ހުކުރު ދުވަހުގެ ރޭ ފެށުމަށް ހަމަޖެހިފައިވާ އެމްޑީޕީގެ ހަތަރު ވަނަ ކޮންގްރެސްގެ އެޖެންޑާ އާންމުކޮށްފިއެވެ.

އެޖެންޑާއަށް ބަލާއިރު ކޮންގްރެސް ފެށުމަށް ހަމަޖެހިފައިވަނީ ހުކުރު ދުވަހުގެ ރޭ އޮންނަ ފެށުމުގެ ރަސްމިއްޔާތުންނެވެ. އޭގެފަހުން ހޮނިހިރު ދުވަހު މައިގަނޑު ގޮތެއްގައި ކުރިޔަށް ގެންދިޔުމަށް ހަމަޖެހިފައިވަނީ މުއައްސަސާ ތަކުން ކޮންގްރެސްގެ ބައިވެރިންނަށް މައުލޫމާތު ދިނުމެވެ. އާދިއްތަ ދުވަހު ދެ ކަމެއް ކުރިޔަށް ގެންދިޔުމަށް އެޖެންޑާ ކޮށްފައިވެއެވެ. އެއީ އަސާސީ ގަވާއިދަށް އިސްލާހު ހުށަހެޅުމަށް ގައުމީ މަޖިލީހުން ނެގުނު ކޮމިޓީގެ ރިޕޯޓް ހުށަހެޅުމާއި ވެރިކަމުގެ ނިޒާމާއި ގުޅޭގޮތުން ޕާޓީގެ ރައީސް ހުށަހަޅުއްވާ ޤަރާރެވެ. މިގޮތުން ރައީސް މުހައްމަދު ނަޝީދުގެ ޤަރާރާއި ބެހޭގޮތުން މަޝްވަރާ ކޮށް ގޮތެއް ނިންމުން އޮންނާނީ އާދިއްތަ ދުވަހުގެ މެންދުރުގެ ސެޝަންގަ އެވެ.

ކޮންގްރެސްއަށް ރައީސް ނަޝީދު ހުށަހެޅުއްވި ޤަރާރުގައި ވިދާޅުވެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީ އިން ދިވެހި ދައުލަތުގެ ވެރިކަމުގެ ނިޒާމް އާއި، އިންތިހާބީ އުސޫލުތައް ކަނޑައަޅާފައިވާ ގޮތުން، ރިޔާސީ އިންތިހާބެއްގައި އެއް ޕާޓީއިން އެ އިންތިހާބު ކާމިޔާބުކޮށް، ސާފު ސާދާ މުތުލަގު ބާރުތަކަކާއި އެކު ސަރުކާރު ހިންގުމަށް އެއް ޕާޓީއަށް އާދެވުމަކީ ނާދިރުކަމަށްވެފައިވާ ކަމަށެވެ. އަދި ވެރިކަމުގެ ނިޒާމް އާއި އިންތިޚާބީ އުސޫލުތައް ރޭވިފައި އޮތްގޮތުން، ސަރުކާރުގެ އެންމެ އިސްފަރާތް ނުވަތަ ރައީސުލްޖުމްހޫރިއްޔާ ހޮވުމަށް ބާއްވާ އިންތިހާބު ކާމިޔާބުކުރުމަށްޓަކައި، އެ ޕާޓީ އިން އެހެން ޕާޓީތަކަކާއެކު އިއްތިހާދުވުމުން، ސަރުކާރު ހިންގުން ގަޑުބަޑުވެ، އެ ޕާޓީ އިން ރައްޔިތުންނަށް ވެފައިވާ ވައުދުތައް ފުއްދާނުދެވި، ސަރުކާރާއި މެދު ޕާޓީގެ އާންމު މެންބަރުންގެ އިތުބާރު ކުޑަވަމުންދާ ކަމަށެވެ.

އަދި ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް ގެންނަ އިސްލާހުތަކުގެ ތެރޭގައި، ސަރުކާރުގެ އެންމެ އިސް ވެރިޔާއަކީ ރައްޔިތުންގެ މަޖިލީހުގެ މެންބަރުންގެ ތެރެއިން އިންތިހާބުކުރާ އެ މަޖިލީހުގެ އަގްލަބިއްޔަތު ލިބިފައިވާ ބޮޑުވަޒީރު ކަމުގައި ކަނޑައެޅުމަށާއި، އަދި ދައުލަތުގެ އެންމެ މަތީ ވެރިޔާ އަކީ ރައީސުލްޖުމްހޫރިއްޔާ ކަމަށާއި، ރައީސުލްޖުމްހޫރިއްޔާ އަކު ކަނޑައަޅާނީ ރައްޔިތުންގެ މެދުގައި ނަގާ ރިޔާސީ އިންތިހާބުގެ ވޯޓުގައި އެންމެ ގިނަ ވޯޓު ލިބޭ މީހާ ކަމުގައި ކަނޑައެޅުމަށެވެ. އަދި ދައުލަތުގެ އެންމެ މަތީވެރިޔާގެ ބާރުތަކާއި، ބޮޑުވަޒީރަކު ސަރުކާރު ހިންގާއިރު ރައީސުލްޖުމްހޫރިއްޔާއަށް ލިބިދޭ ބާރުތަކާއި އަދާކުރަންޖެހޭ މަސްއޫލިއްޔަތުތައް ކަނޑައެޅުމަށާއި، އަދި ރައްޔިތުންގެ މަޖިލީހުގައި ދާއިރާތުގެ މެންބަރުން ތަމްސީލުވާނޭ ގޮތްތަކާއި، އަދި ރައްޔިތުންގެ މަޖިލީހުގެ އިންތިހާބުގައި ސިޔާސީ ޕާޓީތަކުން ހޯދާ ވޯޓުގެ ނިސްބަތަށް ބަލައި ޕާޓީއަށް ހާއްސަކުރެވޭ ނެޝަނަލް ލިސްޓް ގެ މެންބަރުން ހިމެނޭ އުސޫލު ކަނޑައެޅުމަށް ޤަރާރުގައި ވަނީ ވިދާޅުވެފައެވެ.

މީގެ އިތުރުން ރައްޔިތުންގެ މަޖިލީހުގެ މެންބަރުންގެ ޖުމްލަ އަދަދު 87 މެންބަރުންނަށްވުރެ އިތުރު ނުވާނޭ ހަމައަކުން ރައްޔިތުންގެ މަޖިލީހުގެ ޖުމްލަ އަދަދު ހިފެހެއްޓިފައި އޮތުމާއި، ސަރުކާރު ހިންގާނީ ރައްޔިތުންގެ މަޖިލީހުގެ މެންބަރުންގެ ތެރެއިން އެކުލަވާލެވޭ ވަޒީރުންގެ މަޖިލީހަކުން ކަމުގައި ކަނޑައެޅުމަށާއި، އަދި ސުޕްރީމްކޯޓުގެ ފަނޑިޔާރުންގެ އަދަދަކީ 5 ފަނޑިޔާރުން ކަމުގައި ކަނޑައެޅުމަށާއި، އަދި ޖުޑީޝަލް ސަރވިސް ކޮމިޝަން އެކުލެވިގެންވާ ގޮތަށް ގެންނަ ބަދަލުތައް ކަނޑައެޅުމަށާއި، އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު އަސާސީ ސިފަތައް ގާނޫނު އަސާސީގައި ކަނޑައެޅުމާއެކު، މި ކަންކަން ގާނޫނުއަސާސީގައި ހިމަނައި ބަޔާން ކުުރުމަށް ޤަރާރުގައި އެދި ވަޑައިގެންފައި ވެއެވެ.

ޤަރާރުގައި ރައީސް ނަޝީދު ވިދާޅުވެފައިވަނީ ދިވެހިރާއްޖޭގެ ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓަކަށް އެހުމަށާއި، އެ ވޯޓުގެ ނަތީޖާއަކީ ދިވެހިރާއްޖޭގައި އޮންނަން ފެންނަ ވެރިކަމުގެ ނިޒާމްއަކީ ބަރުލަމާނީ ނިޒާމު ކަމަށް ފާސްވެއްޖެ ނަމަ، މި ބަދަލުތައް ގާނޫނު އަސާސީއަށް ގެނައުމަށް ޤަރާރުގައި ވަނީ ވިދާޅުވެފައެވެ.

ރައީސް ނަޝީދު މި ޤަރާރު ހުށަހަޅުއްވާފައިވަނީ އެމްޑީޕީގެ ނައިބްރައީސް މުހައްމަދު ޝިފާޒުގެ ތާއީދާއި އެކުގައެވެ.

ރައީސް ނަޝީދުގެ ޤަރާރަށް ތާއީދުނުކުރައްވާކަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވަނީ ހާމަކުރައްވާފައެވެ.