މުސާރަ ނުލިބިގެން މުޒާހަރާ ކުރި ބިދޭސީ މަސައްކަތްތެރިންތަކެއް ޤަތަރުން ޑީޕޯޓްކޮށްލައިފި
60 ވަރަކަށް ބިދޭސީ މުވައްޒަފުން މުޒާހަރާ ކުރި
ޤަތަރު
މުސާރަ ނުލިބިގެން މުޒާހަރާ ކުރި ބިދޭސީ މަސައްކަތްތެރިންތަކެއް ޤަތަރުން ޑީޕޯޓްކޮށްލައިފިއެވެ.
އޮގަސްޓް 14 ވަނަ ދުވަހު ދޯހާގައި ހުންނަ އަލްބަންޑާރީ އިންޓަރނޭޝަލް އޮފީހުގެ ބޭރުގައި 60 ވަރަކަށް ބިދޭސީ މުވައްޒަފުން ވަނީ މުޒާހަރާކޮށްފައެވެ. އަދި އޭގެތެރެއިން ބައެއް މީހުންނަށް ހަތް މަސް ދުވަހުގެ މުސާރަ ވެސް ނުލިބޭ ކަމަށް ބީބީސީން ވަނީ ރިޕޯޓްކޮށްފައެވެ.
ބައެއް މަސައްކަތްތެރިން ޑީޕޯޓްކޮށްލާފައިވާއިރު އެއްބައި މަސައްކަތްތެރިން ވަނީ ޤަތަރުގައި ބަހައްޓާފައެވެ. އެހެންނަމަވެސް ޑީޕޯޓްކޮށްފައިވަނީ ކިހާ އަދަދެއްގެ މުވައްޒަފުން ކަމެއް ހާމައެއް ނުކުރެއެވެ.
އެ ޤައުމުގެ ސަރުކާރުން ބުނެފައިވަނީ ބައެއް މަސައްކަތްތެރިން ޑީޕޯޓްކޮށްފައިވަނީ ޤާނޫނާއި ޚިލާފުވުމުން ކަމަށެވެ.
އަލްބަންޑާރީ އިންޓަރނޭޝަލް ކުންފުންޏަކީ އިންޖީނިއަރިންގ އާއި ކޮންސްޓްރަކްޝަންގެ މަސައްކަތް ކުރާ ކުންފުންޏެކެވެ. މި މުވައްޒަފުންނަކީ ވާރލްޑް ކަޕްގެ ތައްޔާރީތަކުގައި އުޅުނު މުވައްޒަފުންކަމެއް ސާފެއް ނުވެއެވެ.
ޤަތަރުގެ ސަރުކާރުން ބުނެފައިވަނީ މިހާތަނަށް އެ މުވައްޒަފުންނަށް ނުލިބި ހުރި މުސާރަ އާއި އިނާޔަތްތައް ސަރުކާރުން ދޭނެ ކަމަށެވެ. އަދި އެ ކުންފުނީގެ މުސާރައިގެ މައްސަލަ ބަލަމުންދާ ކަމަށެވެ.
