އިންޑިޔާ އައުޓް ހުއްޓުވަން ރައީސް ނެރުއްވި ގަރާރު ގާނޫނާ ޚިލާފު، އިންޑިޔާ އައުޓް ހަރަކާތް ކުރިއަށްނުގެންދަނީ ގަރާރުގެ ސަބަބުން: ޔާމީން

ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން ކުރިއަށްގެންދެވި "އިންޑިޔާ އައުޓް" ހަރަކާތް ނުހުއްޓޭކަމަށާއި، ކުރިން ހިންގިގޮތަށް އެހަރަކާތް ހިންގަން ބޭނުންފުޅުނުވަނީ ހަރަކާތާ ގުޅޭގޮތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނެރުއްވާފައިވާ ގަރާރުގެ ސަބަބުންކަމަށް އެމަނިކުފާނު ވިދާޅުވެއްޖެއެވެ.

"ސަންގު ޓީވީ"އަށް ދެއްވި ޚާއްސަ އިންޓަރވިއުއެއްގައި، އިންޑިޔާ އައުޓް ހަރަކާތް ރައީސްގެ ގަރާރާއެކު ހުއްޓިގެންދިޔަކަން ފާހަގަވާކަމަށާއި ކުއްލިއަކަށް އެހަރަކާތް ހުއްޓުނީ ކީއްވެތޯ ދެންނެވި ސުވާލަށް ޖަވާބުދެއްވަމުން ޔާމީން ވިދާޅުވީ، ހަރަކާތް ހުއްޓިފައިވަނީ ރައީސުލްޖުމްހޫރިއްޔާ ނެރުއްވި ގަރާރާ ގުޅިގެންކަމަށެވެ. އެގަރާރު ރައީސުލްޖުމްހޫރިއްޔާ ނެރުއްވާފައިވަނީ ގާނޫނާ ޚިލާފަށްކަމަށް ޔާމީން ވިދާޅުވިއެވެ.

ނަމަވެސް ގާނޫނާ ޚިލާފަށް ރައީސް ގަރާރެއް ނެރުއްވިނަމަވެސް ފުލުހުން އެގަރާރު ތަންފީޒުކުރަމުންދާނެކަމަށް ޔާމީން ވިދާޅުވިއެވެ. ޔާމީން އިސްވެ ހުންނަވައި، މިހަރަކާތަށް ރަށްރަށަށް ވަޑައިގަންނަވާއިރު ގަރާރުގެ ސަބަބުން ހަމަނުޖެހުމަކަށް ދަނީ ކަމަށް ޔާމީން ވިދާޅުވިއެވެ.

ޔާމީން ތަކުރާރުކޮށް ވިދާޅުވީ، ރައީސުލްޖުމްހޫރިއްޔާއަށް މިފަދަ ގަރާރެއް ނުނެރުއްވޭނެކަމަށެވެ. އަދި ގަރާރުގެ މައްސަލަ ކޯޓުގައި ދާކަން ފާހަގަކުރައްވައި ޔާމީން ވިދާޅުވީ އެމައްސަލަ ދަނީ ވަރަށް ލަސްކޮށްކަމަށެވެ.

ގަރާރު އޮތްހާހިނދަކު އިންޑިޔާ އައުޓް ހަރަކާތް ކުރިޔަށްނުދާނެތޯ ދެންނެވުނު ސުވާލަށް ޖަވާބު ދެއްވަމުން ޔާމީން ވިދާޅުވީ، އެ ހަރަކާތް ކުރިޔަށްދާނެކަމަށެވެ. ނަމަވެސް މިގަރާރު ނެރެފައި އޮތުމުގެ ސަބަބުން އެމަނިކުފާނު ރަށްރަށަށް ދަތުރުކުރެއްވުމުގެ ކަންކަމުގައި އުޅުއްވަން ބޭނުންފުޅުނުވަނީ ކަމަށެވެ. އެއީ ގާނޫނާ އެއްގޮތަށް މަސައްކަތްކުރާ މީހަކަށް އެމަނިކުފާނު ވާތީ ކަމަށްވެސް ވިދާޅުވިއެވެ.

ޔާމީން ވިދާޅުވީ އިންޑިޔާ އައުޓް ހަރަކާތް ހުއްޓިފައި އޮތީ ކޮންމެހެން ހުއްޓާލަންވެގެން ނުވަތަ އެކަމުން ރައްޔިތުންނަށް ގެއްލުން ލިބޭކަމަށް ގަބޫލުކުރައްވާތީ ނޫންކަމަށެވެ. ނަމަވެސް ގަރާރު އޮތުމުން ހަމަނުޖެހުމަކަށް ނުދާންވެގެންކަމަށެވެ.