ޕާކިސްތާނުން ބައިނަލްއަގުވާމީ އިތުރު އެހީއަށް އެދިއްޖެއެވެ.

ޕާކިސްތާނުގެ ކަމާއިބެހޭ އިދާރާތަކާއި ހަވާލާދީ ބައިނަލްއަގުވާމީ މީޑިއާގައި ބުނެފައިވަނީ، ފެންބޮޑުވެފައިވާ ސަރަހައްދުތަކުގައި އިތުރު 57 މީހުން މަރުވެފައިވާ އިރު، އެގައުމުން އެދިފައިވަނީ އިންސާނީ އެހީތެރިކަމަށެވެ. މިހާތަނަށް އައި އިރު އެގައުމުގައި 1265 މީހުން ވަނީ މަރުވެފައެވެ.

ފެޑެރަލް ޕްލޭނިންގ މިނިސްޓަރު އަހުސަން އިގްބާލް ވަނީ 33 މިލިއަން މީހުންނަށް އިންސާނީ އެހީތެރިކަން ބޭނުންވާ ކަމަށް ވިދާޅުވެފައެވެ. ޕަކިސްތާނުގައި ފެންބޮޑުވެ އެތައް މިލިއަން މީހުންނެއް ހާލުގައި ޖެހިފައިވާ އިރު، މިހާރު ވެސް ބައިނަލްއަގުވާމީ ދުނިޔެއިން އަންނަނީ އެގައުމަށް އެހީތެރިކަން ފޯރުކޮށްދެމުންނެވެ.

ޕާކިސްތާނުގެ ސަރުކާރުން ބުނެފައިވަނީ ފެންބޮޑުވުމުގެ ސަބަބުން ލިބުނު ގެއްލުން 10 ބިލިއަން ޑޮލަރަށް އަރާ ކަމަށެވެ.

ޕާކިސްތާނުގައި ފެންބޮޑުވެ ކުރިމަތިލަމުން އަންނަ ކާރިސާގެ މައިގަނޑު ސަބަބަކީ މޫސުމީ ވިއްސާރައާއި މޫސުމީ ބަދަލުތަކެވެ. ނިމިގެންދިޔަ ހަފްތާގައި އދ ގެ ސެކްރެޓަރީ ޖެނެރަލް އެންޓޯނިއޯ ގުޓެރޭސް ވެސް ވަނީ މަޑުނިންޖެއްގައި ނުތިބެ ހޭލައިގެން ޕާކިސްތާނަށް ދިމާވެފައިމިވާ މި ނުރައްކާތެރި ކާރިސާއިން އަރައިގަތުމުގައި އެހީތެރިކަން ފޯރުކޮށްދިނުމަށް ދުނިޔެއަށް ގޮވާލާފައެވެ.

މި މަހުގެ 9 ވަނަ ދުވަހު ގުޓަރޭސް ޕާކިސްތާނަށް ވަޑައިގަތުމަށް ހަމަޖެހިފައިވާ އިރު، މި ދަތުރުގައި ފެންބޮޑުވެ ގެއްލުން ލިބުނު ސަރަހައްދުތަކަށް ވަޑައިގެން ސަރުކާރުގެ އިސް ފަރާތްތަކާއި ބައްދަލުކުރުމަށް ވަނީ ހަމަޖެހިފައެވެ.

ނިމިގެންދިޔަ ހަފާތްގައި އދ އާއި ޕާކިސްތާން ގުޅިގެން ވަނީ ހާލުގައި ޖެހިފައި ތިބި މީހުންނަށް އެހީތެރިކަން ފޯރުކޮށްދިނުމަށް 160 މިލިއަން ޑޮލަރު ބޭނުންވާ ކަމަށް ބުނެ އެހީތެރިކަން ފޯރުކޮށްދިނުމަށް ގޮވާލާފައެވެ. ޕާކިސްތާނުގައި ފެންބޮޑުވުމުގެ ސަބަބުން މިލިއަނެއްހާ ގެއަށް ވަނީ ގެއްލުންވެފައެވެ.

ޕާކިސްތާންގެ ނެޝަނަލް ޑިޒާސްޓަރ މެނޭޖްމަންޓް އޮތޯރިޓީގެ އެންމެ ފަހުގެ ތަފާސް ހިސާބުތައް ދައްކާގޮތުން، ހޮނިހިރު ދުވަހު އިތުރު 57 މީހުން މަރުވެގެން ވަނީ ރިޕޯޓްކޮށްފައެވެ. އަދި މިއާއެކު މިހާތަނަށް 1265 މީހުން މަރުވެފައިވާ އިރު، 441 ކުޑަކުދިން މީގެ ތެރޭގައި ހިމެނެއެވެ.