އުރީދޫ ކަލަރ ރަން އަޕްގްރޭޑްކޮށް، "އުރީދޫ ފަން ރަން" އިއުލާނުކޮށްފި!
25 އޯގަސްޓު 2022 | ބުރާސްފަތި 17:39ފަން އިއުލާންކޮށްފައިވަނީ މީސް މީޑިއާގައި އުރީދޫއިން ޕޯސްޓްކުރި ކުލަގަދަ ވީޑިއޯއަކުން
އުރީދޫ ފަން ރަން
ތަފަތު މަޖާ މާހައުލެއްގައި ގެނެސްދިން އުރީދޫ ކަލަރ ރަން އްޕްގްރޭޑްކޮށް، އުރީދޫ ފަން ރަން އިއުލާންކޮށްފިއެވެ.
މި އަހަރުގެ ޑިސެމްބަރު މަހުގެ 23 ވަނަ ދުވަހު ބޭއްވުމަށް ހަމަޖެހިފައިވާ އުރީދޫ ފަން ރަން އިއުލާންކޮށްފައިވަނީ މީސް މީޑިއާގައި އުރީދޫއިން ޕޯސްޓްކުރި ކުލަގަދަ އަދި އެހާމެ ފޯރިގަދަ ވީޑިއޯއަކާއެކުގައެވެ. އެ ރަންގައި އާ ކަންތައްތަކެއްވެސް ހިމެނޭނެކަމަށް އުރީދޫއިން ބުނެއެވެ.
މި ރަންއާ ގުޅޭގޮތުން އުރީދޫގެ މެނޭޖިންގ ޑިރެކްޓަރ އަދި ސީއީއޯ، ޚާލިދް އަލް ހަމާދީ ވިދާޅުވީ، އުރީދޫ ފަން ރަން ވެގެންދާނީ ރާއްޖޭގައި ބާއްވާ އެންމެ އުފާވެރި ދުވުމަށް ކަމަށެވެ. އަދި މި ދުވުގައި އާއިލާތަކާއި އެކި އުމުރުފުރާތަކުގެ ރަހުމަތްތެރިންނަށްވެސް ބައިވެރިވެ އުފާވެރި ވަގުތުކޮޅެއް ހޭދަކޮށްލެވޭނެކަން އޭނާ ވަނީ ފާހަގަކުރައްވާފައެވެ. މީގެ އިތުރުން ރާއްޖޭގެ ދުވުމުގެ ދާއިރާ ވަނީ ވޭތުވެދިޔަ އަހަރުތަކުގައި ވަރަށް ބޮޑަށް ކުރިއަރާފައިކަން ފާހަގަކުރައްވާ އޭނާ ވިދާޅުވީ، އުއްމީދަކީ މި ބޭއްވޭ އެންމެ އުފާވެރި ދުވުމުގައި ބައިވެރިވެ އިތުރު މީހުން ދުވުންފަދަ ހަރަކާތްތަކަށް ޝައުގުވެރިކަން އިތުރުވުން ކަމަށެވެ.
އުރީދޫ ފަން ރަންއަކީ ދުޅަހެޔޮ ދިރިއުޅުމަކަށް ދުވުމަކީ މަޖާ އަދި އުފާވެރިކަން ގެނުވައިދޭނެ ހަރަކާތެއްކަން އަންގައިދިނުމުގެ މަގުސަދުގައި ކުރިއަށްގެންދާ ހަރަކާތެއްކަމަށް އުރީދޫއިން ބުނެއެވެ. އަދި ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މި ކުރު ދުވުމަކީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށްވެސް ބައިވެރިވެވޭނެ މަޖާ އިވެންޓަކަށް ވާނެކަން އެ ކުންފުނިން ފާހަގަކުރެއެވެ. އުރީދޫ ފަން ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައާއިފެނުގެ އިތުރުން މަޖާ ހަރަކާތްތަކެއް ކުރިއަށްދާނެއެވެ. މިއީ ވަކި ވަގުތެއްގެ ތެރޭގައި ނިންމަންޖެހޭ ރޭހަކަށް ނުވާތީ، ހިނގާފައި ނުވަތަ ޖޮގްކޮށްފައި ނުވަތަ ދުވެފައި، އަދި ނަށަމުންވެސް މި ދުވުން ނިންމިދާނެއެވެ.
