އިންޓަނެޓަކީ އަސާސީ ހިދުމަތެއްގެ ގޮތުގައި ފޯރުކޮށްދިނުމަކީ ސަރުކާރުގެ އަމާޒެއް: މަލީޙް
17 މެއި 2019 | ހުކުރު 04:59އިންޓަރނެޓްގެ ޚިދްމަތުގެ އަގު ހެޔޮކުރުމުގެ މަސައްކަތް ކުރިޔަށްދާ ކަމަށް ވިދާޅުވި
މިނިސްޓަރ މަލީހް، ރައީސް އިބްރާހިމް މުހައްމަދު ސޯލިހާއެކު
އިންފޮމޭޝަން އެންޑް ކޮމިއުނިކޭޝަންސް ޓެކޮނޮލޮޖީ (އައިސީޓީ) ދާއިރާއިން ރާއްޖެއަށް އިތުރު ތަރައްގީ ގެނެސްދިނުމަށް ސަރުކާރުން މަސައްކަތަކެއް ފަށާފައިވާ ކަމަށާއި، އިންޓަނެޓަކީ އަސާސީ ޚިދުމަތެއްގެ ގޮތުގައި މުސްތަގްބަލުގައި ފޯރުކޮށްދިނުމަކީ ސަރުކާރުގެ އަމާޒެއް ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލް ވިދާޅުވެއްޖެއެވެ.
މިއަދު ފާހަގަ ކުރަމުންދާ ދުނިޔޭގެ ޓެލެކޮމިއުނިކޭޝަން އަދި އިންފޮމޭޝަން ސޮސައިޓީ ދުވަހުގެ މުނާސަބަތުގައި ދެއްވި ހިތާބުގައި މިނިސްޓަރު ވިދާޅުވީ، ރާއްޖޭގެ އައި.ސީ.ޓީ މާޙައުލަށް ބެލިޔަސް ރަނގަޅު މިންވަރަކަށް ޚިދުމަތާއި އިންފްރާސްޓަރަކްޗަރ ތަރައްގީ ކުރެވިފައިވާ ކަމަށެވެ.
މިއަދަކީ ދުނިޔޭގެ ޓެކޮނޮލޮޖީ ދުވަސް ރަސްމީ ސިފައެއްގައި ފާހަގަ ކުރަމުން އަންނަތާ 50 އަހަރު ފުރޭ ދުވަހެވެ. އެންމެ ފުރަތަމަ ޓެލެކޮމިއުނިކޭޝަން ދުވަހެއް ފާހަގަ ކޮށްފައިވަނީ 1969 ވަނަ ދުވަހުއެވެ. މި ފަހަރުގެ ޝިއާރަކީ ''ބްރިޖިންގް ދަ ސްޓޭންޑާޑިޒޭޝަން ގެޕް'' އެވެ.
މިނިސްޓަރު މަލީހްގެ ހިތާބުގައި ވިދާޅުވީ، ދުވަހުން ދުވަހަށް ފައިބަރ ނެޓްވާރކާ ގުޅާލެވޭ ރަށްތައް އިތުރުވެ، ރާއްޖޭގެ އާބާދީގެ ބޮޑު ބަޔަކަށް ފައިބަރ ނެޓްވާރކް މެދުވެރިކޮށް ބްރޯޑްބޭންޑް އިންޓަރނެޓް ޚިދްމަތް ލިބޭކަން އުފަލާއެކު ފާހަގަކުރައްވާ ކަމަށެވެ. އަދި ރާއްޖޭގެ އެކި ކަންކޮޅުތަކަށް 4ޖީ ހިދުމަތް ލިބެން ފަށާފައިވާއިރު، ދިރާގު އަދި އުރީދޫ އިން 5ޖީ ޓެކްނޮލޮޖީގެ ޚިދްމަތް ރާއްޖޭގެ ރައްޔިތުންނަށް ފޯރުކޮށް ދިނުމުގެ މަސައްކަތްތައް ކުރަމުންދާ ކަން މަލީހް ފާހަގަކުރެއްވިއެވެ.
އިންޓަރނެޓްގެ ޚިދްމަތުގެ އަގު ހެޔޮކޮށް، ރައްޔިތުންނަށް އިންޓަރނެޓް ގެ އެންމެ އެދެވޭ ފައިދާ ހޯދާދިނުމުގެ މަސައްކަތް ކުރަމުންދާ ކަމަށް މިނިސްޓަރު ތަކުރާރު ކުރެއްވިއެވެ. އަދި ވިދާޅުވީ، ތަޢުލީމީ މަންހަޖްގައި އައި.ސީ.ޓީ އަށް އިސްކަންދީ އެރޮގުން ދަރިވަރުން ބާރުވެރި ކުރުމައީ އިންސާނީ ވަސީލަތް ތަރައްގީކުރުމުގެ އިތުރު މަސައްކަތްތަކެއް ފަށާފައިވާ ކަމަށެވެ.
މަލީހް ވިދާޅުވީ، ޓެކްނޮލޮޖީގެ އިޖާދުތައް ބަލައި އޭގެ ލުއި ފަސޭހަކަން ރައްޔިތުންނަށް ފޯރުކޮށްދެމުންދާއިރު ސަރުކާރުންދޭ ހިދުމަތް ދެމުންދާ ގޮތްތަކަށްވެސް ބަދަލު އަންނަ ޖެހޭކަމަށެވެ. އެބަދަލުތަކަށް ގެނައުމަށްޓަކައި ސަރުކާރާއި އެ މިނިސްޓްރީން ވަކިކަންތައްތަކަކަށް އަމާޒު ހިފާއިވާ ކަމަށް ވިދާޅުވިއެވެ.
އެއީ، ޒަމާނީ ބަދަލާއެކު އީ-ގަވަމަންޓް ނިޒާމުގެ ތެރެއިން، އޮންލައިންކޮށް ފަސޭހަކަމާއިއެކު ބޭނުންވަގުތަކު، ބޭނުންތާކު ހުރެގެން، ކިއުގާ ނުޖެހި، ކަރުދާހަށް ބަރޯސާވުންކުޑަކޮށް، ދެފުށްފެންނަ އިންސާފުވެރި ނިޒާމެއްގެ ތެރެއިން ރައްޔިތުންނަށް ޚިދުމަތް ލިބޭނެ ގޮތް ހަދާދިނުން ކަމަށް ވިދާޅުވިއެވެ. އޭގެ ނަތިއްޖާއެއްގެ ގޮތުން ސަރުކާރުންދޭ ގިނަ ހިދުމަތްތަކެއް ލާމަރުކަޒީކޮށް ރާއްޖޭގެ އެކި ކަންކޮޅުތަކުގައި ދިރިއުޅޭ އެންމެހާ ރައްޔިތުންނަށް ވެސް ފަސޭހަކަމާއެކު ފޯރުކޮށްދެވޭނެ ކަމުގެ ޔަގީން ކަން މިނިސްޓަރު ވަނީ ދެއްވާފައެވެ.
އިންޓަނެޓްގެ ޒަރިއްޔާއިން މަކަރާއި ހީލަތް ހަދާ ފަރާތްތަކުގެ އަމަލުތަކަށް ހުރިހާ ރައްޔިތުންވެސް ރައްކާތެރިވެ ތިބުމައް ނަސޭހަތްތެރިވެ، ހިތާބު ނިންމަވާލަމުން މިނިސްޓަރު ވިދާޅުވީ، ޒާތީ މައުލޫމާތު ޔަގީންނުވާ ފަރާތްތަކަށް ފޯނުންވިޔަސް، އިންޓަނެޓުންވިޔަސް ހިއްސާ ނުކުރުމަށް އިލްތިމާސް ކުރައްވާފައެެވެ.
