އަދާލަތަށް ފުރުސަތު ފަހިވާނީ ބަރުލަމާނީ ނިޒާމުން، ނަމަވެސް ޕާޓީގެ މަސްލަހަތު އިސްކުރަން މެމްބަރުން ނުރުހޭނެ: އިމްރާން
16 އޯގަސްޓު 2022 | އަންގާރަ 23:59ގައުމީ މަސްލަހަތަށްވުރެ ޕާޓީގެ މަސްލަހަތު އިސްކުރުމަށް އަދާލަތު ޕާޓީގެ މެމްބަރުން އެއްގޮތަކަށްވެސް ނުރުހޭނެކަމަށް އިމްރާން ވިދާޅުވި
މިނިސްޓަރ އޮފް ހޯމް އެފެއަރޒް އިމްރާން ޢަބްދުﷲ
ރާއްޖޭގެ ސިޔާސީ މަސްރަހުގައި އަދާލަތު ޕާޓީއަށް ފުރުސަތު އެންމެ ފަހިވާނީ ބަރުލަމާނީ ނިޒާމެއްގައި ކަމަށް ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް އަދި ހޯމް މިނިސްޓަރު އައްޝައިޚް އިމްރާން އަބްދުﷲ ވިދާޅުވެއްޖެއެވެ.
ވެރިކަމުގެ ނިޒާމުގެ އަޑުގަދަވެފައިވާ މިދަނޑިވަޅުގައި އިމްރާން ހޯމަ ދުވަހުގެ ރޭ ކުރެއްވި ޓްވީޓްގައި ވިދާޅުވީ ބަރުލަމާނީ ނިޒާމަކީ މިރާއްޖެއަށް އެކަށީގެންވާ ނިޒާމެއް ނޫންކަމަށެވެ. ބަރުލަމާނީ ނިޒާމާ ދެކޮޅުކަން ހާމަކުރައްވައި އިމްރާން ކުރެއްވި ޓްވީޓްގައި އިތުރަށް ވިދާޅުވެފައިވަނީ، ރާއްޖޭގެ މިއަދުގެ ހާލަތުގައި ބަރުލަމާނީ ނިޒާމު ގެނެސްފިނަމަ ސިޔާސީ ހަމަޖެހުން ގެއްލި އަވަސްއަވަހަށް ސަރުކާރު ބަދަލުވާނެކަމަށެވެ. އަދި ރައްޔިތުން ބައިބައިވެ ހާލުގައިޖެހުން ފިޔަވައި އިތުރު މޮޅުކަމެއް ނުވާނެކަމަށް އިމްރާންގެ ޓްވީޓްގައި ވިދާޅުވެފައިވެއެވެ.
އޭގެފަހުން އަންގާރަ ދުވަހުގެ ރޭ ކުރެއްވި ޓްވީޓްގައި އަދާލަތު ޕާޓީއަށް ފުރުސަތު ބޮޑީ ބަރުލަމާނީ ނިޒާމުންކަމަށް ވިދާޅުވެ އިމްރާން ވިދާޅުވީ އެހެންނަމަވެސް ގައުމީ މަސްލަހަތަށްވުރެ ޕާޓީގެ މަސްލަހަތު އިސްކުރުމަށް އަދާލަތު ޕާޓީގެ މެމްބަރުން އެއްގޮތަކަށްވެސް ނުރުހޭކަން އެމަނިކުފާނަށް ޔަގީންކަމަށެވެ.
ކުރިޔަށް އޮތް އެމްޑީޕީ ކޮންގްރެސްއަށް، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމަށް ގާނޫނު އަސާސީއަށް ގެންނާނެ އިސްލާހުތަކާއި ބަރުލަމާނީ ނިޒާމުގައި ސަރުކާރު ހިންގާނެ ގޮތް އެމްޑީޕީގެ ރައީސް މުހައްމަދު ނަޝީދު ވަނީ ހާމަކުރައްވާފައެވެ. އަދި ރައީސް ނަޝީދު ގެންދަވަނީ ބަރުލަމާނީ ނިޒާމަށް ވަކާލާތުކުރައްވަމުންނެވެ. ނަމަވެސް އެމްޑީޕީގެ އެންމެ އިސްލީޑަރު އަދި ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ބަރުލަމާނީ ނިޒާމަށް ތާއީދުނުކުރައްވާކަމަށް ވިދާޅުވެ ރައީސް ނަޝީދު ހުށަހަޅުއްވާފައިވާ ގަރާރު ގެންނަން ފެނިވަޑައިނުގަންނަވާކަމަށް ވިދާޅުވެފައެވެ.
