އަސާސީ ޤަވާއިދަށް އިސްލާހު ގެނެސް ކޮންގްރެސް ނިންމާލައިފި
22 އޯގަސްޓު 2022 | ހޯމަ 00:25މި ފަހަރުގެ ކޮންގްރެސް ބޭއްވީ ވަރަށް ބޮޑަށް ޓެކްނޮލޮޖީ އަށް ބަރޯސާ ވެގެން
އެމްޑީޕީގެ ކޮންގްރެސް
ރާއްޖޭގެ އެންމެ ބޮޑު ސިޔާސީ ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީީގެ ކޮންގްރެސްގައި އެޕާޓީގެ އަސާސީ ޤަވާއިދަށް ހުށަހަޅާފައިވާ އިސްލާހުތައް ފާސްކޮށް، ކޮންގްރެސް ކާމިޔާބުކަމާއެކު ނިންމާލައިފިއެވެ.
މިދިޔަ ހުކުރު ދުވަހުން ފެށިގެން 3 ދުވަހުގެ މުއްދަތަށް ކުރިއަށް ގެންދިޔަ އެމްޑީޕީ 4 ވަނަ ކޮންގްރެސްގައި އަސާސީ ޤަވާއިދަށް 11 އިޞްލާހެއް ހުށަހެޅިއެވެ. އެ އިޞްލާހުތަކަށް ކޮންގްރެސްމަނުންގެ މެދުގައި މަޝްވަރާކުރުމަށްފަހު އިތުރު އިޞްލާހުތައްވެސް ހުށައެޅިއެވެ. އޭގެ ތެރެއިން ތާއީދު ލިބި ވޯޓު މަރުހަލާ އާއި ހަމައަށް 6 އިސްލާހެއް ދިޔަ އިރު އޭގެ ތެރެއިން އެއް އިސްލާހު ހުށަހެޅި ފަރާތުން އެ އިސްލާހު އަނބުރާ ގެންދިޔުމުން އެ އިސްލާހަށް ވޯޓަށް އަހާފައެއް ނުވެއެވެ.
އެމްޑީޕީގެ ކޮންގްރެސްގައި އެ ޕާޓީގެ ގޮފިތައް މިހާރުވެސް އަމަލުކުރާ އުސޫލުން ބޭއްވުމަށް އެމްޑީޕީގެ އެންމެ އިސްލީޑަރު އަދި ރައީސުލްޖުމްހޫރިއްޔާ ވަނީ އިސްލާހެއް ހުށަހަޅުއްވާފައެވެ. އެ އިޞްލާހާއި އެއްކޮޅަށް 901 މެމްބަރުންގެއަދި ދެކޮޅަށް 1 މެމްބަރަކު ވަނީ ވޯޓު ދެއްވާފައެވެ.
ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަނީ އެމްޑީޕީގެ އެތެރޭގައި ތިންކް ޓޭންކެއް އުފައްދަވަން އެމްޑީޕީގެ އިސްލާހެއް ހުށަހަޅުއްވާފައެވެ. ފިނޭންސް މިނިސްޓަރު އިބްރާހީމް އަމީރު ތާޢީދުކުރައްވާފައިވާ އެ އިސްލާހު ވެސް ވަނީ ފާސްވެފައެވެ. އެ އިސްލާހާއި އެއްކޮޅަށް 915 މީހުން ވޯޓު ދިނެވެ. އަދި އެ އިސްލާހާއި ދެކޮޅަށް 3 މީހުން ވަނީ ވޯޓު ދީފައެވެ.
މީގެ އިތުރުން އެމްޑީޕީގެ ނައިބު ރައީސުންނަކީ އެޕާޓީގެ ޤައުމީ މަޖިލީހުގެ ރުހުމާއެކު އައްޔަން ކުރާ ބަޔަކަށް ހެދުމަށް ވަނީ ހުށަހަޅާފައެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރަކު ކޮންގްރެސްގައި ހިމަނަން ކޮންގްރެސް އަށް ވަނީ ހުށަހަޅާފައެވެ. ކޮންގްރެސް އިން ވަނީ އެ އިސްލާހުތައް ވެސް ފާސްކޮށްފައެވެ.
