މަޖިލިސް ފަށައިފި: ކޮމިޓީތަކުގައި 20 ބިލް، ސަރުކާރުން ހުށަހަޅާ 30 ބިލް!
18 އޯގަސްޓު 2022 | ބުރާސްފަތި 06:01ބުރާސްފަތި ދުވަހުގެ މަޖިލީހުގެ ޖަލްސާ އަށް ހާޒިރުވެވަޑައިގަތީ 43 މެމްބަރުން
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ 2022 ވަނަ އަހަރުގެ 3 ވަނަ ދައުރުގެ މަސައްކަތްތައް ފަށައިފިއެވެ.
ބުރާސްފަތި ދުވަހު މަޖިލީހުގެ 3 ވަނަ ދައުރުގެ ފުރަތަމަ ޖަލްސާ ބާއްވާފައިވާއިރު މަޖިލީހުގެ ރިޔާސަތުން ވަނީ މަޖިލީހުގައި މިހާރު ކުރިއަށްދާ މަސައްކަތްތަކުގެ ތަފްސީލްތައް ހިއްސާކުރައްވާފައެވެ. އެގޮތުން މިހާރު ކޮމިޓީތަކުގައި ޖުމުލަ 20 ބިލުގެ މަަސައްކަތް އެބަ ކުރިއަށްދެއެވެ. މި ދައުރުގައި މަޖިލީހަށް ސަރުކާރުން ހުށަހަޅަން ބޭނުންވާ 30 ބިލުގެ ލިސްޓެއް ސަރުކާރުން ވަނީ މަޖިލީހަށް ހުށަހަޅާފައެވެ.
މިހާރު ކޮމިޓީތަކުގެ ބިލްތަކުގެ ތަފްސީލަށް ބަލާއިރު އިގްތިސާދީ ކޮމިޓީގައި 2 ބިލް، އިޖުތިމާއީ ކޮމިޓީގައި 2 ބިލް، ޖުޑިޝަރީ ކޮމިޓީގައި 5 ބިލް، މާލިއްޔަތު ކޮމިޓީގައި 3 ބިލް އަދި ލާމަރުކަޒީ ކޮމިޓީގައި 1 ބިލުގެ މަސައްކަތް ކުރިއަށް އެބަދެއެެވެ. މީގެ އިތުރުން ސަލާމަތީ ހިދުމަތްތަކާ ބެހޭ ކޮމިޓީގައި 1 ބިލުގެ މަސައްކަތް ކުރިއަށްދާއިރު އެންވަޔަރަންމަންޓް އެންޑް ކްލައިމެޓް ޗޭންޖު ކޮމިޓީގައި 2 ބިލް އަދި މަޖިލީހުގެ ޖޮއިންޓް ކޮމިޓީތަކުގައި ޖުމުލަ 4 ބިލުގެ މަސައްކަތް އެބަ ކުރިއަށްދެއެވެ.
ބުރާސްފަތި ދުވަހުގެ މަޖިލީހުގެ ޖަލްސާ އަށް ހާޒިރުވެވަޑައިގަތީ 43 މެމްބަރުންނެވެ. 4 މެމްބަރަކު ތިއްބެވީ ސަލާމުގައެވެ.
