އެފްއޭއެމް ހިންގުމާ ފީފާއިން ހަވާލުކުރި ނޯމަލައިޒޭޝަން ކޮމިޓީން ފުރަތަމަ ޑިވިޝަނުގެ ކުލަބުތަކާ ރޭ ބައްދަލުކޮށްފި އެވެ.
ގަލޮޅު ބޯޅަދަނޑުގެ ވީއައިޕީ ރޫމުގައި ބޭއްވި ބައްދަލުވުމުގައި ފުރަތަމަ ޑިވިޝަނުގެ 10 ކުލަބުން ވެސް ބައިވެރިވި ކަމަށް އެ ބައްދަލުވުމުގައި ބައިވެރިވި ކުލަބަކުން މައުލޫމާތުދީފައިވެ އެވެ. އޭގެ ތެރޭގައި ފީފާއިން ގަބޫލުނުކުރި އެފްއޭއެމްގެ ކޮންގްރެސްގައި ނެގި ކޮމިޓީތަކުގެ ތެރެއިން ޑިސިޕްލިނަރީ ކޮމިޓީން ސަސްޕެންޑްކުރި ކްލަބް ވެލެންސިއާ ވެސް ހިމެނެ އެވެ.
މި ބައްދަލުވުމުގައި ކުލަބުތަކުން ވަނީ ފުޓްބޯޅައިގެ ހަރަކާތްތައް ފެށުމުގެ ކުރިން ކުލަބުތަކަށް އެފްއޭއެމާއި ޔޫތު މިނިސްޓްރީން ލިބެންޖެހޭ ފައިސާގެ މައްސަލަތައް ހައްލުކޮށްދިނުމަށް އެދިފަ އެވެ. އަދި ފުޓްބޯޅަ ސީޒަން ފެށޭނީ މި ފައިސާގެ ކަންކަން ހަމަޖެހި، ޕްރެކްޓިސް ކުރާނެ ވަސީލަތްތަކާއި އެނޫން ވެސް ގިނަކަންކަން ހަމަޖެހިގެން ކަމަށް ބުނެފަ އެވެ.
ނޯމަލައިޒޭޝަން ކޮމިޓީން ވަނީ އިއްޔެ މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އަބްދުﷲ ރާފިއުއާ ވެސް ރަސްމީކޮށް ބައްދަލުކޮށް މަޝްވަރާކޮށްފަ އެވެ. އަދި އޭގެ ކުރިން ފީފާއާއެކު ވެސް އޮންލައިން މީޓިންތަކެއް ވަނީ ބާއްވާފަ އެވެ.
