ޤާނޫނުގައި އޮތް ގޮތަށް ހެކި ނުލިބިއްޖެނަމަ، ކުށެއް ކުރިޔަސް ނިޒާމުގެ ތެރެއިން ފިޔަވަޅެއް ނޭޅޭނެ: ޕީޖީ ޝަމީމް
4 ސެޕްޓެމްބަރު 2022 | އާދީއްތަ 08:31އަދަބެއް ދެވޭނީ، ޤާނޫނީ ނިޒާމުގެ ތެރެއިން ބަލަންޖެހޭ ކަންކަން ބެލިގެން
ޕީޖީ ޝަމީމް- ޝަމީމް ވިދާޅުވީ، އެމީހަކަށް އިންޞާފުކަމަށް ޤަބޫލުކުރެވޭ ކަމެއް، އަމިއްލަ އަތުން ތަންފީޒުކުރުމަކީ ނުރައްކާތެރި ކަމެއްކަމަށް | ރާއްޖެއެމްވީ
އެމީހަކަށް އިންޞާފުކަމަށް ޤަބޫލުކުރެވޭ ކަމެއް، އަމިއްލަ އަތުން ތަންފީޒުކުރުމަކީ ނުރައްކާތެރި ކަމެއްކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވީ، " އިސްލާމީ ޝަރީޢަތުގައި، މަގުމަތިން ޤާނޫނު ތަންފީޒުކުރުން ހުއްދައެއް ނޫން" މި ސުރުޙީގެ ދަށުން އޭނާގެ ބްލޮގްގައި ޝާއިއު ކުރައްވާފައިވާ ލިއުމެއްގައެވެ. އެގޮތުން ޝަމީމް ވިދާޅުވީ، އެމީހަކަށް އިންޞާފުކަމަށް ޤަބޫލުކުރެވޭ ކަމެއް، އަމިއްލަ އަތުން ތަންފީޒުކުރުމަކީ ނުރައްކާތެރި، ޤާނޫނީ ގޮތުންނާއި ދީނީ ގޮތުން ބޮޑުވެގެންވާ މަނާކަމެއް ކަމަށެވެ.
ޝަމީމް ވިދާޅުވީ، އެޤާނޫނަކީ އިސްލާމްދީނާ ޚިލާފު ޤާނޫނެއްކަމަށް ކޯޓަކުން ކަނޑަނާޅާހާ ހިނދަކު، ރައްޔިތުންނަށް އޮތީ ޤާނޫނުގައިވާ ގޮތުގެ މަތިން އުޅުން ކަމަށެވެ.
ޝަމީމް ވަނީ އިޖުރާއަތު ފުރިހަމަ ނުވެގެން ކުށް ކުރާ މީހުންނަށް އަދަބު ނުދެވުމުގެ ބައެއް މިސާލުތައް އިސްލާމީ ތާރީޚުން ކިޔާ ދެއްވާފައެވެ.
މީހަކާމެދު ކުރާ ނަފްރަތަކީ، ޤާނޫނުތަކުގައި ކަނޑައަޅާފައިވާ ހަމަތަކުން ބޭރުން މީހުންނާމެދު ޢަމަލުކުރުން ދީނީ ގޮތުންވެސް، ޤާނޫނީ ގޮތުންވެސް ހުއްދަކުރާ ކަމެއް ނޫންކަމަށް ޝަމީމް ވިދާޅުވިއެވެ. އެގޮތުން އެކަން އެގޮތަށް ހަމަޖެހިފައިވަނީވެސް އެތައް މަޞްލަޙަތެއް ޙިމާޔަތް ކުރުމަށްކަން ޝަމީމް ފާހަގަ ކުރެއްވިއެވެ.
ޝަމީމް ވިދާޅުވީ، ވަކި ކަމެއް ހިނގީ ވަކި ގޮތަކަށްކަން އެނގުނަސްވެސް، އެކަމަކަށް އަދަބެއް ދެވޭނީ، ޤާނޫނީ ނިޒާމުގެ ތެރެއިން ބަލަންޖެހޭ ކަންކަން ބެލިގެން ކަމަށެވެ. އެގޮތުން ކުށްކުރާ މީހުންނާމެދު ޢަމަލުކުރާނެ ގޮތް އޮތީ ޤާނޫނުގައި ލިޔެވިފައިކަން ޝަމީމް ފާހަގަ ކުރެއްވިއެވެ.
ޝަމީމް ވިދާޅުވީ، ހައްޔަރުކުރާނެ ގޮތާއި، ޙާލަތާއި، ހައްޔަރުގައި ބަހައްޓާނެ ގޮތާއި، ޙާލަތާއި، ހެކި ހޯދާނެ ގޮތާއި، ހެކި ހުށަހަޅާނެ ގޮތާއި، ހެކި ވަޒަންކުރާނެ ގޮތާއި، އެކަމާގުޅޭ ހުރިހާ ވާހަކައެއް ޤާނޫނުގައި ބަޔާންވެގެންވާ ކަމަށެވެ.
އެގޮތުން ބަލާއިރު، ޤާނޫނުގައި އޮތް ގޮތަށް ހެކި ނުލިބިއްޖެނަމަ، މީހަކު އަދި ކުށެއް ކުރިއަސްވެސް، ނިޒާމުގެ ތެރެއިން ފިޔަވަޅެއް ނޭޅޭނެކަމަށް ޝަމީމް ވިދާޅުވިއެވެ.
ޝަމީމް ވިދާޅުވާ ގޮތުގައި އެ ކަންކަން އެގޮތަށް އޮންނަނީވެސް، އެންމެންގެ ސަލާމަތާއި ރައްކާތެރިކަމަށްޓަކައެވެ.
އޭގެ އިތުރުން، މި ނިޒާމު ރަނގަޅު ނޫންނަމަ، ރައްޔިތުންގެ މަޖިލީހުން ޤާނޫނަށް ބަދަލު ގެނެވިދާނެކަން ފާހަގަ ކުރައްވައި ޝަމީމް ވިދާޅުވީ، މަގުމަތިން މި މައްސަލަ ޙައްލުކުރުމަކީ ހުއްދަކުރެވިގެންވާނެ ކަމެއް ނޫން ކަމަށެވެ. އެއީ، އެކަމުގެ ނުރައްކާތެރިކަން ބޮޑުކަމުން ކަމަށްވެސް ޝަމީމް ވިދާޅުވިއެވެ.
މަގުމަތިން ޤާނުނު ހިންގުމާއި، ކުށްކުރާ މީހުންނަށް އަނިޔާކޮށް ބަދަލު ހިފުމުގެ އިތުރުން، ކުށުގެ ތުހުމަތު ކުރެވޭ މީހުން ގަން ހިންގުވުމާއި އެކި ގޮތްގޮތުން ފުރައްސާރައާއި އަނިޔާ ކުރުމުގެ މައްސަލަތައް މިފަހުން ވަނީ އިތުރުވެފައެވެ.
