މަންތާ އެއަރއިން ހއ. ހޯރަފުއްޓަށް ޗާޓަރޑް ޝެޑިއުލް ދަތުރުތަކެއް ފަށައިފި
ހޯރަފުއްޓަށް ދަތުރުތައް ފަށާފައިވަނީ ގިނަ މަޝްވަރާތަކަކަށްފަހު
މަންތާ އެއަރއިން ހއ. ހޯރަފުއްޓަށް ޗާޓަރޑް ޝެޑިއުލް ދަތުރުތައް ފެށުން
މަންތާ އެއަރއިން ހއ. ހޯރަފުއްޓަށް ޗާޓަރޑް ޝެޑިއުލް ދަތުރުތަކެއް ފަށައިފިއެވެ.
އެ ދަތުރުތައް ފަށާފައިވަނީ ހޯމަ ދުވަހުއެވެ. މަންތާ އެއަރއިން ހޯރަފުއްޓަށް ދަތުރުތައް ފަށާފައިވަނީ ޖޭއޭ މަނަފަރާއި، ރީޖަނަލް އެއަރޕޯޓްސް ކޮމްޕެނީ ލިމިޓެޑް (އާރްއޭސީއެލް) އަދި މަންތާ އެއާއިން ވެފައިވާ އެއްބަސްވުމެއްގެ ދަށުންނެވެ. މަންތާ އެއަރއިން ހޯރަފުއްޓަށް ދުވާލަކު ދެ ފްލައިޓް ދަތުރުކުރުމަށް ވަނީ ހަމަޖެހިފައެވެ.
މިކަމާގުޅޭގޮތުން މަންތާ އެއަރގެ ސީއީއޯ މުހައްމަދު ޚަލީލް "ރާއްޖެ އެމްވީ"އަށް ވިދާޅުވީ، މިވަގުތު މަންތާ އެއަރއިން ހޯރަފުއްޓަށް ދުވާލަކު ދެ ދަތުރު ކުރިނަމަވެސް، ޑިމާންޑް އޮންނަ ވަރަށް ބެލުމަށްފަހު އެ އަދަދަށް ބަދަލުގެންނަވާނެ ކަމަށެވެ. އަދި ހޯރަފުއްޓަށް އެ އެއަރލައިންގެ ދަތުރުތައް ފަށާފައިވަނީ ކަމާބެހޭ ފަރާތްތަކާއެކު މަހެއްހާދުވަސް ވަންދެން ކުރި މަޝްވަރާތަކަށް ފަހުގައި ކަމަށްވެސް އޭނާ ވިދާޅުވިއެވެ.
މަންތާ އެއަރއިން ވަނީ ހޯރަފުށީގައި އެ އެއާލައިންގެ ޚިދުމަތްތައް ވީ އެންމެ ފުރިހަމައަަށް ދިނުމަށް މަސައްކަތްކުރައްވާނެކަން ފާހަގަކޮށްފައިވެއެވެ. އަދި މިއީ ރާއްޖެއަށް އެ އެއަރލައިންގެ ޚިދުމަތް ފުޅާކުރުމަށް ކުރާ މަސައްކަތަށް ލިބުނު ރަނގަޅު ކުރިއެރުމެއް ކަމަށްވެސް އެ އެއަރލައިނުން ވަނީ ފާހަގަކޮށްފައެވެ.
