ޗައިނާގެ ޕްރޮޕަޓީ މާކެޓް މިވަގުތު ވެއްޓިފައިވާ ފުން ވަޅުގަޑުގަނޑުން އަރައިގަތުމަށް އެހީވުމަށްޓަކާ ސެންޓްރަލް ބޭންކުން މޯގޭޖް ރޭޓް ދަށްކޮށްފިއެވެ. މި ގެނެވުނު ބަދަލުގެ ދަށުން ޕީޕަލްސް ބޭންކް އޮފް ޗައިނާއިން ވަނީ ލޯން ޕްރައިމް ރޭޓު އެކެއް ޕޮއިންޓް ފަހެއް ޕަސަންޓޭޖް ޕޮއިންޓުން ދަށްކޮށްފައެވެ. ރިކޯޑްތަކުން ދައްކާ ގޮތުން މިއީ މިހާތަނަށް އެންމެ ބޮޑަށް މިރޭޓު ދައްކުރެވުނު ފަހަރެވެ.
ޗައިނާގެ އިގްތިސާދަކީ ދުނިޔޭގައި ދެވަނައަށް އެންމެ ބޮޑު އިގްތިސާދުކަމަށް ވާއިރު އެގައުމުގެ ޕްރޮޕަޓީ މާކެޓަށް މިވަގުތު ދިމާވެފައިވާ ގޮންޖެހުންތަކުގެ ސަބަބުން ބޮޑެތި ބިލްޑިންގ ޕްރޮޖެކްޓްތައް ވަނީ ހުއްޓާލަން ޖެހިފައެވެ. އަދި މިކަމުގެ ސަބަބުން ޗައިނާގެ އިގްތިސާދަށް ވަރަށް ބޮޑަށް ގެއްލުން ދައްކާފައިވެއެވެ. މީގެ އިތުރުން ޗައިނާގައި ގެނެވެމުންދާ ލޮކްޑައުންތަކާއި ޒީރޯ ކޮވިޑް ޕޮލިސީގެ ސަބަބަން ވެސް ވިޔަފާރިތަކަށާއި އަދި ޚިދުމަތް ހޯދާ ފަރާތްތަކަށް ވެސް ވަނީ ވަރަށް ބޮޑެތި ދަތިތަކާ ކުރިމަތިލާން ޖެހިފައެވެ.
ހޯމަ ދުވަހު ޕީޕަލްސް ބޭންކް އޮފް ޗައިނާއިން މޯގޭޖް ރޭޓު ދައްކުރުމާއި ގުޅިގެން ގެދޮރު ގަނެ އެފައިސާ އަނބުރާ ދައްކަމުންދާ ފަރާތްތަކަށް ވަރަށް ބޮޑަށް ލުއި ލިބިގެން ދާނެއެވެ. މިއީ އެގައުމުގެ ރިއަލް އެސްޓޭޓް އިންޑަސްޓްރީ ނެގެހެއްޓުމަށް ކުރެވެމުންދާ މަސައްކަތުގެ ދަށުން އެޅުނު ފިޔަވަޅެއް ކަމަށް އޮފިޝަލުން ވިދާޅުވެއެވެ.
ޗައިނާގެ ރިއަލް އެސްޓޭޓް ސެކްޓަރަށް މިދިޔަ އަހަރު އެއް ޓްރިލިއަން ޑޮލަރަށް ވުރެ ބޮޑު ގެއްލުން ދެއްކިކަމަށް ޚަބަރުތައް ބުނެއެވެ.
މީގެ ކުރިން ޗައިނާ ސަރުކާރުން ވަނީ އިގްތިސާދު ރަނގަޅުވާނެ ކަމަށް އަންދާޒާ ކުރެވުނު 5.5 އިންސައްތައިގެ ރޭޓު ހާސިލް ނުވެދާނެ ކަމުގެ އިޝާރާތެއްވެސް ކޮށްފައެވެ.
