"ޓެކަރސް މައިލޯ ޗެމްޕިއަންޝިޕް ރިސޯޓް ކަޕް" ފަށަން ތައްޔާރުވެއްޖެ

ޓެކަރސްއިން ކުރިއަށްގެންދިއުމަށް ހަމަޖެހިފައިވާ "ޓެކަރސް މައިލޯ ޗެމްޕިއަންޝިޕް ރިސޯޓް ކަޕް 2022" ފެށުމަށް ތައްޔާރުވެއްޖެއެވެ.

މިއީ ޓެކަރސްއިން މުޅިން އަލަށް ތައާރަފުކުރާ މުބާރާތެކެވެ. މުބާރާތް ފެށުމަށް ތާވަލުކޮށްފައިވަނީ ސެޕްޓެމްބަރު މަހުގެ 19 ވަނަ ދުވަހުއެވެ. ރިސޯޓުތަކަށް އަމާޒުކޮށްގެން ޓެކަރސްގެ ޗެމްޕިއަންޝިޕެއް ބާއްވަން ތައްޔާރުވަމުން އަންނައިރު، ޓެކަރސްއިން ވަނީ މިއަހަރުގެ ތެރޭގައި ރާއްޖޭގެ ހުރިހާ ރަށަކަށް ހުޅުވާލައިގެން "ޓެކަރސް މައިލޯ މޯލްޑިވްސް ކަޕް"ވެސް ބާއްވާފައެވެ.

ރިސޯޓުތަކަށް އަމާޒުކޮށްގެން ބާއްވާ މި ފުޓްސަލް މުބާރާތުގައި 50ށްވުރެ ޓީމު ބައިވެރިވާނެކަމަށް، ޓެކަރސްއިން މައުލޫމާތުދެއެވެ. މުބާރާތުގައި ބައިވެރިވަނީ ކ، އއ، އދ، ބ، ޅ، ނ އަދި ރ އަތޮޅުގެ ރިސޯޓުތަކުންނެވެ.

600ށްވުރެ ގިނަ ކުޅުންތެރިން ބައިވެރިވާ މި މުބާރާތުގެ ޗެމްޕިއަން ޓީމަށް 5،000 ޔޫއެސް ޑޮލަރު ދިނުމަށް ވަނީ ނިންމާފައެވެ. އަދި ރަނަރަޕް ޓީމަށް 2،500 ޔޫއެސް ޑޮލަރުގެ ފައިސާގެ އިނާމު ހުށަހަޅާފައިވެއެވެ. މީގެ އިތުރުން ކޮންމެ ޒޯނެއް، އަދި އަތޮޅެއްގެ ޗެމްޕިއަން ޓީމާއި، އެންމެ މޮޅު ފަސް ކުޅުންތެރިން، އަދި އެންމެ މޮޅު މެނޭޖަރުގެ އިތުރުން އެންމެ އުންމީދީ ކުޅުންތެރިޔާއަށް މެޑަލްއާއި ޓްރޮފީ ދިނުމަށް ވަނީ ނިންމާފައެވެ.