އަދިވެސް ބޭނުންވާ މަގުބޫލުކަމާއި އިޙްތިރާމް ޕޮލިޓެކްނިކް އަކަށް ނުލިބޭ: މިނިސްޓަރ

އަދިވެސް ބޭނުންވާ މަގުބޫލުކަމާއި އިހުތިރާމް ޕޮލިޓެކްނިކް އަކަށް ނުލިބޭ ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެ އެވެ.

މޯލްޑިވްސް ޕޮލިޓެކްނިކްގެ 2022 ވަނަ އަހަރުގެ އޮގަސްޓް އިންޓޭކްގެ އޮރިއެންޓޭޝަންގައި ބައިވެރިވެރިވި ދަރިވަރުންނާއި މުޙާތަބުކުރައްވާ ވާހަކަދައްކަވަމުން މިނިސްޓަރ ވަނީ ޕޮލިޓެކްނިކް ޒަމާނީ ކުރުމުގެ މަސައްކަތް ސަރުކާރުން ކުރަމުންދާ ކަމަށް ވިދާޅުވެފައެވެ. އަމާޒަކީ އާއްމުން ބަލައިގަންނަ ފެންވަރުގެ ބަޔަކު ޕޮލިޓެކްނިކް މެދުވެރިކޮށް އުފެއްދުން ކަމަށް އެމަނިކުފާނު ވަނީ ވިދާޅުވެފައެވެ.

މިނިސްޓަރ ވަނީ ވޯލްޑްބޭންކުގެ އެހީގައި މިހާރު އާ ޚިދުމަތްތަކެއް ޕޮލިޓެކްނިކަށް ފޯރުކޮށްދެމުން ގެންދާ ކަމަށާއި އޭގެ ތެރޭގައި ލައިބްރަރީގެ ޚިދުމަތް ފާހަގަކޮށްލެވޭ ކަމަށް ވިދާޅުވެފައެވެ. އިތުރަށް ވާހަކަދައްކަވަމުން މިނިސްޓަރ ވިދާޅުވީ އާ ފެސިލިޓީ ތައް ޕޮލިޓެކްނިކްގައި ގާއިމްކުރުމުގެ މަޤްސަދަކީ އެތަނުން ދެވޭ ތައުލީމުގެ ފުރުސަތުތައް ފުޅާކުރުމާއި، އެތަނާއި މެދު އާއްމުން ދެކޭ ގޮތް ބަދަލުކުރުން ކަމަށެވެ.

ޕޮލިޓެކްނިކްގެ އޮގަސްޓް މަހުގެ އިންޓޭކްގެ ދަރިވަރުންނާއި ވާހަކަދައްކަވަމުން ހަޔަރ އެޑިއުކޭޝަންގެ ސްޓޭޓް މިނިސްޓަރ މުހައްމަދު ހާޝިމް ވަނީ ދަރިވަރުންނަށް ލިބޭ ފުރުސަތުގެ ބޭނުން އެންމެ ރަނގަޅަށް ކުރުމަށް ނަސޭހަތްތެރި ވެވަޑައިގެންފައެވެ. އެގޮތުން ޕޮލިޓެކްނިކުން ކިޔަވާ ދަރިވަރުންނަކީ މަސައްކަތުގެ އަޚުލާގު ރަނގަޅު ބަޔަކަށް ވުމަށް ވެސް އޭނާ ވަނީ އިލްތިމާޒްކުރައްވާފައެވެ.