ބާސެލޯނާއަށް ބަދަލުވާން ނޫޅޭކަމަށް ސިލްވާ ބުނެފި

މެންޗެސްޓަރ ސިޓީ ދޫކޮށް ސްޕެއިންގެ ބާސެލޯނާއަށް ބަދަލުވާން ބޭނުންނުވާކަމަށް ބެނާޑޯ ސިލްވާ ބުނެފިއެވެ.

ސިޓީގައި މުހިންމު ދައުރެއް އަދާކުރަމުން އަންނަ އެޓޭކިން މިޑްފީލްޑަރު މިހެން ބުނީ ބާސެލޯނާއިން އޭނާ ހޯދަން މަސައްކަތް ކުރާ ކަމަށް މީޑިއާތަކުގައި ރިޕޯޓުކޮށްފައި ވަނިކޮށެވެ. އެކަމާ ގުޅިގެން އޭރު ސިޓީގެ ކޯޗު ޕެޕް ގާޑިއޯލާ ބުނީ ސިލްވާ ޓީމު ދޫކޮށްދިޔުމަކީ އޭނާ ބޭނުންވާ ކަމެއް ނޫން ކަމަށެވެ. ނަމަވެސް ޓީމުގައި ހުންނަން ކުޅުންތެރިޔަކު ބޭނުންނުވާ ނަމަ، އެ ކުޅުންތެރިޔަކު ބަހައްޓަން ބޭނުންނުވާ ކަމަށް ވެސް އޭނާ ބުންޏެވެ.

އެކަމާ ގުޅޭ ގޮތުން ސިލްވާ ބުނީ އޭނާ ސިޓީ ދޫކޮށްލަން ނޫޅޭ ކަމަށެވެ. އޭނާ ބުނީ މިހާތަނަށް އެއްވެސް ކުލަބަކުން އޭނާ އަށް ހުށަހެޅުމެއް ލިބިފައި ނުވާ ކަމަށެވެ. އެހެންކަމުން އޭނާގެ މުސްތަގުބަލު އޮތީ ސިޓީގައި ކަމަށް ވެސް ސިލްވާ ބުންޏެވެ. މީގެ އިތުރުން ސިލްވާ ބުނީ ސިޓީގައި އޭނާ ހުންނަނީ ހިތްހަަމަޖެހިގެން ކަމަށާއި، ނިންމުމާމެދު އުފާ ކުރާ ކަމަށެވެ.

މޮނާކޯއިން 2017 ވަނަ އަހަރު ސިޓީއަށް ބަދަލުވެ ސިލްވާ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. ސިލްވާ ވަނީ މިހާތަނަށް ސިޓީއަށް 256 މެޗު ކުޅެދީ 50 ލަނޑު ޖަހައިދީފައެވެ. އަދި އޭނާ ވަނީ އެ ޓީމާއެކު 11 ތައްޓެއް ކާމިޔާބުކޮށްފައެވެ.