ބާރ އިމްތިހާނުގައި ބައިވެރިވާން ރަޖިސްޓަރީވުމަށް ހުޅުވާލައިފި
ރަޖިސްޓްރޭޝަން ފޯމު ހުށަހެޅުމުގެ ސުންގަޑިއަކީ 20 ސެޕްޓެމްބަރު ވާ އަންގާރަ ދުވަހުގެ މެންދުރު 12:00
ވަކީލުން ހުވާކުރުމުގެ ތެރެއިން
19 ނޮވެންބަރުގައި ބޭއްވުމަށް ހަމަޖެހިފައިވާ ބާރ އިމްތިހާނުގައި ބައިވެރިވުމަށް އެދޭ ފަރާތްތަކަށް ރަޖިސްޓްރީވުމުގެ ފުރުސަތު ބާރ ކައުންސިލުން ހުޅުވާލައިފިއެވެ.
އެކައުންސިލުން ބުނީ، 25 ޖޫންގައި ބޭއްވުމަށް ތާވަލުކުރެވުނު އިމްތިހާނުގެ އެންމެހާ ކަންކަން ބާތިލުކުރެވިފައިވާތީ، ބާރ އިމްތިހާނުގައި ބައިވެރިވުމަށް އެދޭ އެންމެހާ ފަރާތްތަކުން އަލުން ރަޖިސްޓަރީވާންޖެހޭނެކަމަށެވެ. ބާރ އިމްތިހާނުގެ ރަޖިސްޓްރޭޝަން ފޯމު ހުށަހެޅުމުގެ ސުންގަޑިއަކީ 20 ސެޕްޓެމްބަރު ވާ އަންގާރަ ދުވަހުގެ މެންދުރު 12:00އެވެ.
އެ ކައުންސިލުން ބުނީ، އިމްތިހާނުގެ ފީގެގޮތުގައި ކެނޑިޑޭޓުން ދައްކަންޖެހޭނީ 6,500ރ. (ހަ ހާސް ފަސް ސަތޭކަ ރުފިޔާ) ކަމަށެވެ. އިމްތިހާނުގެ ފީ ކަނޑައެޅުމުގައި ރިއާޔަތްކޮށްފައިވާ މައިގަނޑު ކަންތައްތަކަކީ; އިމްތިހާނު ފަރުމާކުރުމަށާއި އިމްތިހާނު ބޭއްވުމަށް ހިނގާނެ ޚަރަދާއި، މި އަހަރު އިމްތިހާނުގައި ބައިވެރިވާނެކަމަށް ލަފާކުރެވޭ ކެނޑިޑޭޓުންގެ އަދަދާއި، އަދި އިމްތިހާނު ބޭއްވުމަށް ލިބިފައިވާ ގްރާންޓް އެހީއެވެ.
އެގޮތުން އިމްތިހާނުގެ ޚަރަދު، އިމްތިހާނުގައި ބައިވެރިވާނެކަމަށް ލަފާކުރާ ކެނޑިޑޭޓުންގެ އަދަދުން ބަހާލުމުން، ކޮންމެ ކެންޑިޑޭޓަކަށް ޖެހޭ އަދަދު މިއަށްވުރެ މަތިނަމަވެސް، ކައުންސިލަށް ލިބިފައިވާ ގްރާންޓް އެހީ މި އަދަދުން އުނިކޮށް، ކެނޑިޑޭޓުން ދައްކަންޖެހޭ ފީއަށް ލުއިދިނުމަށް ދެވަނަ އެގްޒެކެޓިވް ކޮމިޓީން ވަނީ ނިންމާފައެވެ.
2022 ވަނަ އަހަރުގެ އިމްތިހާނުގައި ބައިވެރިވާ ފަރާތްތަކަށް ޚާއްސަކޮށް މި ލުއިދިނުމަށް ނިންމާފައިވަނީ، ބާރ އިމްތިހާނުގެ ފީގެގޮތުގައި ދައްކަންޖެހޭނެ އަދަދެއް ދުރާލައި ކެނޑިޑޭޓުންނަށް އެނގިފައިނެތުމުގެ ސަބަބުން، މިފަދަ ޚަރަދެއްކުރުމަށް ލިބިފައިވާ ވަގުތަކީ އެކަށީގެންވާ ވަގުތެއް ނޫންކަމަށް، އިމްތިހާނުގައި ބައިވެރިވާ ކެނޑިޑޭޓުންގެ ފަރާތުން ބާ ކައުންސިލާ ހިއްސާކޮށްފައިވާ ކަންބޮޑުވުންތަކަށް ރިއާޔަތްކޮށްކަމަށް އެ ކައުންސިލުން ބުނެއެވެ. ބާރ އިމްތިހާނުގެ ފީއަކީ ކޮންމެ އަހަރަކު ބާއްވާ އިމްތިހާނަކަށް ހިނގާނެ ޖުމްލަ ޚަރަދަށް ބަލައިގެން އެ އިމްތިހާނަކަށް ވަކިން ކަނޑައެޅޭ ފީއަކަށްވާތީ، ކޮންމެ އިމްތިހާނަކަށްވެސް ކަނޑައެޅޭ ފީއަކީ ތަފާތު ފީއަކަށް ވާނެކަމަށް އެކައުންސިލުން ބުނެއެވެ.
އިމްތިހާނުގައި ބައިވެރިވުމަށް ފީ ދެއްކުމުގެ ސުންގަޑިއަކީ 20 އޮކްޓޫބަރު ވާ ބުރާސްފަތި ދުވަހުގެ މެންދުރު 12:00އެވެ.
