ކުރިއަށް އޮތް ހަފްތާގައި ވެސް މޫސުން ގޯސްވާނެ: މެޓް އޮފީސް
ކުރިއަށް އޮތް ހަފްތާ ތެރޭގައި ދޭތެރެދޭތެރެއިން މޫސުން ގޯސްކޮށް ފެންނަ ކަމަށް މެޓް އޮފީހުން ބުނޭ
މޫސުން
ކުރިއަށް އޮތް ހަފްތާގައި ވެސް ރާއްޖޭގެ މޫސުން ގޯސްވާނެ ކަމަށް ލަފާ ކުރެވޭ ކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.
އެ އިދާރާއިން "ރާއްޖެ އެމްވީ" އަށް ބުނީ ކުރިއަށް އޮތް ދެ ދުވަހު ވެސް ރާއްޖޭގެ އެކި ހިސާބުތަަކަށް ވިއްސާރާ ކުރާނެ ކަަމަށެވެ. އަދި ބައެއް ރަށްތަކަށް ގުގުރުން އެކަށީގެންވާ ކަމަށް ވެސް އެ އިދާރާއިން ބުންޏެވެ.
ކުރިއަށް އޮތް ހަފްތާއަށް ބަލާއިރު ދޭތެރެދޭތެރެއިން މޫސުން ގޯސްކޮށް ފެންނަ ކަމަށް ވެސް މޫސުމާ ބެހޭ ޤައުމީ އިދާރާއިން ބުންޏެވެ. އެހެންވެ، ރާއްޖެއަށް މޫސުން ރަނގަޅުވާނެ ތާރީހެއް ލަފާ ކުރަން ދަތި ކަމަށް އެ އިދާރާއިން ބުންޏެވެ.
އެ އިދާރާއިން ލަފާ ކުރާ ގޮތުގައި ކުރިއަށް އޮތް 48 ގަޑިއިރު ވައި ޖެހޭނީ ހުޅަނގާއި ހުޅަނގު އުތުރުން ގަޑިއަކު 13 މޭލާއި 23 މޭލާ ދެމެެދުގެ ބާރުމިނުގައެވެ. އަދި ވިލާގަނޑުގައި ގަޑިއަކު 45 މޭލަށް ވައި ގަދަވުން އެކަށީގެންވާ ކަމަށް މޫސުމާ ބެހޭ ޤައުމީ އިދާރާއިން ލަފާ ކުރެއެވެ.
އެ އިދާރާއިން ލަފާ ކުރާ ގޮތުގައި ކުރިއަށް އޮތް ހަފްތާގައި ރާއްޖޭގެ ކަނޑުތައް ގަދަވާނެއެވެ. އެގޮތުން، ރާޅުގެ އުސްމިން 4 ފޫޓާއި 7 ފޫޓާ ދެެމެދުގައި ހުންނާނެ ކަމަށް ލަފާ ކޮށްފައިވާއިރު ދިޔަވަރު ބޮޑުވާ ވަގުތުތަކުގައި ބައެއް ރަށްތަކަށް އުދައިގެ އަސަރު ކުރާނެ ކަމަށް ވެސް ވަނީ ލަފާ ކޮށްފައެވެ.
މިދިޔަ ޖޫން މަހުގެ ތެރޭގައި ވެސް ރާއްޖޭގެ އެކި ކަންކޮޅުތަކަށް މޫސުން ގޯސްވެ ވިއްސާރަ ކުރުމުގެ ސަބަބުން ބައެއް ރަށްރަށު ގައި ވަނީ ފެންބޮޑުވެފައެވެ. އަދި އުދަ އެރުމުގެ ސަަބަބުން ބައެއް ރަށްތަކަށް ވަނީ ބޮޑެތި ގެއްލުންތަކެއް ވެސް ލިބިފައެވެ.
ކަނޑުގަދަވުމުގެ ސަބަބުން ކަނޑުދަތުރު ކުރާ ފަރާތްތަކުން އެކަމަށް ސަމާލުވުމަށް މޫސުމާ ބެހޭ ޤައުމީ އިދާރާއިން އިލްތިމާސްކުރެއެވެ. އަދި ދަތުރަށް ފުރުމުގެ ކުރިން މޫސުމާ ގުޅުންހުރި އެންމެ ފަހުގެ މައުލޫމާތު ހޯދުމަށް ވެސް ވަނީ އިލްތިމާސްކޮށްފައެވެ.
