ގޮފިތައް ގަވާއިދާ ހިލާފުކަމަށް ނަޝީދު ވިދާޅުވުމުން ކޮންގްރެސްގެ މަންދޫބުން ނުރުހުންވެ އަޑުގަދަކޮށްފި
ގޮފިތައް ގަވާއިދާ ހިލާފުކަމަށް ވިދާޅުވި
ރައީސް ނަޝީދު އެމްޑީޕީ ކޮންގްރެސްގައި ވާހަކަފުޅުދައްކަވަނީ
މިހާރު ކުރިއަށްދާ އެމްޑީޕީގެ 4 ވަނަ ކޮންގްރެސްގައި ބައިވެރިވާ ގޮފިތައް ގަވާއިދާ ހިލާފުކަމަށް އެ ޕާޓީގެ ރައީސް މުހައްމަދު ނަޝީދު ވިދާޅުވުމުން، ކޮންގްރެސްގެ މަންދޫބުންގެ ނުރުހުން އެމަނިކުފާނަށް އަމާޒުވެއްޖެއެވެ.
ރައީސް ނަޝީދަށް ކޮންގްރެސްގެ މަންދޫބުންގެ ނުރުހުން އަމާޒުވެފައިވަނީ އެމްޑީޕީގެ އަސާސީ ގަވައިދަށް ގެންނަން ނިންމާފައިވާ ބައެއް އިސްލާހުތަކުގެ ތެރޭ ކޮންގްރެސްމަނުންގެ ގޮތުގައި ގޮފިތަކުގެ ރައީސުންނާއި ނައިބު ރައީސުންނަށް ބައިވެރިނުވެވޭނެ ފަދަ އިސްލާހެއް ހުށަހަޅާއި، އެ އިސްލާހާއި ގުޅޭގޮތުން ދެއްކެވި ވާހަކަފުޅާއި ގުޅިގެންނެވެ.
މި އިސްލާހުގައިވާ ގޮތުން ގޮފިތަކުގެ ރައީސުން ގެނައުމުގެ ބަދަލުގައި ދާއިރާތަކުގެ މެދުގައި ކޮންގްރެސްމަނެއް އިންތިހާބުކުރަން ޖެހޭ ގޮތަށް ވަނީ ހުށަހަޅާފައެވެ.
ރައީސް ނަޝީދު ވިދާޅުވީ ކޮންކްރެސްއަށް ވަޑައިގެން ތިއްބެވި ވަރަށް ގިނަ ގޮފިތައް ގަވާއިދާ ހިލާފަށް ހަދައިގެން އެތަނަށް ވަޑައިގެން ތިއްބެވިކަން ހުރިހާ ބޭފުޅުންނަށް ވެސް އެނގިވަޑައިގަންނަވާ ކަމަށެވެ. އެމަނިކުފާނު ހޮނިހިރު ދުވަހުވެސް އެ ވާހަކަ ދެންނެވި ކަމަށް ވިދާޅުވިއެވެ. އަދި ކޮންގްރެސްގެ މަންދޫބުން ވަނީ އެމަނިކުފާނުގެ މި ވާހަކަފުޅާއި ގުޅިގެން އަޑުގަދަކުން ފަށާފައެވެ.
މަންދޫބުންގެ އަޑު މަޑުވުމުން ރައީސް ނަޝީދުގެ ވާހަކަފުޅު ކުރިއަށް ގެންދަވަމުން ވިދާޅުވީ ހުރިހާ އެންމެންނަކީ ވެސް ޕާޓީގެ ރޫހުގައި ތިއްބަވާނެ، ޕާޓީގެ މެންބަރުން ކަމަށެވެ. އަދި ހުރިހާ އެންމެންނާއެކީގައި މި މަސައްކަތް ހިންގޭނެ ގޮތް ހައްދަވަން ޖެހޭ ކަމަށާއި، ހަމައެއާއި އެކީގައި ކޮންގްރެސްއަށް ހުށަހަޅާ ހުށަހެޅުންތަކާއި، އަދި ނިންމާ ނިންމުންތަކަކީ މެންބަރުންގެ ތެރޭގައި އެއްހަމަކުރެވިގެން އެއްގޮތްކުރެވިގެން ގެނެވޭ ނިންމުންތަކަށްވުން ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމްޑީޕީގެ ކޮންގްރެސްގައި ހައްސާސް ނޫން އެއްވެސް ކަމެއް ނޯންނާނެ ކަމަށެވެ. އަދި އަބަދުވެސް ބޭފުޅުންގެ ޖަޒުބާތުތައް އުފުލިގެންދާނެ ކަމަށާއި، އެމްޑީޕީގެ ގޮފިތައް މަސައްކަތް ނުކޮށްގެން އަދި އޭގެ ސަބަބުން އެއަށްފަހުގައި ތަފާތު ވިސްނުންތަކަށްފަހު އެ ވިސްނުން ގެނެސްފައިވާކަމަށެވެ.
އެމަނިކުފާނު ވިދާޅުވީ އެމަނިކުފާނު ދެކެވަޑައިގަންނަވާ ގޮތުގައި މާ ރީތިކޮށް މި މައްސަލައެއް ހައްލެއް ގެނެސްގެން ޑްރާފްޓެއް ގެނެވިދާނެ ކަމަށެވެ. އެހެންކަމުން ރައީސް އިބްރާހިމް މުހައްމަދު ސާލިހާއި، ޕާޓީގެ ނައިބްރައީސް، ޝިފާޒް އަދި ކޮންގްރެސްގެ މަންދޫބުން ދެއްކެވި ވާހަފުޅާއެކު ޑްރާފްޓެއް އެކުލަވާލައިގެން ކުރިއަށް ގެންދަން ހުށަހަޅުއްވާ، އެކަމަށް ހައްލެއް ގެނައުމަށް ވަނީ އެދިވަޑައިގަންނަވާފައެވެ.
