ސަރުކާރުގެ ފަރާތުން މަޖިލީހުގެ މިއަހަރުގެ 3 ވަނަ ދައުރަށް 30 ބިލެއް ހުށައަޅަނީ
ބިލުތަކުގެ ލިސްޓު ރައީސުލްޖުމްހޫރިއްޔާގެ އޮފީހުން ބުދަ ދުވަހު ވަނީ މަޖިލީހަށް ފޮނުއްވާފައި
އޭޖީ އޮފީހުން މައުލޫމާތު ދޭ ގޮތުގައި މި ދައުރަށް ހުށަހަޅަން ޤަޞްދުކުރާ ބިލުތަކުގެ ލިސްޓު މިހާރު ވަނީ ފޮނުވާފައި
ސަރުކާރުގެ ފަރާތުން ރައްޔިތުންގެ މަޖިލީހުގެ މިއަހަރުގެ 3 ވަނަ ދައުރަށް 30 ބިލެއް ހުށައެޅުމަށް ނިންމާފައިވާކަމަށް ބަންޑާރަނައިބު (އޭޖީ) އޮފީހުން ބުނެފިއެވެ.
އޭޖީ އޮފީހުން މައުލޫމާތު ދޭ ގޮތުގައި މި ދައުރަށް ހުށަހަޅަން ޤަޞްދުކުރާ ބިލުތަކުގެ ލިސްޓު ރައީސުލްޖުމްހޫރިއްޔާގެ އޮފީހުން ބުދަ ދުވަހު ވަނީ މަޖިލީހަށް ފޮނުއްވާފައެވެ.
އޭގެ ތެރޭގައި ދިވެހިރާއްޖޭގެ ޓުއަރިޒަމްއާއި ބެހޭ ޤާނޫނަށް އިސްލާހު ގެނައުމުގެ ބިލާއި، މުދަލާއި ޚިދުމަތުގެ އަގުން ޓެކްސް ނެގުމުގެ ބިލާއި، ދިވެހިރާއްޖޭގެ ފަނޑިޔާރުންގެ ޤާނޫނަށް އިސްލާޙު ގެނައުމުގެ ބިލާއި، ޖިނާއީ އިޖުރާއަތުގެ ޤާނޫނަށް އިސްލާޙު ގެނައުމުގެ ބިލުގެ އިތުރުން، ދިވެހިރާއްޖޭގެ ޤާނޫނުލްއުޤޫބާތަށް އިސްލާޙު ގެނައުމުގެ ބިލު ހިމެނެއެވެ.
އޭގެ އިތުރުން، ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް އިސްލާޙު ގެނައުމުގެ ބިލުވެސް ހިމެނެއެވެ.
އޭޖީ އޮފީހުން މަޖިލީހުގެ މިއަހަރުގެ 3 ވަނަ ދައުރަށް ހުށައަޅާ ބިލުތަކުގެ ތެރޭގައި މަސްތުވާތަކެއްޗާ ބެހޭ ޤާނޫނަށް އިސްލާޙު ގެނައުމުގެ ބިލާއި، ގޭންގް ކުށްތައް މަނާ ކުރުމާބެހޭ ޤާނޫނަށް އިސްލާޙު ގެނައުމުގެ ބިލުވެސް ހިމެނެއެވެ.
އޭގެ އިތުރުން، ބިރު ދެއްކުމާއި، ނުރައްކާތެރި ހަތިޔާރާއި، ތޫނު އެއްޗެހި ގެންގުޅުން މަނާ ކުރުމުގެ ޤާނޫނަށް އިސްލާޙު ގެނައުމުގެ ބިލުވެސް ހުށައެޅުމަށް ވަނީ ނިންމާފައެވެ.
އަދި ޓެރަރިޒަމް މަނާ ކުރުމުގެ ޤާނޫނަށް އިސްލާޙު ގެނައުމާއި، މަނީ ލޯންޑަރިންގ އަދި ޓެރަރިޒަމް އަށް ފައިނޭންސް ކުރުން ހުއްޓުވުމުގެ ޤާނޫނަށް އިސްލާޙު ގެނައުމުގެ ބިލާއި، މޯލްޑިވްސް ހެލްތު ސަރވިސް ބިލުގެ އިތުރުން، ސިއްޙީ ޚިދުމަތް ދިނުމުގެ ޤާނޫނަށް އިސްލާޙު ގެނައުމުގެ ބިލާއި، ޙައްޖާއި އުމްރާގެ ބިލުވެސް ހިމެނެއެވެ.
އޭގެ އިތުރުން، ޒަކާތުގެ ބިލާއި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އިސްލާޙު ގެނައުމުގެ ބިލުވެސް ހިމެނެއެވެ.
މަޖިލީހުގެ މިއަހަރުގެ 3 ވަނަ ދައުރަށް ހުށައަޅާ ބިލުތަކުގެ ތެރޭގައި އާމްދަނީން ޓެކްސް ނެގުމުގެ ޤާނޫނަށް އިސްލާޙު ގެނައުމުގެ ބިލާއި، ފޮރިން އިންވެސްޓްމަންޓު ބިލާއި، މަސައްކަތުގެ މާޙައުލުގެ ސަލާމަތާއި ރައްކާތެރިކަމުގެ ބިލާއި، އިންޑަސްޓްރިއަލް ރިލޭޝަންސްގެ ބިލާއި، އާއިލާއާއި ބެހޭ ޤާނޫނަށް އިސްލާޙު ގެނައުމުގެ ބިލާއި، ގެވެށި އަނިޔާ ހުއްޓުވުމުގެ ޤާނޫނަށް އިސްލާޙު ގެނައުމުގެ ބިލާއި، ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރި ކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނަށް އިސްލާޙު ގެނައުމުގެ ބިލާއި، ދިވެހި ރާއްޖޭގެ ކުޅިވަރުގެ ޤާނޫނަށް އިސްލާޙު ގެނައުމުގެ ބިލުވެސް ހިމެނެއެވެ.
އޭގެ އިތުރުން، ހެއްކާބެހޭ ޤާނޫނަށް އިސްލާޙު ގެނައުމުގެ ބިލާއި، މޯލްޑިވްސް މީޑިއާ އެންޑް ބްރޮޑްކާސްޓިންގ އޮތޯރިޓީގެ ބިލާއި، އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލާއި، ޤާނޫނީ ފަންނުގެ ޤާނޫނަށް އިސްލާޙު ގެނައުމުގެ ބިލާއި، ޤާނޫނީ އެހީތެރިކަން ފޯރުކޮށްދިނުމުގެ ބިލުގެ އިތުރުން، ޕޯޓުތައް މެނޭޖް ކުރުމުގެ ބިލުވެސް ހިމެނެއެވެ.
