ކާމިޔާބީ ހޯދުމާ އެއްގޮތަށް، ނާކާމިޔާބީއާ ކުރިމަތިލުމުގެ ސިފަ ދަރިވަރުންގައި ހުންނަންޖެހޭ: މިނިސްޓަރ
ދަރިވަރުން ނާކާމިޔާބީގައި ހިތްވަރު ދޫކޮށްނުލުން މުހިންމުކަމަށް ވިދާޅުވި
އެޑިޔުކޭޝަން މިނިސްޓަރ ޑރ. އާއިޝަތު އަލީ - މަތީ އަރުތަވެރިންގެ އިނާމު ދިނުމުގެ ޖަލްސާގައި ވާހަކަފުޅުދައްކަވަނީ
ކާމިޔާބީ ހޯދުމާ އެއްގޮތަށް، ނާކާމިޔާބީއާ ކުރިމަތިލުމުގެ ސިފަ ދަރިވަރުންގެ ކިބައިގައި ހުންނަންޖެހޭކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.
މަތީ އަރުތަވެރިންނަށް އިނާމު ދިނުމުގެ ޖަލްސާގައި ވާހަކަފުޅުދައްކަވަމުން މިނިސްޓަރ ވަނީ، ސާނަވީ ތައުލީމުގެ މަރުހަލާއަށްފަހު ދަރިވަރުންނާ އެންމެ ގިނައިން ކުރާ ސުވާލަކީ އެ ދަރިވަރުން ކުރިއަށްދާން ބޭނުންވަނީ ކޮން ދާއިރާއަކުންތޯ ކުރާ ސުވާލުކަމަށެވެ. އެހެންނަމަވެސް އެކަމަނާ ދަރިވަރުންނާ ކުރައްވަން ބޭނުންފުޅުވާ ސުވާލަކީ، ދަރިވަރުން ބޭނުންވާ ދާއިރާއަކުން ކުރިއަށް ނުދެވިއްޖެނަމަ ނުވަތަ ނާކާމިޔާބީއާ ކުރިމަތިވެއްޖެނަމަ އަމަލުކުރާނީ ކިހިނެއްތޯ ކަމަށްވެސް މިނިސްޓަރ ވިދާޅުވިއެވެ. އެފަދަ ހާލަތެއް އަތުވެއްޖެނަަމަ މާޔޫސްވެ ހިތްވަރު ބަލިކުރުމުގެ ބަދަލުގައި ނާކާމިޔާބީއާ ކެރިގެން ކުރިމަތިލާ ބަޔަކަށް ދަރިވަރުން ވާންޖެހޭ ކަމަށްވެސް މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން، ދަރިވަރުންގެ ކާމިޔާބުގެ ފަހަތުގައި އެތައް ބައެއްގެ މަސައްކަތް ވާކަން ފާހަގަކުރައްވައި މިނިސްޓަރ ވަނީ، އެ ފަރާތްތަކަށްވެސް ތަހުނިޔާ ވިދާޅުވެފައެވެ. އެ ދަރިވަރުންގެ ކާމިޔާބާމެދު މުޅި ގައުމު ފަޚުރުވެރިވާކަން މިނިސްޓަރ ވަނީ ފާހަގަކުރައްވާފައެވެ. އެހެންނަމަވެސް ސާނަމީ ތައުލީމަކީ ތައުލީމީ ފުރަތަމަ ހަރުފަތްކަމަށާއި، މަތީ ތައުލީމާއި ފަންނީ ހުނަރުތައް ދަސްކުރާ ބަޔަކަށް އެ ދަރިވަރުން ވުމަށް މިނިސްޓަރ ވަނީ އިލްތިމާސްކުރައްވާފައެވެ.
