އިންސްޓްރަކްޓަރ ޑިވެލޮޕްމަންޓް ކޯހުގެ ފުރަތަމަ ބެޗް 41 ބައިވެރިން ނިންމައިފި
22 އޯގަސްޓު 2022 | ހޯމަ 13:42ވަޒީފާ ނެތިފައިވާ ފަރާތްތަކާއި، އަމިއްލަ މަސައްކަތްކުރާ ފަރާތްތަކަށް ހުނަރު އިތުރުކުރުމަށް މަގުފަހިކޮށްދިނުމަށް ކުރިއަށްގެންދެވޭ ޕްރޮގްރާމެއް
ޑައިވް އިންސްޓްރަކްޓަރުންގެ ކޯސް ނިމުމުގެ ރަސްމިއްޔާތު
މިނިސްޓްރީ އޮފް އިކޮނޮމިކް ޑިވެލޮޕްމަންޓުން ތަންފީޒު ކުރަމުންދާމާ އަޕްސްކިލިން އެންޑް ޓްރެއިނިންގ ޕްރޮގްރާމްގެ ދަށުން އިންސްޓްރަކްޓަރ ޑިވެލޮޕްމަންޓް ކޯސް (އައިޑީސީ)ގެ ފުރަތަމަ ބެޗް ނިންމި 41 ބައިވެރިންނަށް ޕްރޮފެޝަނަލް އެސޯސިއޭޝަން އޮފް ޑައިވިން އިންސްޓްރަކްޓަރސް (ޕަޑީ)ގެ ސެޓްފިކެޓް ހަވާލުކޮށްފިއެވެ.
މި ޕްރޮގްރާމްގެ ދަށުން މިއަދު ސެޓިފިކެޓް ހަވާލު ކުރެވިފައިވަނީ ޑައިވަރސް ލޮޖް، އޯޝަން ޖަންކީޒް، އޯޝަން ވޯރިއަރސް، ޑައިވް ޑެސްކް އަދި ޑައިވް ކްލަބްގައި ބައިވެރިވެ ކޯސް ފުރިހަމަކުރި ދަރިވަރުންނަށެވެ.
މި ރަސްމިއްޔާތު ޝަރަފުވެރިކޮށްދެއްވައި ބައިވެރިންނަށް ސެޓްފިކެޓް ހަވާލުކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއީލެވެ. މި ރަސްމިއްޔާތުގައި ޕަޑީގެ ރީޖަނަލް މެނޭޖަރ މެޓް ވެންގަރއާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ޑައިވް ސެންޓަރުތަކުގެ މަންދޫބުން ބައިވެރިވެ ވަޑައިގެންނެވިއެވެ.
އަޕްސްކިލިންގ އެންޑް ޓްރެއިނިންގ ޕްރޮގްރާމަކީ ވަޒީފާ ނެތިފައިވާ ފަރާތްތަކާއި، އަމިއްލަ މަސައްކަތް ކުރާ ފަރާތްތަކަށް ހުނަރު އިތުރުކުރުމަށް މަގުފަހިކޮށް އަދި ޕްރޮފެޝަނަލް ލެވެލްގެ ވަޒީފާގެ ފުރުސަތުތައް ހޯދައިދިނުމުގެ މަގުސަދުގައި މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިސްނަގައިގެން ހިންގާ ޕްރޮގްރާމެކެވެ.
މި ޕްރޮގްރާމްގެ ދަށުން މިހާރުވެސް 150ށްވުރެ ގިނަ ދަރިވަރުން ޑައިވް މާސްޓަރ އަދި އިންސްޓްރަކްޓަރ ޑިވެލޮޕްމަންޓް ކޯސްތަކުގައި ކިޔަވަމުންދެއެވެ. އަދި މި ޕްރޮޖެކްޓްގެ ދަށުން ކުރިއަށް ގެންދާ އެހެނިހެން ތަމްރީން ޕްރޮގްރާމްތަކަށް ބަލާއިރު; އެކައުންޓިންގ، އައިސީޓީ އަދި އެޕްރެންޓިސްޝިޕް ޕްރޮގްރާމްތައް ހިމެނޭގޮތަށް ޖުމްލަ 700ށްވުރެ ގިނަ ދަރިވަރުން ބައިވެރިވެ ކިޔަވަމުންދެއެވެ. މި ޕްރޮގްރާމްތަކަކީ ސަރުކާރުން 100 އިންސައްތަ ސްޕޮންސަރ ކޮށް، އަދި ތަމްރީނުގައި ބައިވެރިވާ ކޮންމެ ފަރާތަކަށް މަހަކު 5000 ރުފިޔާގެ ސްޓައިޕެންޑް އެލަވަންސެއް ލިބޭގޮތަށް ކުރިއަށް ގެންދާ ޕްރޮގްރާމްތަކެކެވެ.
ޑައިވިންގ ދާއިރާގެ ކޯސްތަކަށް ކުރިމަތިލުމުގެ ފުރުސަތު އަދިވެސް ވަނީ ހުޅުވާލެވިފައެވެ. މި ޕްރޮގްރާމްތަކުގައި ބައިވެރިވުމަށް ޝައުގުވެރިވާ ފަރާތްތަކުން ޖޮބް ސެންޓަރ މެދުވެރިކޮށް އެޕްލިކޭޝަން ހުށަހެޅޭނެއެވެ.
