ކުށްކުރުން ގިނަވުމާއި ގާނޫނު ތަންފީޒު ނުކުރެވުމުގެ ސަބަބުން ރައްޔިތުންގެ މެދުގައި ބިރުވެރިކަން އިތުރުވާކަމަށް ބުނެ މައްސަލައެއް ހުށަހަޅައިފި
އައްޑޫ ސިޓީގައި މަސްތުވާތަކެތީގެ މައްސަލައާއި އެކަމާ ގުޅިގެން ހިންގާ މާރާމާރީއާއި ވައްކަން އިންތިހާއަށް އިތުރުވެފައިވާ ކަމަށް މައްސަލައިގައި ބުނެފައިވޭ
މަޑުއްވަރީ ދާއިރާގެ މެންބަރު އާދަމް ޝަރީފް އުމަރު
ރާއްޖޭގައި ކުށްކުރުން ގިނަވުމާއި، ގާނޫނުތައް ތަންފީޒު ނުކުރެވުމުގެ ސަބަބުން ރައްޔިތުންގެ މެދުގައި ބިރުވެރިކަން އިތުރުވަމުންދާތީ، ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
މަޖިލީހުގެ އެޖެންޑާގައި މި މައްސަލަ ތާވަލުކޮށްފައިވީނަމަވެސް، މައްސަލަ ހުށަހެޅުއްވި މަޑުއްވަރީ ދާއިރާގެ މެންބަރު އާދަމް ޝަރީފް އުމަރުގެ އެދިވަޑައިގަތުމުގެ މަތިން މި މައްސަލަ ވަނީ ފަހުން އެޖެންޑާއިން ނަގާފައެވެ. މިކަމާއި ގުޅޭގޮތުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ އެއީ އުސޫލާ ކަންކަން ތަންދޭކަމެއް ކަމުން މެންބަރު ޝަރީފް އެދިލައްވާފައިވާ ގޮތަށް މައްސަލަ ނުބާއްވާނެކަމަށެވެ.
މެންބަރު ޝަަރީފް ހުށަހެޅުއްވި މައްސަލައިގައި ބުނެފައިވަނީ ރާއްޖޭގައި ގޮތްނޭނގޭ މަރުތަކާއި މަސްތުވާތަކެތީގެ ވިޔަފާރިއާއި އެކަމާގުޅިގެން ހިންގާ މާރާމާރީ އިތުރުވުމާއި ޖިންސީ ގޯނާ ކުުރުމާއި، އެކަމާގުޅިގެން އުފެދޭ މައްސަލަތައް ވަރަށްބޮޑަށް އިތުރުވެފައިވާ ކަމަށެވެ.
އަދި މީހުން މެރުމާއި މަސްތުވާތަކެއްޗާއި ވައްކަމާއި މާރާމާރީއާ ގުޅިގެން މުޖްތަމައުގެ ތެރޭގައި ބިރުވެރިކަން އުފެދި، ކުށްކުރާ މީހުން މުޖްތަމައުގެ ތެރޭގައި މިނިވަންކަމާއެކު އުޅެމުންދާއިރު ފިޔަވަޅު ނޭޅުމުގެ ސަބަބުން ބައެއް ސިޓީތަކާއި ރަށްރަށް ހަލާކުގެތެރެއަށް ވެއްޓިގެންދާ ކަމަށެވެ. ހާއްސަކޮށް އައްޑޫ ސިޓީގައި މަސްތުވާތަކެތީގެ މައްސަލައާއި އެކަމާ ގުޅިގެން ހިންގާ މާރާމާރީއާއި ވައްކަން އިންތިހާއަށް އިތުރުވެ، ރައްޔިތުން ގޮތްހުސްވެ، ކަންބޮޑުވެފައިވާ އިރު ވެސް އެކަށޭނެ ހައްލެއް ހޯދައިދެވިފައި ނުވާކަމަށެވެ.
މީގެ އިތުރުން ކުށްކުރާ ބައެއް މީހުންނަށް އަދަބު ނުދިނުމާއި، އެފަދަ މީހުންގެ މައްޗަށް ގާނޫނު ނުހިންގުމާއި ރައްޔިތުންގެ އާންމު މަސްލަހަތާ ގުޅުން ހުންނަ ކަންކަމުގައި ވަގުތުން އަޅަންޖެހޭ ފިޔަވަޅުތައް ނޭޅުމުގެ ސަބަބުން ރައްޔިތުންގެ ކެތްތެރިކަން ކޮޅުންލައި، ކުށްކުރާ ފަރާތްތަަށް އާންމު ފަރާތްތަކުން އަނިޔާކޮށް، ގަންހިންގުންފަދަ ކަންކަން މުޖްތަމައުގައި އާންމުވަމުންދާއިރު، ސަރުކާރުން އެކަށީގެންވާ ފިޔަވަޅުތައް ނޭޅުމުގެ ސަބަބުން މުޖްތަމައުގައި ބިރުވެރިކަން އިތުރުވަމުންދާ ކަމަށެވެ.
އަދި މުޖްތަމައުގައި ކުށްކުރުން މަދުކުރުމަށާއި، ކުށްކުރުން ހުއްޓުވުމަށާއި ކުށްކުރާ ފަރާތްތަކަށް ފިޔަވަޅު އެޅުމަށާއި، އެފަދަ ކަންކަން ރިޕޯޓްކުރެވުމުން އަވަހަށް އެކަމަށް ފިޔަވަޅުއަޅައި، ރައްޔިތުންނާއި މުޖްތަމައުގެ އަމާންކަމާއި ރައްކާތެރިކަން ކަށަވަރުކުރުމަށްޓަކައި ގާނޫނުތައް ތަންފީޒުކުރުން ހަރުދަނާކުރުމަށް ސަރުކާރުން ގޮވާލައި ރައްޔިތުންގެ މަޖިލީހުގެ ގަވާއިދުގެ 179 ވަނަ މާއްދާގެ ދަށުން މި މައްސަލަ ހުށަހަޅާކަމަށް މެންބަރު ހުށަހެޅުއްވި މައްސަލައިގައި ބުނެފައިވެއެވެ.
