ޠާލިބާނުން އަފްޣާނިސްތާނުގައި ދިން ޙަމަލާއެއްގައި 12 މީހުން މަރުވެއްޖެ

ޠާލިބާން ހަނގުރާމަވެރިން ދިން ޙަމަލާއެއްގައި އަފްޣާނިސްތާނުގައި 12 މީހުން މަރުވެއްޖެ އެވެ.

އަފްޣާނިސްތާން ސަރުކާރުގެ އިސް މަސްއޫލުވެރިންނާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓުކުރާ ގޮތުގައި، ގޮވާޒާތުގެ ތަކެތި ހަށިގަނޑުގައި ހަރުކޮށްގެން ސައިކަލެއްގައި އައި މީހަކު މި ޙަމަލާދީފައި ވަނީ އުތުރު ކުންދޫޒް ސިޓީގެ ކާރު ބާރު ބޮޑު ބާޒާރު މަތީ ޞަރަހައްދަކަށެވެ.

ނިރުބަވެރި ޙަަމަލާއެއްގެ ގޮތުގައި އަފްޣާނިސްތާނުގެ ސަލާމަތީ ބާރުތަކުން ސިފަކުރާ މިޙަމަލާގައި މަރުވީ މީހުންގެ ތެރޭގައި ފުލުހަކާއި ޢާންމުންގެ މީހަކުވެސް ހިމެނެއެވެ. އަދި މި ޙަމަލާގައި އިތުރު 18 މީހުން ޒަޚަމްވެފައިވާ ކަމަށްވެސް އަފްޣާނިސްތާނު ސިފައިންނާއި ޙަވާލާދީ ރިޕޯޓުކޮށްފައި ވެއެވެ.

ކުންދޫޒުގެ ޞަރަޙައްދީ ސަރުކާރުގެ ތަރުޖަމާނު މުރާދީ ވިދާޅުވެފައިވަނީ މިއީ ޠާލިބާނުން ދިން ނިރުބަވެރި ހަމަލާއެއް ކަމަށާއި މިޙަމަލާގެ ޒިންމާ ހަނގުރާމަވެރިން އުފުލަން ޖެހޭނެ ކަމަށެވެ.

އަންގާރަ ދުވަހުގެ ޙަމަލާއާއި ގުޅިގެން އަފްޣާނިސްތާނުގެ ސަލާމަތީ ބާރުތަކުން ވަނީ ޠާލިބާނުންނާއި ކުރިމަތިލާ ޙަމަލާތަކެއް ބަދަލުކޮށްފަ އެވެ. މިޙަމަލާތަކުގައި ހަނގުރާމަވެރިން 10 މީހުން މަރުވެ 15 މީހުން ޒަޚަމްވި ކަމަށް މުރާދީ ވިދާޅުވި އެވެ. އަދި އަފްޣާނިސްތާނުގެ ސިފައިންގެ 5 އޮފިސަރުންނާއި މަދަނީންގެ 3 މީހުން މި ޙަމަލާ ބަދަލުކުރުންތަކުގައި ޒަޚަމްވި ކަމަށްވެސް މުރާދީ ވިދާޅުވި އެވެ.

މި ކުރިމަތިލުންތައް ވަރުގަދަވެ، މިހާރު ކުންދޫޒުގެ ބޭރުން ރަށްފުށުގެ އަވަށްތަކެއް ކަމަށްވާ ތަލޯވްލާއައި ޕުލީ ސާފިދުގައިވެސް ހަނގުރާމަވެރިންނާއި، ސިފައިން ދަނީ ވަރުގަދައަށް ޙަމަލާ ބަދަލުކުރަމުންނެވެ. އަފްޣާނިސްތާނު ސިފައިން ބުނާ ގޮތުގައި މިހާރު ހަނގުރާމަވެރިން ވަނީ ބިރުން ފިލަން ފަށާފައެވެ.

އަންގާރަ ދުވަހުގެ ޙަމަލާއާއި ކުރިމަތިލުންތަކާއި ބެހޭ ގޮތުން ޠާލިބާން ޖަމާޢަތުން އަދި އެއްވެސް އެއްޗެއް ރަސްމީ ސިފައެއްގައި ބުނެފައެއް ނުވެއެވެ.