އިޓާލިއަން ލީގުގައި ޔުވެންޓަސް ކުޅުނު ދެވަނަ މެޗުގައި ޕޮއިންޓަކުން ފުއްދާލަން ޖެހިއްޖެއެވެ.
މުބާރާތުގެ ދެވަނަ މެޗުގައި ޔުވެންޓަސް ނުކުތީ ސެމްޕްޑޯރިއާ އާއި ދެކޮޅަށެވެ. މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
މެޗުގައި ލަނޑު ޖަހާނެ އެންމެ ރަނގަޅު ފުރުސަތެއް ލިބުނީ ސެމްޕްޑޯރިއާގެ މެހްޑި ލެރީސްއަށެވެ. މުޅިން ހުސްކޮށް ހުރެފައި އޭނާ ފޮނުވާލި ބޯޅަ ޔުވެންޓަސްގެ ކީޕަރުގެ ގައިގައި ޖެހިފައި އަމާޒުވީ ގޯލުގެ ހުރަސް ދަނޑިއަށެވެ. އޭގެ ފަހުން ޔުވެންޓަސްގެ ހުއާން ކުއަޑްރާޑޯ ފޮނުވާލި ބާރު ހަމަލާ ސެމްޕްޑޯރިއާގެ ކީޕަރު ވަނީ ދިފާއުކޮށްފައެވެ. ލަނޑު ނުޖެހުނު ނަމަވެސް ދެޓީމަށްވެސް ވަނީ ނަތީޖާ ނެރުމަށް ރަނގަޅު ފުރުސަތުތަކެއް ލިބިފައެވެ.
މި ނަތީޖާއާއި އެކު ޔުވެންޓަސް އޮތީ ތާވަލުގެ ހަތަރުވަނައި ގައެވެ. ފުރަތަމަ މެޗުން މޮޅުވެ، ދެވަނަ މެޗުން އެއްވަރުވުމުން ޔުވެންޓަސްއަށް ލިބެނީ ހަތަރު ޕޮއިންޓެވެ. ކުޅުނު ދެމެޗުވެސް ކާމިޔާބުކޮށްގެން ހަ ޕޮއިންޓާއި އެކު ތާވަލުގެ އެއްވަނައިގައި އޮތީ ނަޕޯލީއެވެ. ދެވަނައިގައި އޮތް އިންޓަ މިލާންއާއި ތިންވަނައިގައި އޮތް އޭއެސް ރޯމާއަށްވެސް ލިބެނީ ހަޕޮއިންޓެވެ. އެއް މެޗުން މޮޅުވެ، އަނެއް މެޗުން އެއްވަރުވުމުން ސެމްޕްޑޯރިއާ އޮތީ ތާވަލުގެ 16 ވަނައިގައެވެ.
