އިތުރު ހަ ގައުމަކަށް ސަފީރެއްގެ ގޮތުގައި ޝާން އައްޔަންކުރަނީ
18 އޯގަސްޓު 2022 | ބުރާސްފަތި 07:13ޝާން އަކީ މީގެ ކުރިން ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމު އަދާކުރައްވާފައިވާ ބޭފުޅެއް
ޖަރުމަންގައި ހުންނަވާ ދިވެހި ސަފީރު އައިޝަތު ޝާން ޝާކިރު
ޖަރުމަންވިލާތަށް ދިވެހި ރާއްޖެ އިން ކަނޑައަޅުއްވާފައިވާ ސަފީރު އައިޝަތު ޝާން ޝާކިރު، ނޮން ރެސިޑެންޓް ސަފީރެއްގެ ގޮތުގައި އިތުރު ހަ ގައުމަކަށް އައްޔަންކުރަން ރައްޔިތުންގެ މަޖިލީހުގެ ރުހުން ހޯދުމަށް ސަރުކާރުން ހުށަހަޅައިފިއެވެ.
ޝާން އަށް ރުހުން ދިނުމާ މެދު މަޖިލީހުން ކަނޑަަޅާ ގޮތެއް އަންގަވައިދެއްވުން އެދިވަޑައިގެން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް މަޖިލީހަށް ފޮނުއްވާފައިވާ ސިޓީފުޅު އަމީންއާންމު ވަނީ މަޖިލީހުގެ މިއަދުގެ ޖަލްސާގައި އިއްވައިދެއްވާފައެވެ.
ނޮން ރެސިޑެންޓް ސަފީރެއްގެ ގޮތުގައި ޝާން އައްޔަންކުރަން ނިންމަވާފައިވާ 6 ގައުމުގެ ތެރޭގައި ހިމެނެނީ ރަޝިއާ، ސްވިޑަން، ނޯވޭ، ޑެންމާކް، ފިންލެންޑް އަދި ޔުކްރޭންއެވެ. ނޮން ރެސިޑެންޓް ސަފީރެއްގެ ގޮތުގައި ޝާން މިވަގުތު މަސައްކަތް ކުރައްވާނީ ޖަރުމަންގައެވެ.
އާއްމު އުސޫލެއްގެ ގޮތުން ނޮން ރެސިޑެންޓް ސަފީރުން އައްޔަންކުރަނީ އެމްބަސީ ގާއިމުކޮށްފައި ނުހުންނަ ޤައުމުތަކަށް ކަމަށް ވާއިރު ޖަރުމަންގައި ހުންނަވާ ސަފީރު ކަމަށް ޝާން އައްޔަންކުރަން މަޖިލީހުން ރުހުން ދެއްވާފައި ވަނީ މިއަހަރު މެއި 24 ވަނަ ދުވަހު އެވެ. އަދި ޝާން އަށް މަގާމުގެ ލިޔުން ހަވާލުކުރައްވާފައި ވަނީ މިދިޔަ ޖުލައި 20 ވަނަ ދުވަހުއެވެ.
ޝާން އަކީ މީގެ ކުރިން ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމު އަދާކުރައްވާފައިވާ ބޭފުޅެކެވެ.
