ވަޒީފާ އުފެއްދުމާ ގުޅޭގޮތުން ޔާމީނު ދެއްކެވި ވާހަކަފުޅު މަޚުލޫފު ދޮގުކުރައްވައިފި
ޔާމީން ވިދާޅުވީ، މިސަރުކާރަށް ހަތަރު އަހަރުން އުފެއްދުނީ 4000 ވަޒީފާކަމަށް
އެމްޑީޕީ ކޮންގްރެސް 2022
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސަރުކާރުން އެންމެ ބޮޑަށް އިހުމާލުވެފައިވަނީ ޒުވާނުންނަށްކަމަށް، އިދިކޮޅު ޕީޕީއެމް/ޕީއެންސީގެ ކޯލިޝަންގެ ލީޑަރ އަދި ކުރީގެ ރައީސް އަބްދުﷲ ޔާމީން ވިދާޅުވި ވާހަކައަށް ޔޫތު މިނިސްޓަރ އަހުމަދު މަޚުލޫފު ރައްދުދެއްވައިފިއެވެ.
ރައީސް ޔާމީނަށް ރިޔާސީ ޓިކެޓް އެރުވުމަށް "ހަވާލޭ ވަތަން"ގެ ނަމުގައި ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ، އެމަނިކުފާނުގެ ސަރުކާރުގައި ޒުވާނުންނަށް އިސްކަމެއްދީގެން އެއްލައްކަ ހަތަރުހާސް ވަޒީފާ އުފެއްދިކަމަށެވެ. އެހެންނަމަވެސް މިސަރުކާރަށް ހަތަރު އަހަރުން އުފެއްދުނީ 4000 ވަޒީފާ ކަމަށެވެ. ޔާމީން ވިދާޅުވީ، ރާއްޖޭގެ ހަކަތައަކީ ޒުވާނުންކަމަށެވެ. އާބަދީގެ ތިންބައިކުޅަ ދެ ބަޔަކީ ޒުވާނުންކަމަށާއި، މިސަރުކާރުން ވަނީ ޒުވާނުންނަށް އިހުމާލުވެފައިކަމަށްވެސް ޔާމީނު ވިދާޅުވިއެވެ.
އެކަމަށް ރައްދު ދެއްވައި މަޚުލޫފު ވިދާޅުވީ، ޔާމީނު ސަރުކާރުން 5 އަހަރު ތެރޭގައި އުފައްދާފައިވަނީ 17،847 ވަޒީފާކަމަށެވެ. މި ސަރުކާރު މިހާތަނަށް އައިއިރު 18،634 ވަޒީފާ އުފައްދާފައިވާކަން މިނިސްޓަރ ފާހަގަ ކުރެއްވިއެވެ.
މިއީ ތަފާސްހިސާބުތަކުން ދައްކާ ނަތީޖާކަމަށް މަޚުލޫފު ވިދާޅުވިއެވެ.
ރާއްޖޭގެ މަސައްކަތްތެރިކަމުގެ ދާއިރާއަށް މިހާރު ބޭނުންވެފައިވާ އެންމެ މުހިންމު ހަކަތައަކީ ދެ ޖިންސުގެ ދިވެހި ޒުވާނުންގެ ބައިވެރިވުން މިހާރަށްވުރެ އިތުރުކުރުންކަމުގައި ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހު ވަނީ ވިދާޅުވެފައެވެ. މިއީ މިއަދު ރާއްޖޭގެ މަސައްކަތްތެރިކަމުގެ ދާއިރާއަށް ބޭނުންވެފައިވާ އެންމެ މުހިންމު ހަކަތަ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
