އެމީހަކަށް ފެންނަ ގޮތަކަށް 'އިންޞާފު' ޤާއިމުކުރުމަކީ ޤާނޫނު ހުއްދަކުރާ ކަމެއް ނޫން: ޕީޖީ ޝަމީމް
ޤާނޫނުގައި ލިޔެ، 'އިންޞާފު' އޮންނަންވީ ގޮތުގެ އިރުޝާދު ދިނުމަކީ ރައްޔިތުންގެ މަޖިލީހުގެ މަސައްކަތެއް : ޕީޖީ
ޕްރޮސެކިއުޓަރ ޖެނެރަލް ހުސައިން ޝަމީމް
އެމީހަކަށް ފެންނަ ގޮތަކަށް 'އިންޞާފު' ޤާއިމުކުރުމަކީ ޤާނޫނު ހުއްދަކުރާ ކެމެއް ނޫން ކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ޕީޖީ އޭނާގެ ބްލޮގްގައި "އިންސާފެއް ނުލިބުނު" މި ޝިއާރުގެ ދަށުން ލިޔުއްވާފައި ލިޔުއްވުމުގައި ވިދާޅުވެފައި ވަނީ ޢަދުލު އިންޞާފުގެ މަފްހޫމަކީ ދިވެހިންގެ ތެރޭގައި އެކި ގޮތްގޮތަށް މާނަކުރެވޭ އެއްޗެއް ކަމަށެވެ. އަދި ޕީޖީގެ ހައިސިއްޔަތުން އިންސާފު ޤާއިމްކުރުމުގެ މަސްޢޫލިއްޔަތާއި ހަވާލުވެ ހުންނެވި އިރު އިންސާފު ނުލިބޭ މައްސަލަ އަކީ ވިސްނަވާ މައްސަލަ އެއް ކަަމަށް ފާހަގަކުރެއްވިއެވެ. އަދި އިންސާފު ނުލިބޭ މައްސަލަ ހައްލުކޮށްދީ އިންސާފު ހޯދާދިނުމަކީ އެމަނިކުފާނުގެ ހަމައެކަނި މަސައްކަތް ކަމަށް ވެސް ވަނީ ވިދާޅުވެފައެވެ.
އެގޮތުން ބަލާއިރު ޤާނޫނީ ނިޒާމުތައް ހަމަޖެހިފައިވާ ގޮތުން، ޕްރޮސިކިއުޓަރ ޖެނެރަލްގެ ހައިސިއްޔަތުން ޤާއިމުކުރަންޖެހޭ އިންސާފަކީ ޤާނޫނުތަކާއި ގަވާއިދުތަކާއި ޤާނޫނީ އުޞޫލުތަކުގެ މަތީން ޤާއިމްކޮށްދޭ އިންސާފު ކަމަށާއި އެއީ އޭނާ ޤަބޫލުކުރައްވާ ގޮތަށް ހޯއްދަވައިދެއްވާ އިންސާފެއް ނޫން ކަމަށް ޝަމީމްގެ ލިޔުއްވުމުގައި ވަނީ ފާހަގަކުރައްވާފައެވެ.
މީގެ އިތުރުން އިސްލާމީ ޝަރީޢަތުން ސާބިތުވާން އޮތް ކަންކަން ތަންފީޒުނުކުރަނީ ކީއްވެގެންތޯ ކުރާ ސުވާލަށް ވެސް އެ ލިޔުމުގައި ޝަމީމް ވަނި ޖަވާބުދެއްވާފައެވެ. އެގޮތުން އެއްވެސް މީހަކަށް އަދަބެއް ދެވޭނީ ޤާނޫނުގައި ބަޔާންކޮށްފައިވާ ގޮތުގެ މަތީން، އެ ޤާނޫނަކުން ބަޔާންކުރާ އަދަބެއް ކަމަށް ވާއިރު ޤާނޫނު ތަންފީޒު ކުރާ ފަރާތްތަކުން އަމަލުކުރަން ޖެހެނީ އެ މޭރުމުން ކަން ޝަމީމް ފާހަގަކުރެއްވިއެވެ.
އެެހެންކަމުން ޤާނޫނުގައި ވަކި ކަމެއް ނެތް ނަމަ، އެކަމެއް ޤާނޫނުގައި ލިޔެ، 'އިންޞާފު' އޮންނަންވީ ގޮތުގެ އިރުޝާދު ދިނުމަކީ ރައްޔިތުންގެ މަޖިލީހުގެ މަސައްކަތެއް ކަމަށް ވެސް ޝަމީމް ވަނީ ފާހަގަކުރައްވާފައެވެ. ޝަމީމް ވަނީ އެމީހަކަށް ފެންނަ ގޮތަކަށް، އެމީހެއްގެ ހިތަށް ފެނުނު 'އިންޞާފު' ޤާއިމުކުރުމަކީ ޤާނޫނީ ގޮތުން ހުއްދަ ކަމެއް ނޫން ކަމަށް ވެސް ފާހަގަކުރައްވާފައެވެ.
ޝަމީމް މިފަދައިން ވިދާޅުވެފައި މި ވަނީ އިންސާފު ނުލިބޭ ކަމަށް ބުނެ އާއްމުން ކުށުގެ ތުހުމަތު ކުރެވޭ މީހުންނަށް އަނިޔާ ކުރަމުންދާ ދިއުން އާންމުވެ އެފަދަ އަމަލުތައް ނުހިންގުމަށް ފުލުހުން ވެސް ޢިލްތިމާސްކޮށްފައިވާ ދަނޑިވަޅެއްގައެވެ.
