ޠާލިބާނުން ފިއްތާލި އަންހެނުންގެ ޙައްޤުތަކާއެކު މުއްސަނދި ކުތުބުޚާނާއެއް!
25 އޯގަސްޓު 2022 | ބުރާސްފަތި 08:57ފުރާވަރު އުމުރުގެ ގިނަ އަދަދެއްގެ އަންހެން ކުދިން މިއަދު ވަންނާނެ ކުލާހެއް ނެތް، ވަޒީފާގެ މައިދާނުން ގިނަ އަދަދެއްގެ އަންހެނުން ވަނީ ބޭރުކޮށްލާފައި
ކުތުބުޚާނާ ހުޅުވާފައި ވަނީ އަންހެނުންނަށް ހާއްސަކޮށްގެން ގިނަ އަދެއްގެ މުދާ ވިއްކާ ޝޮޕިންގް މޯލްއެއްގެ ގޮޅިއެއް ކުއްޔަށް ނަގައިގެން
ހަރުކަށި ފިކުރުގައި ހައްދުފަހަނައަޅާފައިވާ ހަތިޔާރުއެޅި ހަނގުރާމަވެރި ޠާލިބާން ޖަމާއަތުން އަފްޣާނިސްތާނުގެ ކޮންޓްރޯލް ނެގިތާ އަހަރެއް ފުރިފައި ވާ އިރު، މުޖުތަމައުގެ އެކި ބަހާތަކުން އެކަހެރި ކުރެވެމުންދާ އެއްބަޔަކީ އަންހެނުންނެވެ. އެކަން އެގޮތަށް ނުހިނގާނެ ކަމަށް ވަޢުދުވަމުން އަފްޣާނިސްތާނުގެ ވެރިކަމާ ޙަވާލުވިއެއްކަމަކު، މުޖުތަމައެއްގެ ފެންވަރުގައި އަންހެނުންނަށް ލިބިދޭން ޖެހޭ އެތައް ޙައްޤަކުން މަޚްރޫމުކޮށް، ބާކީ ކުރަމުން ދާ މަންޒަރަކީ މިއަދު އަފްޣާނިސްތާނުގައި އާންމު މަންޒަރެކެވެ.
ކުރިމަތިލާން ޖެހޭ އެކަނިވެރިކަމާއި، ކުރެވޭ ބާކީ ކަމުގެ އިހުސާސުން ތަސައްލީއެއް ހޯދާދިނުމުގެ މަޤުޞަދުގައި، އަންހެނުންގެ ޙައްޤުތަކަށް ވަކާލާތު ކުރާ އެކްޓިވިސްޓުން ވަނީ، ވެރިރަށް ކާބުލްގައި އަންހެނުންނަށް ހާއްސަކޮށްގެން ކުތުބުޚާނާއެއް ހުޅުވާފައެވެ.
ޢާއިލީ ގޮތުން ގުޅުން އޮންނަ ފިރިހެނަކާ ނުލާ މަގުމައްޗަށް ނުކުމެ އުޅުން މަނާކޮށްފައި އޮންނަ އަފްޣާނިސްތާނުގައި، އެވަރަށްވެސް އަންހެނުންނަށް ނުކުމެ އުޅެވެނީ މޫނު ނިވާ ވާ ގޮތަށް ނިގާބު އަޅައިގެންނެވެ. ނަމަވެސް، ތަރައްޤީވެފައިވާ ބައެއް ސަރަހައްދުތަކުގައި އެ އަމުރުތަކަށް އެންމެ ފުރިހަމައަށް ކިޔަމަން ނުވާ އަންހެނުންވެސް ހިސާބަކަށް އުޅެއެވެ.
މުޅި އަފްޣާނިސްތާނަށް ޖުމުލަ ގޮތެއްގައި ބަލާއިރު، ސާނަވީ އުމުރުގެ އަންހެން ކުދިންނަށް ތައުލީމު ހާސިލު ކުރާނެ މާ ތަނަވަސް ފުރުޞަތުތަކެއް މިއަދަކު ނެތެވެ. ޠާލިބާނުން ވީ ވައުދު އޮތީ އޮތް ތަނުގައެވެ. އަންހެން ކުދިންނަށް ތައުލީމު ދޭ ތަންތަން މަރޗް މަހު ހުޅުވާނެ ކަމަށް ބުނި ނަމަވެސް، އެކަން ކޮށްފައެއް ނުވެއެވެ.
ކުތުބުޚާނާ ހުޅުވީ މިފަދަ އެތައް ކަމަކަށް ގޮންޖެހުމުގެ ގޮތުން ކަން، އެ ކުތުބުޚާނާގެ ބާނީންގެ ތެރޭގައި ހިމެނޭ ލައިލާ ބަސީމްގެ ވާހަކަތަކުން ދޭހަ ކޮށްދެއެވެ.
ކުތުބުޚާނާގެ ކަންކަމާ ގުޅިގެން ޠާލިބާނުންގެ ބަހެއް އަދި ލިބިފައި ނުވާ ކަމަށް ރޮއިޓަރޒްއިން ވަނީ ރިޕޯރޓްކޮށްފައެވެ.
1000 އަށް ވުރެ ގިނަ ފޮތާއެކު ކާބުލްގައި ހުޅުވި ކުތުބުޚާނާގައި ގިނަ އަދަދަކަށް ވާހަކަ ފޮތުގެ އިތުރުން، ތަސްވީރު އެކުލެވޭ ފޮތްތައްވެސް ހިމެނެއެވެ. އޭގެ އިތުރުން ސިޔާސީ، އިޤްތިޞާދީ އަދި ސައެންސްގެ ދާއިރާގެ މައުލޫތަކަށް ހާއްސަ ފޮތްތައްވެސް އެ ކުތުބުޚާނާގައި އެބަހުއްޓެވެ. ގިން ފޮތްތަކަކީ ކުތުބުޚާނާ ހުޅުވުމުގެ މަސައްކަތަށް އެހީތެރިކަން ފޯރުކޮށްދިން، އަފްޣާން އަންހެނުންގެ ޙައްޤުތަކަށް މަސައްކަތް ކުރާ ކްރިސްޓަން ބައްޔާތު ފައުންޑޭޝަނަށް، ޓީޗަރުންނާއި ޅެންވެރިންގެ އިތުރުން މުސައްނިފުން ހަދިޔާ ކޮށްފައިވާ ފޮތްފޮތެވެ.
ކުތުބުޚާނާ ހުޅުވާފައި ވަނީ އަންހެނުންނަށް ހާއްސަކޮށްގެން ގިނަ އަދެއްގެ މުދާ ވިއްކާ ޝޮޕިންގް މޯލްއެއްގެ ގޮޅިއެއް ކުއްޔަށް ނަގައިގެން ކަމަށް ވާ އިރު، ފާއިތުވީ ދުވަސްތަކުގައި، އަންހެނުންގެ ޙައްޤުތަކަށް ގޮވާލާ، އަފްޣާނިސްތާނުގެ އެކި ހިސާބުތަކުގައި ކުރިއަށް ގެންދިޔަ މުޒާހަރާތަކުގެ ބައިވެރިންގެ ދީލަތި އެހީވެސް ލިބިފައިވެއެވެ.
ފުރާވަރު އުމުރުގެ އަންހެން ކުދިންނަށް ތައުލީމު ކަށަވަރު ކޮށްދޭނެ ކަމަށް ބުނެ، ޠާލިބާނުން ވީ ވައުދުގައި ކޮޅުފައިން ޖެހީ މަރޗް މަހުގެ ތެރޭގައެވެ. ފުރާވަރު އުމުރުގެ ގިނަ އަދަދެއްގެ އަންހެން ކުދިން މިއަދު ވަންނާނެ ކުލާހެއް ނެތެވެ. ވަޒީފާގެ މައިދާނުން ގިނަ އަދަދެއްގެ އަންހެނުން ވަނީ ބޭރުކޮށްލާފައެވެ. ސަބަބެއް ކަމަށް ވަނީ އަންހެނުންގެ މިނިވަން ކަމަށް އެކި ކަހަލަ ހުރަސްތައް ހުރުމާއި، އަފްޣާނިސްތާނުގެ އިޤްތިޞާދީ ކާރިސާކަމަށް، ތަރައްޤީއަށް މަސައްކަތް ކުރާ ބައިނަލްއަގުވާމީ އޭޖެންސީތަކުން ބުނެއެވެ.
ޠާލިބާނުން ބުނާ ގޮތުގައި އަންހެނުންގެ ޙައްޤުތަކަށް އެ ޖަމާއަތުން އިހުތިރާމް ކުރެއެވެ. އަދި އެކަން އޮންނާނީ އިސްލާމީ ޤާނޫނުގެ އިމުގެ ތެރޭގައި ކަމަށްވެސް ވަކާލާތު ކުރެއެވެ. އަދި ފުރާވަރު އުމުރުގެ އަންހެން ކުދިންގެ ހައި ސްކޫލްތައް ހުޅުވުމަށް މަސައްކަތް ކުރަމުން ދާ ކަމަށްވެސް އެ ޖަމާއަތުން ބުނެއެވެ.
އާންމު ދިރިއުޅުމުގެ އިޖުތިމާއީ އެކި ބަހާތަކުން އަންހެނުން އެކަހެރި ކުރަމުންދާ މައްސަލާގައި، ހުޅަނގުގެ ސަރުކާރުން ދަނީ ޠާލިބާނުންގެ އަމަލުތައް ކުށްވެރި ކުރަމުންނެވެ.
އަފްޣާނިސްތާނުގެ އަންހެނުންގެ އާބާދީއަށް ބަލާލި ކަމުގައި ވީ ނަމަވެސް، ގިނަ ބަޔަކު މިއަދު ތިބީ ޠާލިބާނުންގެ އަމަލުތަކާ މެދު ހިތްހަމަނުޖެހިފައެވެ. ގޮވާލަމުން ދަނީ އަންހެނުންގެ ޙައްޤުތަކަށް އިހުތިރާމް ކުރުމަށެވެ.
