވުންތައް އަބަދު ފާޅުކުރަމުންދާ ކަމަށެވެ. އަދި ގްރޭޓަރ މާލެ ސަރަހައްދާއި މި ދެންނެވި އަތޮޅުތަކުގައި ވިޔަފާރިތަކަށް ކަނޑައަޅާފައިވާ ބޭންޑްތަކާއި ރޭޓްތައް މެންބަރު ވަނީ ގަރާރުގައި ހުށަހަޅާފައެވެ.
ސްޓެލްކޯއިން ދީފައިވާ ރޭޓްތަކަށް ބަލާއިރު މާލެ ސަރަހައްދުގައި 0-100 ޔުނިޓާ ހަމައަށް 3.30 ރުފިޔާ ނަގާއިރު ރަށްރަށުގައި ނަގަނީ 3.25 އެވެ. އަދި މާލެ ސަރަހައްދުގައި 101-300 ޔުނިޓާ ހަމައަށް 3.35 ރުފިޔާ ނަގާއިރު ރަށްރަށުގައި 101-200 ޔުނިޓާ ހަމައަށް ނަގަނީ 3.75 ރުފިޔާއެވެ. މާލެ ސަރަހައްދުގައި 301-500 ޔުނިޓާ ހަމައަށް މާލެ ސަރަހައްދުގައި ނަގަނީ 3.65 ރުފިޔާއެވެ. ނަމަވެސް ރަށްރަށުގައި 201-300 ޔުނިޓާ ހަމައަށް 4.75 ރުފިޔާ ނަގައެވެ. އަދި ރަށްރަށުގައި 300 ޔުނިޓަށްވުރެ މަތިން ރަށްރަށުގައި 6 ރުފިޔާ ނަގާއިރު، މާލެ ސަރަހައްދުގައި 501-600 ޔުނިޓަށް 4 ރުފިޔާ، 601-3000 ޔުނިޓަށް 4.35 ރުފިޔާ. 3001-10000 ޔުނިޓާ ހަމައަށް 5.75 ރުފިޔާ ނަގާއިރު 10000 ޔުނިޓާ ހަމައަށް މާލޭގައި ނަގަނީ 6.65 ރުފިޔާއެވެ.
މެންބަރު ހުށަހެޅުއްވި ގަރާރުގައި ވިދާޅުވެފައިވަނީ މި ތަފާތުކުރުން ނައްތާލުމަކީ މުހިންމު ކަމެއް ކަމަށްވާތީ، ގްރޭޓަރ މާލެއާއި އަތޮޅު ތެރެއިން ސްޓެލްކޯ އާއި ފެނަކައިން ހިދުމަތްދޭ ރަށްރަށުގައި ވިޔަފާރިތަކަށް ކަނޑައަޅާފައިވާ ބޭންޑުތަކާއި ރޭޓްތައް ހަމަހަމަ ކުރުމާއި، އިޔާދަކުރަނިވި ހަކަތަ ބޭނުންކުރުމުގައި ޔުޓިލިޓީ ރެގިއުލޭޓަރީ އޮތޯރިޓީން މިހާރު ހަދާފައިވާ ޔޫސޭޖް ކޯޓާ އެކީ ދުއްވާލާ ކަމަށެވެ.
އަދި ރަށްރަށުގެ ވިޔަފާރިތަކަށް ކަރަންޓު ބިލުން މާލެ އާއި ހަމަހަމަ ނުކުރެވޭނެ ނަމަ ޓެކްސްގެ ލުއި ފަސޭހަކަމެއް ދިނުމަކީ ކުދި ވިޔަފާރިވެރިންގެ އެއް ކަންބޮޑުވުންތަކަށް ހައްލެއް ލިބިގެންދާނެ ކަމަށެވެ. އަދި ސަރުކާރުގެ ގުޅުންހުރި ކުންފުނިތަކާއި އިދާރާތައް މަޖިލީހުގެ ކޮމިޓީއަށް ހާޒިރުކޮށް ރަށްރަށުގެ ވިޔަފާރިތަކަށް ލުއި ގޮތެއް ގެނެސްދީ އަވަށް ހައްލެއް ގެނެސްދިނުމަށް ގޮވާލައްވާ ކަމަށެވެ.
