ޔޫނިއަން ބާލިންއާ އެއްވަރުވެ ބަޔާން ތިންވަނަ އަށް

ޖަރުމަނު ލީގުގައި ޔޫނިއަން ބާލިންއާ ދެކޮޅަށް ކުޅުނު މެޗުން އެއްވަރުގެ ޗެމްޕިއަން ބަޔާން މިއުނިކް ތާވަލްގެ ތިންވަނަ މަގާމަށް ވެއްޓިއްޖެއެވެ.

ބާލިންގެ ދަނޑުގައި ކުޅުނު މެޗު ނިމުނީ 1-1 އިން އެއްވަރުވެގެންނެވެ. މިއީ މި ފަހަރުގެ ސީޒަންގައި ބަޔާން އެއްވަރުވި ދެ ވަނަ މެޗެވެ. މީގެ ކުރިން ބަޔާނުން ވަނީ މުންޗެންގްލަޑްބެކް ކައިރިން ވެސް އެއްވަރުވެފައެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ބާލިން އިންނެވެ. މެޗުގެ 12 ވަނަ މިނެޓުގައި އެ ޓީމަށް ލީޑު ނަގައިދިނީ ޝެރާލްޑޯ ބެކާއެވެ. އެ ލަނޑަށްފަހު ބަޔާނުން ވަނީ ތިން މިނެޓުގެ ތެރޭގައި ނަތީޖާ ހަމަހަމަކޮށްފައެވެ. ބަޔާނަށް ނަތީޖާ ހަމަހަމަކޮށްދިން ލަނޑު ޖަހައިދިނީ ޖޯޝުއާ ކިމިޗްއެވެ.

މެޗުން ލިބުނު އެއް ޕޮއިންޓާއެކު ބަޔާން އޮތީ 11 ޕޮއިންޓާއެކު ތާވަލްގެ ތިން ވަނަ މަގާމުގައެވެ. އެއް ވަނަ މަގާމުގައި އޮތް ފްރެއިބާގަށް 12 ޕޮއިންޓު ލިބޭއިރު، ދެ ވަނަ މަގާމުގައި އޮތް ބޮރޫޝިއާ ޑޯޓްމަންޑަށް ވެސް ލިބެނީ 12 ޕޮއިންޓެވެ.