ލިވާތު އަދި ސިޙާޤުގެ ކުށްތަކަކީ ބޮޑެތި ޖިނާއީ ކުށްތަކުގެ ގޮތުގައި ކަނޑައެޅުމަށް ހުށަހަޅައިފި
ބިލް ފާސްކުރަން މެމްބަރުންގެ އެއްބާރުލުން ދެއްވުމަށް ޤާސިމް ވަނީ އެދިވަޑައިގަންނަވާފަ
މާމިގިލި ދާއިރާގެ މެމްބަރު ގާސިމް އިބްރާހިމް
ލިވާތުގެ ކުށާއި ސިޙާގުގެ ކުށަކީ ޖިނާއީ ބޮޑެތި ކުށްތަކުގެ ގޮތުގައި ކަނޑައަޅަން ޖިނާއީ އިޖުރާއަތުގެ ޤާނޫނަށް އިސްލާހެއް ހުށަހަޅައިފިއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ހުށަހަޅުއްވާފައިވާ އެ އިސްލާހުގެ ފުރަތަމަ ކިޔުން ވަނީ އިއްވާފައެވެ. އޮގަސްޓު މަހުގެ 30 ވަނަ ދުވަހު ޤާސިމް މަޖިލީހަށް ހުށަހެޅުއްވި އެ އިސްލާހުގައި ހުށަހަޅާފައި ވަނީ ޖިނާއީ އިޖުރާއަތުގެ ޤާނޫނުގެ 22 ވަނަ މާއްދާ އަށް އަކުރެއް އިތުރުކުރުމަށެވެ.
އެ ބިލު ހުށަހަޅުއްވަމުން ޤާސިމް ވިދާޅުވެފައި ވަނީ އެއްޖިންސުން ގުޅުން ހިންގުމަކީ އާދައިގެ ކުށެއް ކަަމަށް ދެކި، އެފަދަ އަމަލުތައް ކުރާ ފަރާތްތައް ފަސޭހައިން މުޖުތަމައު ތެރެއަށް ދޫވެފައި ތިބުމަކީ ޝަރުއީ މަރުހަލާ ނިމުމުގެ ކުރިން ބަޔަކާއި އެކު ވަހުޝީ އަމަލެއް ހިންގުމަށް ފުރުސަތު ލިބޭ ކަމެއް ކަަމަށެވެ. އެފަދަ މީހުންނަކީ މުޖުތަމައު އަށް ނުރައްކާތެރި ބައެއް ކަމަށް ސިފަކުރައްވާ ޤާސިމް ވަނީ އެ ފަދަ މީހުންގެ ވަސްވާސް އެ މީހުންގެ އާއިލާ އާއި މުޖުތަމައަށް ފޯރުމުގެ ކުރިން އެކަހެރި ކުރަން ޖެހޭ ކަމަށް ވެސް ވިދާޅުވެފައެވެ. އެއީ އިސްލާމީ މުޖުތަމައުގެ ސަލާމަތަށްޓަކައި ގައުމުގެ ވެރިންނާއި، މެމްބަރުން ސީރިއަސްކޮށް ވިސްނަވަން ޖެހޭ މައްސަލަ އެއް ކަމަށް ޤާސިމް ވަނީ ފާހަގަކުރައްވާފައެވެ.
އެހެންނަމަވެސް ޤައުމުގެ ބޮޑުންގެ ތެރެއިން ބަޔަކު އެފަދަ އަމަލުތައް ކުރާ މީހުން ހިމާޔަތް ކުރާ ހިސާބަށް ކަންކަން ދިއުމަކީ ލަދުވެތި ކަމެއް ނޫންތޯ ގާސިމް ވަނީ ސުވާލުކުރައްވާފައެވެ. އަދި ރުހުމުގައި ޒިނޭކުރުމާއި، ލިވާތުކުރުން ފަދަ އަމަލުތައް ކުރުމަކީ މައްސަލައެއް ނޫން ކަމަށް ގަބޫލުކުރާ މީހުން މުޖުތަމައުގައި ގިނަވެފައިވާ ކަމަށާއި، އެފަދަ އަމަލުތަކަކީ ބޮޑުކަމެއް ނޫން ކަަމަށް ދޭހަވާ މޭރުމަކުން ބައެއް ސިޔާސީ މީހުން ވެސް ވާހަކަދައްކާ ކަަމަށް ޤާސިމް ވަނީ އެ މައްސަލަ ހުށަހަޅުއްވަމުން ވިދާޅުވެފައެވެ. އަދި އެ އަމަލު ޕްރޮމޯޓުކުރުމަށް ބަޔަކު މަސައްކަތް ކުރާ ކަމަށް ވެސް ޤާސިމް ވަނީ ތުހުމަތުކުރައްވާފައެވެ. ބިލް ފާސްކުރަން މެމްބަރުންގެ އެއްބާރުލުން ދެއްވުމަށް ޤާސިމް ވަނީ އެދިވަޑައިގަންނަވާފައެވެ.
ގާނޫނުލްޢުގޫބާތުގައި ބުނާ ގޮތުން މީހަކާ ނީނދެ ކާވެންޏެއްގެ މަތީގައި ހުރި މީހަކާއި ޒިނާ ނުވަތަ ލިވާތުކުރުމަކީ ޖުނަޙުގެ 1 ވަނަ ދަރަޖައިގެ ކުށެވެ. މީހަކާ ނީނދެ ހުރެ ކައިވެންޏެއްގެ މަތީގައި ނުވާ މީހަކާ އެކު ކުރި ކުށެއް ނަމަ އެއީ ޖުނަޙުގެ 2 ވަނަ ދަރަޖައިގެ ކުށެކެވެ. ޖުނަޙުގެ 1 ވަނަ ދަރަޖައިގެ ކުށުގައި ޖަލަށް ލެވޭނީ ގިނަވަގެން 1 އަހަރު ދުވަހެވެ. ޖުނަޙުގެ 2 ވަނަ ދަރަޖައިގެ ކުށެއްގައި ޖަލަށް ލެވޭނީ ގިނަ ވެގެން 6 މަސް ދުވަހެވެ.
ޖިންސީ ކުށުގެ ޤާނޫނުގައި "އެއް ޖިންސުން ގުޅުން ހިންގުމުގެ ކުށް" ބަޔާންކޮށްފައިވެއެވެ. އެގޮތުން އެފަދަ އަމަލެއް ރުހުމުގައި ކޮށްފިނަމަ ކުށުގެ އަދަބަކީ 5 އަހަރާއި 7 އަހަރާއި ދެމެދުގެ މުއްދަތަކަށް ޖަލަށް ލުމެވެ. އެ އަމަލު ހިންގީ އެތަނުން އެކެއްގެ ނުރުހުމުގައި ނަމަ އަދަބަކީ 7 އަހަރާއި 10 އަހަރާއި ދެމެދުގެ މުއްދަތަކަށް ޖަލަށްލުމެވެ.
