މިއީ މޫދަށްއެރި، ކަތީބުން ރޯނުދަމާ، ގޯތި ދިން ޒަމާނެއް ނޫން

ރިޔާސީ އިންތިހާބު ކައިރިވާ ވަރަކަށް ކަޑަޖެހުމާއި ރައްޔިތުންނަށް ހުވަފެން ދެއްކުމާއި މޮޅު ވަހަކަ ދެއްކުން ގިނަވެގެން ދިޔަ ޒަމާނެއްވެސް އައެވެ. އެޖަހާ ކަޑަތައް ހުރެ ފީވެ ދަނީ އެވެ. ވައުދު ފުދޭ ތަނެއް މަދުން ނޫނީ އޭރު ނުފެނެއެވެ. އަނެއްކާވެސް އަނެއް ރިޔާސީ ދައުރު ފެށެން ވާއިރަށް ހަމަ ކުރިން ކުރި ކަންތައް އަނެއްކާވެސް ކުރަންޖެހެއެވެ.

މިހާރު މިފެންނަނީ ތަފާތު ދުވަހެކެވެ. ރިޔާސި ދައުރެއް ފުރިހަމަވެގެން ދާއިރު ވީ ވައުދުތައް ތަކުރާރު ކުރަން ނުޖެހި، މިފަދަ ކަންކަމަށް ނިމުމެއް ގެނެސް، ރައްޔިތުންނަށް ވެވޭ ވައުދުތައް އެ ބުނާ ދުވަހަށް ނިންމާނެކަމުގެ ޔަގީންކަން މިހާރު މިއޮތް ސަރުކާރުން ކިތަންމެ ރަގަލަކަށްވެސް ވަނީ ދީފައެވެ.

އަނެއްކާ ވެސް މިއޮތީ ރިޔަސީ އިންތިހާބެއް ބޯމަތިވެފައެވެ. ރައްޔިތުން ގޮތް ނިންމުމުގެ ކުރިން ބަލަންޖެހޭ ނިކަން ގިނަ ކަންކަން އެބަހުއްޓެވެ. ކަތީބުންނާއި އަތޮޅުވެރިންގެ ޒަމާނުގައި ރައްޔިތުން ގުބޯހެއްދި ހެއްދުން ނިމުމަކަށް ގެނެސް ވައުދުވެ ވައުދުފުއްދާ ސަރުކާރަކަށް މި ސަރުކާރު ސާބިތުކޮށްދީފައިވާ ކަން މީ އެންމެންނަށް ފެންނަން އޮތް ހަގީގަތެވެ.

އެކި ފަހަރުމަތިން އެކި ވެރިކަމުގައި މި މަންޒަރު ދައްކާފައި އެބަހުއްޓެވެ. ތިމާއަށް ވޯޓު ދިނުމަށް ބުނުމުގެ ބަދަލުގައި މިފަހަރު ވެރިކަމުގައި ހުންނެވި އިބްރާހީމް މުޙައްމަދު ޞާލިޙް ގޮތް ނިންމުން ރައްޔިތުންގެ އަތްމައްޗަށް ދޫކޮށްލެއްވިއެވެ. ދިއްގަރު ގޮނޑުދޮށް ހިމާޔަތްކުރުމުގެ މަސައްކަތް ނިންމި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނި ރައްޔިތުން ވިސްނަވާފައި ގޮތް ނިންމެވުމަށް އެދިވަޑައިގަންނަވާފައެވެ.

ދިއްގަރުގެ ހާލަތަށް އިޝާރާތްކުރައްވާ ރައީސް ވިދާޅުވީ މަސައްކަތްތައް ހުއްޓާލައި، މަހަށްނުގޮސް އެތައް ދުވަހަކު ރަށުގައި ތިބެ ބާޑިޖަހައި، އެކަމުން ޙައްލު ހޯދުމަށްޓަކައި ކޮންމެ އަހަރަކު އެ މަސައްކަތް ތަކުރާރުކޮށް ކުރަމުން އައި އެއް ރަށަކީ ދިއްގަރު ކަމަށެވެ. ޙައްލެއް އެއަކަށް ނުލިބޭ ކަމަށެވެ. ޖެހިގެން އަންނަ ދުވަހު އަނެއްކާވެސް އޮންނަނީ އުދައަރައި ގޭގެޔަށް ލޮނުވަދެ، ގެންގުޅޭ ސާމާނާއި މުދަލަށް އިންތިހާއަށް ގެއްލުންވެފައި ކަމަށެވެ.

މި ވާހަކަތައް އެ ރަށުގެ ރައްޔިތުންނާއި އެ ރަށުގެ ވެރިން، ކުރީގެ ސަރުކާރުތަކުގައިވެސް ދަންނަވާފައިވާނެ ކަމަށް ވިދާޅުވިއެވެ. އެންމެފަހަރަކު ނޫން ކަމަށާއި، ކިތަންމެ ފަހަރަކު މި ވާހަކަތައް ތަކުރާރުކޮށް ސަރުކާރާ ޙިއްޞާކޮށްފައިވާނެ ކަމަށެވެ. ނަމަވެސް އެ ރައްޔިތުން އެ ހުށަހަޅާ ހުށަހެޅުންތަކަށް ޢަމަލީ ސިފަ ގެނެސްދޭނެ ކަމުގެ ވަޢުދު ކިތަންމެފަހަރަކު ވެފައި، ކިތަންމެފަހަރަކު ޕްލޭންވެސް ދައްކާފައިވާނެ ކަމަށެވެ. އަދި ބަޖެޓްވެސް ކޮށްފައިވާނެ ކަމަށާއި، އެހެން ނަމަވެސް، އަނެއްކާވެސް އެ ޕްލޭނާ އެކީގައި ދެން އަންނަނީ އަނެއްކާވެސް އިންތިޚާބަކާއެކު ކަމަށެވެ.

ދެން އަންނަ ފަހަރު އެއަށްވުރެ ބޮޑު ޕްލޭނެއް ޙިއްޞާ ކުރައްވާ، ޖަޕާން ކީއްކުރަންތޯ، އެހެން ކޮންމެވެސް ރަށެއްގެ މިސާލުވެސް ޖައްސަވައެވެ. ސަރުކާރުން ކުރާ ކަންތައްތައް، ޕްރޮޖެކްޓްތައް ކުރިއަށް ގެންދިޔުމުގައި، ސަރުކާރަކާ އެކީގައި، އެއް ވިސްނުމެއްގައި ތިބޭ ބަޔަކު ތިބީމާ ވަރަށް ބޮޑަށް ފަސޭހަވާ ކަމަށް ރައީސް ވިދާޅުވިއެވެ. މިއީ ރައްޔިތުންގެ އަޑު ސަރުކާރަށް އިއްވަން މުހިންމުކަމެއް ކަމުގައިވާތީއެވެ.

ބިމުގެ މައްސަލައަކީވެސް އެތައް ރަށަކަށް ދިމާވެފައިވާ މައްސަލައެކެވެ. ނަމަވެސް، މި ވާހަކަވެސް ކުރީގެ އެތައް ސަރުކާރެއްގައި ރައްޔިތުން ކައިރީގައި ދައްކައެވެ. ހަމަ އެ ސަރުކާރުތަކުން މިއަށް ޙައްލު ގެނެސްދޭނެ ޕްލޭންތަކާއި، ކުރެހުންތަކާއި، ބަޖެޓާ އެއްޗެތި ދައްކާފައި އޮވެއެވެ. އަދި އޭގެއިތުރުން، މޫދަށްއެރި، ކަތީބުން ރޯނުދަމާ، ގޯތިވެސް ދީފައި އެބަހުއްޓެވެ.

ރައީސް ސާލިހު ރައްޔިތުންނަށް ދެއްވި ޔަގީންކަމަކީ އެކަމެއް އެގޮތަކަށެއް ނުކުރާނެ ކަމުގެ ޔަގީންކަމެވެ. ވަޢުދުތައް ފުއްދަމުން، ވީ ވަޢުދުތައް ވީވެސް އެކަމަށް ކުރިއާލައި ރާވައި ބަޖެޓްކޮށް، ތައްޔާރީތައް ވެގެން ކުރައްވަމުން ގެންދަވާނެކމަުގެ ޔަގީންކަމެވެ. ހަމަ އައިސް ތަނަކަށް ފައިބާ، ކަމެއް ކޮށްދޭނަމޭ ބުނެ ނިންމާ ނުލައްވާނެކަމުގެ ޔަގީންކަމެވެ.

ރައީސް ވިދާޅުވީ މި ސަރުކާރުން ތިބީ ރައްޔިތުންނަށް ޚިދުމަތް ކުރުމުގައި ކުރިއަށްދާން ތައްޔާރަށް ކަމަށެވެ. ސަރުކާރުގެ ވިސްނުމާއި ފިކުރު އެބަހުރި ކަމަށެވެ. ސަރުކާރުގެ ވިސްނުމަކީ، ލާމަރުކަޒީ ނިޒާމުން ރާއްޖެ ތަރައްޤީކޮށް، އެ ރަށެއްގައި ދިރިއުޅޭ ރައްޔިތުންނަށް ބޭނުންވާ ޚިދުމަތްތައް ފަހިކޮށްދީ، އެ ރަށެއްގެ އިޤްތިޞާދު ކުރިއަރުވައި ފުދުންތެރި ކުރުން ކަމަށެވެ. ކުރިއަށް މިއޮތް ތަނުގައި ރައްޔިތުން ކަންތައްތައް ނިންމަވާއިރުގައި، ވަރަށް ފުންކޮށް ވިސްނަވަންވާނެ ކަމަށް ވިދާޅުވިއެވެ.

ރައީސް ރައްޔިތުންގެ ފަރާތުން އެދިވަޑައިގެންނެވީ ވިސްނަވާފައި ބައްލަވާފައި ކަންކަން ނިންމެވުމަށެވެ. ޖެހިގެން އޮންނަ އަހަރަކީ އަނެއްކާވެސް ހަލަބޮލި ސިޔާސީ މަސައްކަތްތަކެއް ކުރެވިގެންދާނެ އަހަރެއް ކަމާއި، ތަފާތު ވިސްނުމާއި ފިކުރު ރައްޔިތުންގެ ކުރިމައްޗަށް އަންނާނެ. ޕްލޭންތައް ހުންނާނެ ކަމަށެވެ. ކުރެހުންތައް ގެންނަވާނެ ކަމެވެ. އެހެން ނަމަވެސް، ވިސްނަވަންވީ އެއާ އެއްގޮތަށް ޢަމަލުތައް ބަހައްޓައި، ކަންތައްތައް ކުރަނީ ކޮންބައެއްތޯ އާއި ކަންތައްތައް ނިންމަވާނީ ރައްޔިތުން ކަމަށެވެ.