މި ސަރުކާރުގެ ސިޔާސަތަކީ އެއްވެސް ކައުންސިލެއް ބާކީނުކުރުން: އަކްރަމް

މި ސަރުކާރުގެ ސިޔާސަތަކީ އެއްވެސް ކައުންސިލެއް ބާކީނުކުރުން ކަމަށް, ހައުސިން އެންޑް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

އަމީނީމަގުގައި ތާރުއަޅައި ތަރައްގީކުރުމުގެ އަމަލީ މަސައްކަތް ފެށުމަށް ބޭއްވުމަށް ރަސްމިއްޔާތުގައި ވާހަކަފުޅުދައްކަވަމުން އަކްރަމް ވިދާޅުވީ، އަމީނީމަގު ޒަމާނީ ފެންވަރަށް ތަރައްގީކުރުމުގެ މަސައްކަތް މިނިސްޓްރީން، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ ހަވާލުކުރި ހިސާބުން މައުލޫމާތުގެ އޮޅުންތަކެއް އެރިކަމަށާއި، އަމީނީމަގުގެ މަޝްރޫއު ވަކިން ކުރިއަށް ގެންދިއުމަށް އާރްޑީސީއާ ހަވާލުކުރިކަމަށެވެ. މާލެސިޓީގެ ސްކޭޕިންގ މަޝްރޫއުގެ ދަށުން މާލޭގެ 13 ސެގްމަންޓްގައި މަގު ހެދުމަށް މިނިސްޓްރީން މާލެ ސިޓީ ކައުންސިލް މެދުވެރިކޮށް އާރްޑީސީއާ ހަވާލުކުރި މި މަސައްކަތަކީ މުޅިން ވަކި މަޝްރޫއެއް ކަމަށްވެސް އަކްރަމް ވިދާޅުވިއެވެ.

އަކްރަމް ވިދާޅުވީ އެއްބަސްވުމުގައި ނުހިމެނޭ ބޮޑެތި މަގުތަކުގެ މަސައްކަތް ވަކި އެއްބަސްވުމެއްގެ ދަށުން ކުރިއަށްގެންދާނެ ކަމަށެވެ. އަދި އަމީނީ މަގު ތަރައްގީކުރުމުގެ މަޝްރޫއަކީ އޭގެ ފެށުންކަމަށެވެ.

އަމީނީ މަގު ތަރައްގީކުރަން ސަރުކާރުން ނިންމީ އެ މަގަކީ ގިނަ އާންމު ރައްޔިތުން ބޭނުންކުރާ މަގަކަށްވެފައި، މުހިންމު ހުރިހާ ޚިދުމަތެއް އެ މަގެއްގައި ގާއިމުވެފައިވާ ހަމައެކަނި މަގަކީ މިހާރު އަމީނީ މަގުކަމަށް ވާތީ އަކްރަމް ވިދާޅުވިއެވެ.

އަކްރަމް އިތުރަށް ވިދާޅުވީ، އަމީނީ މަގުގެ މައްސަލައަކީ ގައުމީ ފެންވަރުގެ މައްސަލައެއްކަމަށް ބުންޏަސް ދޮގަކަށްނުވާނެ ކަމަށެވެ. އާރްޑީސީ ކުންފުންޏާ ސަރުކާރުން މި މަސައްކަތް ހަވާލުކުރީ އެ ކުންފުންޏަކީ މަގު ހެދުމުގެ އެންމެ ގިނަ މަޝްރޫއުތައް ކުރިއަށްދާ ކުންފުންޏަށްވުމުން ކަމަށާއި، މީގެ ކުރިން އެ ކުންފުނިން ހަދާފައިވާ މަގުތަކަށް ބަލާއިރު މަގުތައް ހެދުމުގެ ފެންވަރާއި ހުނަރު، ކުންފުނީގެ މުވައްޒަފުންގެ ފަރާތުން ފެނިގެންހިނގައްޖެކަމަށެވެ.

މަގު ހެދުމަށް އާރްޑީސީއާ ހަވާލުކުރީ މިދިޔަ ޖުލައި މަހުގެ 3 ވަނަ ދުވަހުއެވެ. ވިއްސާރަ މޫސުންތަކުގައި މާލޭގައި އެންމެ ބޮޑަށް ފެންބޮޑުވެ، ރައްޔިތުންނަށް ގިނަ ތަކުލީފުތަކެއް ކުރިމަތިވާ އެއް މަގުކަމަށްވާ އަމީނީމަގު ތަރައްގީކުރުމަށް ޕްލޭނިންގ މިނިސްޓްރީން އާރްޑީސީއެކު ސޮއިކުރީ އެ މަގުގައި ތާރު އަޅައިގެން ހެދުމަށެވެ.