ފުލުހުންގެ ލޯންޗެއްގައި ރޯކޮށްލި މައްސަލަ: ދެ ހެއްކެއްގެ ހެކިބަސް ނަގައިފި
މޫސާ އިނާސްގެ އިތުރުން، ލ. ގަން، ތުނޑި، ލަވްސައިޑް ޢަބްދުއްލަޠީފް އިބްރާހީމްގެ މައްޗަށް ދައުވާކުރޭ
ފުލުހުންގެ ލޯންޗެއްގައި ރޯކޮށްލި މައްސަލައިގައި ދައުވާ އުފުލާފައިވާ ފަރާތްތައް
ލ. ގަން، ތުނޑި ބަނދަރު ސަރަހައްދުގައި އޮތް މޯލްޑިވްސް ޕޮލިސް ސަރވިސްގެ ލޯންޗެއްގައި ޤަޞްދުގައި އަލިފާންރޯކޮށްލި މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުވާ އުފުލާފައިވަނީ ލ ގަން ތުނޑި، ކަޅައިދޫ ފިނިހިޔާގެ މޫސާ އިނާސްގެ އިތުރުން، ލ. ގަން، ތުނޑި، ލަވްސައިޑް ޢަބްދުއްލަޠީފް އިބްރާހީމްގެ މައްޗަށެވެ.
މި މައްސަލައިގައި މިހާރު ކުރިއަށްދަނީ ދައުލަތުގެ ހެކިންގެ ހެކިބަސް ނެގުމުގެ މަރުޙަލާއެވެ.
މި އަޑުއެހުމުގައި މޫސާ އިނާސް ކޯޓަށް ހާޒިރު ކުރެވިފައި ނުވަނީ މޯލްޑިވްސް ކަރެކްޝަނަލް ސަރވިސްގެ އިދާރީ އޮޅުމެއްގެ ސަބަބުންނެވެ. އޭނާ ވަނީ މައްސަލައިގައި ކުރިއަށްދާން ބޭނުންވަނީ ކޯޓުގައި ވަކީލާއެކުކަން ފާހަގަކޮށްފައެވެ. ވުމާއެކު، މި އަޑުއެހުމުގައި އޭނާއާ ގުޅުންހުރި ހެކިންގެ ހެކިބަސް ނަގާފައެއް ނުވެއެވެ.
މި މައްސަލައިގައި ފުރަތަމަ ހެއްކެއްގެ ގޮތުގައި ހާޒިރު ކޮށްފައިވަނީ ދިވެހި ފުލުހުންގެ ޚިދުމަތުގައި ވަޒީފާ އަދާ ކުރައްވަމުން ގެންދަވާ ފަރާތެކެވެ. މި ޙާދިސާ ހިނގިއިރު އޭނާ މަސައްކަތް ކުރައްވަމުން ގެންދެވީ ފުލުހުންގެ ސީިރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގައެވެ.
އޭނާ ވަނީ އަބްދުއްލަތީފް ދިރިއުޅޭ ކޮޓަރި ބަަލައި ފާސްކޮށް ބައެއް އިލެކްޓްރޯނިކް ވަސީލަތްތައް ހޯދާފައެވެ. އެގޮތުން ފޯނާއި، ޕެންޑްރައިވްއާއި ހާޑް ޑިސްކް ފަދަ ތަަކެތި ވަނީ ހޯދާފައެވެ.
ދައުލަތާއި ދިފާއުންވެސް ވަނީ އޭނާއާ ސުވާލުކޮށްފައެވެ. އެއަށްފަހު ދެން ހާޒިރުކޮށްފައިވަނީ މި މައްސަލައިގެ ކޮމްޕިއުޓަރ ފޮރެންސިކް ރިޕޯޓު ތައްޔާރު ކުރެއްވި ފަރާތެވެ. މި އަޑުއެހުމުގައި ދައުލަތުން އޭނާއާ ސުވާލު ކުރުމަށްފަހު ދިފާއުންވެސް ވަނީ ގިނަ ސުވާލުތަކެއް އޭނާއަށް އަމާޒުކޮށްފައެވެ.
ލ. ގަން، ތުނޑި ބަނދަރު ސަރަހައްދުގައި އޮތް ފުލުހުންގެ ލޯންޗުގައި އަލިފާން ރޯކޮށްލާފައިވަނީ 22 މާރިޗު 2020 ދުވަހުއެވެ.
ފުލުހުންގެ ލޯންޗެއް ރޯކޮށްލި މައްސަލައާ ގުޅިގެން، ކޯޓު އަމުރެއްގެ ދަށުން އިނާސްގެ ގެ ބަލާ ފާސްކުރުއިރު، ފެނުނު ލެޕްޓޯޕެއްގެ ހާޑް ޑިސްކް ތަހުލީލު ކުރިއިރު، ޓެރެރިސްޓް ޖަމާއަތްތައް ކަމަށްވާ، އިސްލާމިކް ސްޓޭޓް އާއި އަލްގައިދާ އަށް ތާއީދު ކުރާކަން ދޭހަކޮށްދޭ ލިޔުންތަކާއި ވީޑިއޯ ފެނިފައިވާކަމަށް ދައުލަތުން ބުނެއެވެ.
މީގެއިތުރުން، ކޯޓު އަމުރެއްގެ ދަށުން، އަބްދުއްލަތީފްގެ ގެ ބަލާ ފާސްކުރިއިރު، ފެނުނު ހާޑް ޑިސްކެއް ތަހުލީލު ކުރިއިރު، ޓެރެރިސްޓް ޖަމާއަތްތައް ކަމަށްވާ ޖަބްޙަތުއްނުޞްރާ އާއި އަލްގައިދާއަށް ތާއީދު ކުރާކަން ދޭހަކޮށްދޭ ލިޔުންތައް ފެނިފައިވާކަމަށްވެސް ދައުލަތުން ވަނީ ބުނެފައެވެ.
