4 ވަނަ އެމްޑީޕީގެ ކޮންގްރެސްގެ ވޯޓުލުން ހާމަކޮށް ކުރިއަށްގެންދިއުމަށް ފާސްކޮށްފިއެވެ.

އެގޮތަށް ނިންމާފައި ވަނީ ކޮންގްރެސްގެ ވޯޓުލުން ކުރިއަށް ގެންދާނެ ގޮތަކާއި މެދު ގޮތެއް ނިންމުމަށް ނެގި ވޯޓުގައި ބައިވެރިވި 1034 މެމްބަރުންގެ ތެރެއިން 776 މެމްބަރުންގެ ވޯޓާއި އެކުގައެވެ. ހާމަކަން ބޮޑުކޮށް ކޮންގްރެސްގެ ވޯޓުލުން ކުރިއަށް ގެންދަން ނުފެންނަ ކަމަށް ނިންމީ 258 މެމްބަރުންގެ ވޯޓާއި އެކުގައެވެ. އެ ވޯޓު ނެގި ވަގުތު ކޮންގްރެސް މާލަމުގައި 1043 މެމްބަރުން ތިބި ނަމަވެސް 9 މެމްބަރުން ވޯޓުގައި ބައިވެރިވަޑައެއް ނުގަންނަވައެވެ.

ކޮންގްރެސްގެ ވޯޓުލުމުގެ މަރުހަލާ މިހާރު ފަށާފައި ވާއިރު ކޮންގްރެސް މާލަމުގައި ތިބީ 679 މެމްބަރުން ނެވެ.

މިފަހަރު ކޮންގްރެސް އަށް ހުށަހަޅާފައިވާ އެންމެ މުހިންމު ކަމަކީ ބަރުލަމާނީ ނިޒާމަށް ރާއްޖޭގެ ވެރިކަމުގެ ނިޒާމް ބަދަލުކުރުމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ހުށަހަޅުއްވާފައިވާ ގަރާރެވެ. މީގެ އިތުރުން އިދާރީ ބައެއް ހުށަހެޅުންތައް ހުށަހަޅާފައި ވާއިރު ގިނަ ކަންކަމަކީ ހިންގުމާއި ގުޅުން ހުރި ކަންކަމެވެ.

އެގޮތުން ހުށަހެޅި ހުށަހެޅުންތަކުގެ ތެރެއިން ތާއީދު ލިބިގެން ވޯޓުގެ މަރުހަލާ އާއި ހަމައަށް ގެންގޮސްފައި ވަނީ 6 އިސްލާހެވެ.