މީޚާއިލް ސެރްގެއިވިޗް ގޮރްބަޗޯވް އަކީ ސޯވިއެޓް ޔޫނިއަންގެ އެންމެ ފަހު ލީޑަރެވެ. އުމުރުފުޅުން 91 އަހަރުގައި އަވަހާރަ ވެފައިވާއިރު، އެމަނިކުފާނަކީ ލޭއޮހޮރުވުމަކަށް ނުގޮސް ފިނި ހަނގުރާމަ ނިމުމަކަށް ގެންނެވި އެހެންނަމަވެސް ސޯވިއެޓް ޔޫނިއަން ނިމުމަކަށް އައުން ނުހުއްޓުވުނު ލީޑަރެވެ.

ދެ ވަނަ ބޮޑު ހަނގުރާމައަށްފަހު ޔޫރަޕަށް އައިސްފައިވާ ބައިބައިވުން ނިމުމަކަށް ގެނައިސް ދެ ޖަރުމަނު ގުޅާލުމުގައި ގައި ބޮޑު ދައުރެއް އަދާކުރެއްވި ގޮރްބަޗޯވް ވަނީ އެމެރިކާ އާއެކު ހަތިޔާރު މަދުކުރުމުގެ އެއްބަސްވުމަކަށް ވަޑައިގަންނަވާފައެވެ. އެހެންނަމަވެސް އެމަނިކުފާނު ގައުމުގެ ކަންކަމުގައި ގެންގުޅުއްވި ސިޔާސަތުތަކުގެ ސަބަބުން ސޯވިއެޓް ޔޫނިއަންގެ ބާރު ދަށްވެ، ސޯވިއެޓް ޔޫނިއަންގެ ވެރިކަމަށް ނިމުމެއް ގެނައުމަށް މަޖުބޫރުވިއެވެ.

ރަޝިއާގެ މިހާރުގެ ރައީސް ވްލަޑްމިއަރ ޕުޓިން މިކަންތައް ސިފަކުރައްވާފައި ވަނީ 20 ވަނަ ގަރުނުގެ އެންމެ ބޮޑު ޖިއޯޕޮލިޓިކަލް ކާރިސާގެ ގޮތުގައެވެ.

މީޙާއިލް ގޮރްބަޗޯވް އާލާސްކަންފުޅުގައި އުޅުއްވުމަށްފަހު އަވަހާރަވެފައިވާކަމަށް ރަޝިއާގެ ސެންޓްރަލް ކްލިނިކަލް ހޮސްޕިޓަލުން އާންމުކުރައްވާފައިވާއިރު، އެމަނިކުފާނު އަވާހަރަވުމާ ގުޅިގެން ރައީސް ޕުޓިން ވަނީ ތައުޒިޔާ ވިދާޅުވެފައެވެ.

ގޮރްބަޗޯވް އަވަހާރަވުމާއި ގުޅިގެން ދުނިޔޭގެ ގިނަ ލީޑަރުން ވަނީ ތައުޒިޔާ ވިދާޅުވެފައެވެ. އެގޮތުން ޔޫރަޕިއަން ކޮމިޝަންގެ ޗީފް، އުރްސެލާ ވޮން ޑަރ ލެޔެން ވަނީ، 1990 ވަނަ އަހަރުގެ ނޯބްލް ޕީސް ޕްރައިޒް ހޯއްދެވި ގޮރްބަޗޯވް ވަނީ ޔޫރަޕް މިނިވަން ކުރުމުގައި މުހިންމު ދައުރެއް އަދާކުރައްވާފައިކަމަށް ވިދާޅުވެފައެވެ.

އެމެރިކާގެ ރައީސް ޖޯ ބައިޑަން ވަނީ ގޮރްބަޗޯވް ވަނީ އެކަހެރިވެފައިވާ ސޯވިއެޓް ޔޫނިއަން އެހެން ގައުމުތަކާ އެކު ގުޅުން ބަދަހިކޮށް ކުރިއެރުވުމުގައި މުހިންމު މަސައްކަތްތަކެއް ކުރައްވާފައިކަމަށް ވިދާޅުވެފައެވެ. މިކަންތައް އިނގިރޭސި ބޮޑުވަޒީރު ބޮރިސް ޖޯންސަން ވެސް ވަނީ ފާހަގަކުރައްވާފައެވެ.

ފިނި ހަނގުރާމައަށް ނިމުމެއް ގެނައިސް ދެ ވަނަ ބޮޑު ހަނގުރާމައަށް ފަހު ހުޅަނގާ ރަޝިއާ އާއި ދެމެދު އޮތް ގުޅުން ރަނގަޅުކުރުމަށް ގިނަ މަސައްކަތްތަކެއް ގޮރްބަޗޯވް ވަނީ ކުރައްވާފައެވެ.

ކުރީގެ ރަޝިއަން ލިބަރަލްގެ އިދިކޮޅު ލީޑަރު ގްރިގޮރީ ޔެވްލިންސްކީ ވަނީ ރަޝިއާގެ އެތައް މިލިއަން މީހުންނާއި ޔޫރަޕްގެ ދެބައިކުޅަ އެއްބަޔަށް މިނިވަންކަން ހޯއްދަވައިދެއްވި ބޭފުޅަކީ ގޮރްބަޗޯވް ކަމަށް ވިދާޅުވެފައެވެ. އަދި މިއީ ވަރަށް މަދު ލީޑަރުންނަށް ނޫނީ ހޯދިފައިވާ ކާމިޔާބީއެއް ނޫން ކަމަށް ގްރިގޮރީ ވިދާޅުވިއެވެ.

އެހެންނަމަވެސް މިހާރު ކުރިއަށްދާ ޔޫކްރެއިން ރަޝިއާ ހަނގުރާމައާއި އެކު އައު ފިނި ހަނގުރާމައެއް ފަށާނެ ކަމުގެ އިންޒާރުތައް ހުޅަނގުން ދެމުންދާއިރު، މިއީ ގޮރްބަޗޯވްގެ ލެގަސީގައި އެމަނިކުފާނުގެ އެންމެ ފަހުގެ އަހަރުތަކުގައި އެޅިގެންދިޔަ ވަރަށް ބޮޑު ކޫރުމެއް ކަަމަށް ބޭރުގެ މީޑިއާތަކުން ފާހަގަކުރެއެވެ.

ކާރނެގީ އެންޑޯމެންޓް ފޮރ އިންޓަނޭޝަނަލް ޕީސްގެ ސީނިއަރ ފެލޯއެއް ކަމަށްވާ އެންޑްރީ ކޮލެސްނިކޮވް ވަނީ ގޮރްބަޗޯވް އަވަހާރަވެފައި މިވަނީ އެމަނިކުފާނު ކުރެއްވި ބުރަ މަސައްކަތުން ހޯއްދެވި މިނިވަންކަން ގެއްލުވާލާ އެމަނިކުފާނުގެ ބުރަ މަސައްކަތްތައް ރަޝިއާގެ މިހާރުގެ ރައީސް ޕުޓިން ވެއްޔާ މޮޑެލާފައި ވަނިކޮށް ކަމަށް ވިދާޅުވެފައެވެ.

1989 ވަނަ އަހަރު ކޮމިއުނިސްޓް ސޯވިއެޓް ބްލޮކްގެ ގައުމުތަކުގައި ޕްރޯ ޑިމޮކްރަސީ މުޒާހަރާތައް ފެށުމުން ބާރުގެ ބޭނުން ކުރުމުން ގޮރްބަޗޯވް ވަނީ ދުރުހެލިވެފައެވެ. މިފަދަ މުޒާހަރާތަކާ މީގެ ކުރީގެ ލީޑަރުން ކުރިމަތިލާފައި ވަނީ ޓޭންކް ފަދަ ބަރު ހަތިޔާރާއެކުއެވެ. އޭގެތެރޭގައި 1956 ވަނަ އަހަރުގެ ހަންގޭރީގެ ހާދިސާ އާއި 1968 ވަނަ އަހަރުގެ ޗެކޯސްލޮވޭކިއާ ހާދިސާ ހިމެނެއެވެ.

އެހެންނަމަވެސް ގޮރްބަޗޯވްގެ މިސިޔާސަތުގެ ސަބަބުން ސޯވިއެޓް ޔޫނިއަންގެ ދަށުގައި ތިބި 15 ގައުމަކުން ވަނީ އެގައުމުތަކުގެ މިނިވަންކަމަށް ގޮވާލައި ސޯވިއެޓް ޔޫނިއަނުން ވަކިވެގަތުމުގެ މަސައްކަތް ކުރަން ފަށާފައެވެ. އެއާއެކު ދެ އަހަރު ދުވަހުގެ ތެރޭގައި ސޯވިއެޓް ޔޫނިއަނަށް ނިމުމެއް އައި މަންޒަރު ފެނިގެން ދިޔައެވެ.

ސޯވިއެޓް ޔޫނިއަން ރޫޅުނަ ނުދީ ހިފޭއްޓުމަށް ގޮރްބަޗޯވް މަސައްކަތްކުރެއްވި ނަމަވެސް 1991 ވަނަ އަހަރުގެ އޮގަސްޓްމަހުގެ ތެރޭގައި ކުރިއަށްދިޔަ ބަގާވާތާއެކު އެމަނިކުފާނު ވަނީ މަގާމުން ވަކިކުރެވިފައެވެ.

ސޯވިއެޓް ޔޫނިއަން ރިފޯމް ކުރުމުގެ މަސައްކަތް ގޮރްބަޗޯވް ފެއްޓެވުން ވެގެންގޮސްފައި ވަނީ ސޯވިއެޓް ޔޫނިއަން ރޫޅުމަށް މަގުފަހިވެގެން ދިޔަ އެއް ސަބަބަށެވެ. މިއީ ސޯވިއެޓް ޔޫނިއަންގެ އިތުރުން ގޮރްބަޗޯވް އަށް ކުރިމަތި އެންމެ ހިތާމަވެރި ހާދިސާކަމަށް މީޑިއާތަކުން ފާހަގަކުރެއެވެ.

ސޯވިއެޓް ކޮމިއުނިސްޓް ޕާޓީގެ ޖެނެރަލް ސެކްރެޓަރީގެ މަގާމާ ގޮރްބަޗޯވް ހަވާލުވެވަޑައިގެންނެވީ އުމުރުފުޅުން 54 އަހަރުގައި 1985 ވަނަ އަހަރުއެވެ. ގިނަ ރިފޯމްތަކަކާއެކު ސިޔާސީ އަދި އިގުތުސާދީ މިނިވަނކަން ހަނިކުރެއްވުމުގެ މަސައްކަތް ކުރެއްވި ނަމަވެސް މިކަންތައް ބޮއްސުންލައިގެންދިޔައެވެ.

އެމެރިކާގެ މެސަޗޫސެޓްގެ އެމްހަރސްޓް ކޮލެޖްގެ ޕްރޮފެސަރެއް ކަމަށްވާ ވިލިއަމް ޓައުބްމަން ވަނީ ގޮރްބަޗޯވް އަކީ ރަނގަޅު އިންސާނެއް ކަމަށާއި އެމަނިކުފާނަށް ދިމާވި މައްސަލައަކީ ވެރިކަން ކުރެއްވުމަށް ލިބިވަޑައިގެންނެވި ގައުމަށް އެމަނިކުފާނަކީ މާރަނގަޅު ބޭފުޅަކަށް ވުން ކަމަށް ވަނީ ވިދާޅުވެފައެވެ.

ސޯވިއެޓް ޔޫނިއަން ރޫޅުމުގައި ގޮރްބަޗޯވްގެ ދައުރެއް ވާކަމަށް ގަބޫލުކޮށް އެކަމުގެ ޒިންމާ ނަންގަވަން ޖެހޭނެ ބޭފުޅަކީ ގޮރްބަޗޯވްކަމަށް ގަބޫލުކުރާ މީހުން ރަޝިއާގައި މަދެއް ނޫނެވެ. އަދި ބައެއް މީހުން ވަނީ ސޯވިއެޓް ޔޫނިއަން ގަސްތުގައި ރޫޅައިލި ކަމުގެ ތުހުމަތުވެސް ގޮރްބަޗޯވް އަށް ކޮށްފައެވެ.

މީޚާއިލް ގޮރްބަޗޯވް ފަސްދާނު ލެވޭނީ 1999 ވަނަ އަހަރު އަވާހަރަވި އެމަނިކުފާނުގެ އަނބިކަނބަލުން ރައިސާގެ މަހާނަ ކައިރީގައި މޮސްކޯގެ ނޮވޮޑެވިޗީ ސިމެޓްރީގައެވެ.