ކުޑަކުދިންގެ ކަރާމާތަށް އުނިކަން އަންނަފަދަ ވީޑިއޯ ނުފެތުރުމަށް އެދިއްޖެ
23 އޯގަސްޓު 2022 | އަންގާރަ 18:19ދަރިވަރަކަށް އަނިޔާކުރާ މަންޒަރު ފެންނަ ވީޑިއޯއެއް ވަނީ އާންމުވެފައި
މޯލްޑިވްސް ޕޮލިސް ސަރވިސްގެ ހެޑް ކުއާޓަރ، ޝަހީދު ހުސައިން އާދަމް ބިލްޑިންގ
ދަރިވަރަކަށް އަނިޔާކުރާ މަންޒަރު ފެންނަ ވީޑިއޯއެއް އާންމުފައިވާތީ، މި ވީޑިއޯ ނުފެތުރުމަށް، ދިވެހި ފުލުހުންގެ ޚިދުމަތާއި ޖެންޑަރ މިނިސްޓްރީން އެދިއްޖެއެވެ.
އާންމުވެގެން އުޅޭ ވީޑިއޯގައި ފެންނަނީ، ގޮނޑިއެއްގައި އިން ކުއްޖެއްގެ އަތުގައި އޮތް ފޮތެއް އެހެން ކުއްޖަކު އަތުލަން އުޅޭތަނެވެ. އަދި އޭގެފަހުން އިށީނދެ އިން ކުއްޖާގެ ގައިގައި ފޮތާއި ދަބަހުން ތަޅައިގަންނަ މަންޒަރު ފެނެއެވެ.
މިވީޑިއޯ ސޯޝަލް މީޑިޔާގައި ވައިރަލްވެފައިވާއިރު ފުލުހުން ބުނީ، ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ 33 ވަނަ މާއްދާގައި، ކުޑަކުދިންގެ ކަރާމާތަށް އުނިކަމެއް އަންނާނެ ފަދަގޮތަކަށް އެކުދިންގެ ޒާތީ މައުލޫމާތު ނުވަތަ ތަސްވީރު އެއްވެސް ފަރާތަކުން އާންމުކޮށްގެން ނުވާނެކަމަށް ބަޔާންކޮށްފައިވާ ކަމަށެވެ. އެހެންކަމުން ސްކޫލެއްގެ ކްލާސްރޫމެއްގައި ދަރިވަރުންތަކެއް މާރާމާރީ ހިންގާ ވީޑިއޯއެއް ދައުރުކުރަމުން ދާތީ، މިއީ ކުޑަކުދިންގެ ކަރާމާތަށް އުނިކަން އަންނާނެފަދަ ކަމަކަށް ވާތީ، އެއްވެސް މީޑިއާއަކުން ނުވަތަ އެއްވެސް މީހަކު އެއްވެސް ގޮތަކަށް މި ވީޑިއޯ ދައުރުނުކުރުމަށް އިލްތިމާސްކުރާކަމަށެވެ.
ކުޑަކުއްޖަކަށް އަނިޔާކުރާ ވީޑިއޯގެ މައްސަލަ އެޑިޔުކޭޝަން މިނިސްޓްރީން އަންނަނީ ބަލަމުންނެވެ.
