ފްރެންޗް އޯޕަން ޓެނިސް މުބާރާތުގެ ފިރިހެން ސިންގަލްސް ސެމީ ފައިނަލް މެޗުގެ ތެރެއިން ފައިގެ ކުޑަހުޅަށް ލިބުނު އަނިޔާ އިން އެއްކޮށް ރަނގަޅު ނުވާތީ، ކުރިއަށް އޮތް ޔޫއެސް އޯޕަންގައި ވާދަނުކުރަން ކަމަށް އަލެކްސަންޑާ ޒެވްރެވް ނިންމައިފިއެވެ.
ޔޫއެސް އޯޕަން ގައި ބައިވެރިނުވާނެ ކަން ޒެވްރެވް ވަނީ ހޯމަ ދުވަހު ހާމަކޮށްފައެވެ. ފްރެންޗް އޯޕަންގައި ލިބުނު އަނިޔާއަށްފަހު އޭރު އޭނާ ބުނީ ފަޔަށް ލިބުނީ ސީރިއަސް އަނިޔާއެއް ކަމަށެވެ. އޭރު އޭނާ ވަނީ ޑަކްޓަރުން ބަލަމުންދާ ކަންކަން ބަލައި ނިމުމުން، އިތުރު މައުލޫމާތު ސަޕޯޓަރުންނަށް ހިއްސާ ކުރާނެ ކަމަށް ވެސް ބުނެފައެވެ.
ޒެވްރެވް އޭނާގެ އިންސްޓަގްރާމްގައި ކުރި ޕޯސްޓެއްގައި ބުނީ އޭނާގެ ރިކަވަރީ ކުރިއަށް ދަނީ ރަނގަަޅަށް ކަމަށާއި، ރިކަވަރީއާ މެދު އުފާވާ ކަމަށެވެ. މީގެ އިތުރުން އޭނާ ބުނީ ރިކަވަރީގެ ކަންކަން ކުރިއަށްދާތީ، އިތުރު ރިސްކެއް ނަގަން ބޭނުންނުވާ ކަމަށެވެ. އަދި ޔޫއެސް އޯޕަންގައި ބައިވެރިނުވުމަށް ނިންމި ނިންމުމަކީ، ވަރަށް އުނދަގޫ ނިންމުމެއް ކަމަށް ވެސް އޭނާ ވަނީ ބުނެފައެވެ.
އޭޓީޕީގެ ރޭންކިން ދައްކާ ގޮތުން ޒެވްރެވް އަކީ ދުނިޔޭގެ ރޭންކިންގެ ދެ ވަނަ ކުޅުންތެރިޔާއެވެ. އެއް ވަނައިގައި އޮތީ ރަޝިޔާގެ ޑަނީލް މެޑްވެޑޭލްއެވެ. ފްރެންޗް އޯޕަން ކާމިޔާބުކުރި ސްޕެއިންގެ ރަފައެލް ނަޑާލާ އޮތީ ތިން ވަނައިގައެވެ.
