ބަރުލަމާނީ ގަރާރަކުން ހައްލެއް ނުފެނޭ – ރައީސް

ވެރިކަމުގެ ނިޒާމު ބަދަލުކުރުމަށް ހުށަހަޅާ ގަރާރުގައި ހައްލެއް ފެނިވަޑައިނުގަންނަވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ރާއްޖޭގެ ވެރިކަންކުރާ ނިޒާމު ބަރުލަމާނީ ނިޒާމަކަށް ބަދަލުކުރެއްވުމަށް އެމްޑީޕީގެ ރައީސް، ރައީސް މުހައްމަދު ނަޝީދު، ހުކުރު ދުވަހު އޮންނަ އެމްޑީޕީގެ 4 ވަނަ ކޮންގްރެސްއަށް ހުށަހަޅުއްވާފައިވާ ގަރާރާ ގުޅޭގޮތުން ރައީސް ސޯލިހު ވިދާޅުވީ، މަޖިލީހުގެ ތެރެއިން ސަރުކާރު އެކުލަވާލާ ގޮތް އެބައޮތް ކަމަށެވެ. އެގޮތުން މަޖިލީހުގައި އެއްޕާޓީއަކަށް އަޣުލަބިއްޔަތު ނުލިބިއްޖެނަމަ އެހެން ޕާޓީތަކާއެކު ކޯލިޝަން ހަދާ ވާހަކަ އެބައަންނަ ކަމަށާއި، އެހެންވީމައި މި ހުށަހެޅި މައްސަލައަށް ނުވަތަ ކޯލިޝަން ހަދައިގެން ސަރުކާރުގެ ކަންތައް ކުރިއަށް ނުގެންދެވެއޭ، އެ ބުނާ ބުނުމަށް މިގަރާރުން ހައްލެއް ނުފެންނަކަމަށެވެ.

Advertisement

ރައީސް ވިދާޅުވީ މިހާރު މި އޮތް ނިޒާމުގެ ތެރޭގައި ހުރީ ކޮން މައްސަލަތަކެއްކަމާއި އަދި ނުކުރެވިގެން މިއުޅެނީ ކޮންކަމެއްކަން ކިޔައިދެއްވަންޖެހޭ ކަމަށެވެ. ފުރަތަމަ ކަމަކަށް މި ގަރާރު ގެންނަން ފެނިވަޑައިނުގަންނަވާ ކަމަށާއި، އަދި ގެނެސްފިނަމަ ކޮންގްރެސްގެ ތެރެއިން މި ގަރާރު ފާސްވެގެންދާތަން ފެނިވަޑައިނުގަންނަވާ ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ މިއީ މިވަގުތު ކުރިއަށްގެންދަންޖެހޭ ކަމެއް ކަމަށް އެމަނިކުފާނަށް ގަބޫލުފުޅުނުކުރެއްވޭކަމަށެވެ.

ރައީސް ވިދާޅުވީ ގާނޫނު އަސާސީއަށް ގެންނަންޖެހޭ ބައެއް އިސްލާހު އެބަހުރި ކަމަށެވެ. އަދި ރިޔާސީ އިންތިޚާބުގައި ޖޭއެސްސީ އިސްލާހު ގެންނެވުމަކީ ރިޔާސީ އިންތިހާބުގައި ވެވަޑައިގެންނެވި ވައުދުފުޅެއްކަމަށާއި، ކުރިއަށް އޮތްތަނުގައި މި ދައުރުގެ ތެރޭގައި އެ އިސްލާހު އަންނާނެ ކަމަށެވެ. މީގެ އިތުރުންވެސް އިސްލާހުކުރަންޖެހޭ ބައެއް ކަންތައްތައް އެބަހުރިކަމަށް ރައީސް ވިދާޅުވިއެވެ.

ރައީސް ވިދާޅުވީ ތަރައްގީވެ ކުރިއަރާފައިވާ ގައުމުތަކުގައި އެކަހަލަ ކަންކަން ކުރަން ނުޖެހޭ ކަންކަމުގައި، ސިޔާސީ މީހުން އެއްތަނަކަށް އެއްވެ އެ ބަހުސްކޮށް ސަރުކާރު ބަދަލުކުރަންޖެހޭނަމަ ކުރުން ރަނގަޅު ކަމަށެވެ. ނަމަވެސް ތަރައްގީވަމުން އަންނަ ގައުމެއްގައި އެކަން ކުރަންޖެހިއްޖެއްޔާ ހުންނަ ދަތިތައް މާ ބޮޑުވާނެކަމަށެވެ.

ރައީސް ވިދާޅުވީ، ދެބަސްވެވިދާނެ އަދި ވާހަކަދެކެވިދާނެ ކަންކަން އެބަހުރިކަމަށެވެ. ރައީސް ވިދާޅުވީ އެމަނިކުފާނަށް ގަބޫލުކުރެއްވޭގޮތުގައި މިހާރު އޮތް ގަރާރަކީ އަދި މިއޮތްގޮތަށް ކޮންގްރެސްއަށް ހުށަހަޅައިގެން ބަހުސްކޮށްގެން ވޯޓާ ހިސާބަށް ދާ ވަރަށްވުރެ މާ ޅަފަތުގައި އޮތް ގަރާރެއް ކަމަށެވެ.