ރައީސް އަމީންގެ ވެރިކަން ނިމުނު ގޮތާއި ލިބުނު އަނިޔާތައް ސާފުކުރަން ފޯކަސް ގްރޫޕް ޑިސްކަޝަންއެއް ބާއްވަނީ
24 އޯގަސްޓު 2022 | ބުދަ 02:04ފޯކަސް ގްރޫޕް ޑިސްކަޝަން މި މަހުގެ 29 ވަނަ ދުވަހު އޮންނާނެ
ރާއްޖޭގެ ފުރަތަމަ ރައީސް މުހައްމަދު އަމީން ދޮށިމޭނާ ކިލެގެފާނު
ރާއްޖޭގެ ފުރަތަމަ ރައީސް މުހައްމަދު އަމީން ދޮށިމޭނާ ކިލެގެފާނުގެ ވެރިކަން 1953 ވަނަ އަހަރު ނިމިގެން ދިޔަ ގޮތާއި އޭގެ ފަހުން ހިނގި ސިޔާސީ ހަމަނުޖެހުންތަކެއްގައި އެމަނިކުފާނަށް އަނިޔާ ދިން މީހުންގެ މައްސަލާގައި ކަންކަން ހިނގާފައި އޮތް ގޮތް ސާފު ކުރުމަށް ފޯކަސް ގްރޫޕް ޑިސްކަޝަނެއް ބޭއްވުމަށް ނިންމައިފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި އަންގާރަ ދުވަހުގެ ރޭ ވާހަކަފުޅު ދައްކަވަމުން އޮމްބަޑްސްޕާސަން މަރިޔަމް ލައިޒާ ވިދާޅުވީ ވެރިކަން ބަދަލުވެގެން އައި ގޮތާއި ރައީސް އަމީނާމެދު ކަންތައްތައް ވެގެން އައި ގޮތް ބެލުމަށް ދީނީ މީހުންނާއި ތާރީޚީ މީހުންނާއި ދިރާސާ ކުރާ މީހުންނާއި ފޮތް ލިޔާ މީހުން ހިމެނޭހެން ފޯކަސް ގްރޫޕް ޑިސްކަޝަނެއް ކުރިއަށް ގެންދިޔުމަށް ނިންމާފައިވާ ކަމަށެވެ.
ފޯކަސް ގްރޫޕް ޑިސްކަޝަން ކުރިއަށްދާނީ އެއް ދުވަހުގެ ސެޝަނެއް ގޮތަށް ކަމަށާއި ފަސް ގަޑިއިރަށް ޝެޝަން ކުރިއަށްދާނެ ކަމަށް ލައިޒާ ވިދާޅުވިއެވެ. އަދި މި މަހުގެ 29 ވަނަ ދުވަހު މި ހަރަކާތް ކުރިއަށްދާނެއެވެ. ރަސްމީ ސިފައެއްގައި މި ހާދިސާއާ ގުޅޭ އެއްވެސް މައުލޫމާތެއް އަދި ލިބިފައިނުވާ ކަމަށް ލައިޒާ ވިދާޅުވިއެވެ.
އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން ބުނީ ދިވެހިރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް އަލްމަރްޙޫމް ސުމުއްވުލް އަމީރު މުޙައްމަދު އަމީން ދޮށިމޭނާ ކިލޭގެފާނުގެ ވެރިކަން ނިމުނުގޮތް ސާފުނުވާތީ އާއި، އެމަނިކުފާނުގެ މައްޗަށް ކުރެވުނު ދަޢުވާގެ ސީޣާ ސާފުވެފައިނެތް ކަމަށެވެ. އަދި ކުރެވުނު ޝަރީއަތުގެ ޞައްޙަ މަޢުލޫމާތު ލިބިފައިނުވާތީއާއި، އެމަނިކުފާނަށް ކުރެއްވިކަމަށް ބުނާ އަނިޔާތަކަކީ ކޮބައިކަމާއި، އަނިޔާކުރި ފަރާތްތަކާއި، އެފަރާތްތަކާމެދު އެއްވެސް ޝަރީޢަތެއް ކުރެވުނުކަން ސާފުވެފައިނުވާ ކަމަށެވެ.
އެ އޮފީހުން ބުނީ މި މައްސަލަ ތަހުޤީޤު ކުރަމުންދަނީ އިންތިޤާލީ އިންސާފުގެ ޤާނޫނުގެ ދަށުން މިކަންކަމުގެ ޙަޤީޤަތް ހޯދައިދިނުމަށާއި، މިކަންކަން ހިންގާފައިވަނީ ދައުލަތުގެ މުއައްސަސަތަކާއި މުއައްސަސާތަކުގެ އިސް ހިންގުންތެރިން ނިޒާމީ ސިފައެއްގައި ރާވައިގެންކަމަށް ބުނެ ހުށަހަޅާފައިވާ މައްސަލައަކާއި ގުޅިގެން ކަމަށެވެ.
މިއީ ގިނަ ދުވަސްވީ ޙާދިސާއަކަށްވެފައި މައްސަލައާގުޅޭ މަޢުލޫމާތު ހޯދުމަށް ދަތިތަކާއި ކުރިމަތިވާ ކަމަށް އެ އޮފީހުން ވަނީ ފާހަގަކޮށްފައެވެ.
