ބަރުލަމާނީ ނިޒާމުން ކޯލިޝަންގެ މައްސަލަ ހައްލެއްނުވާނެ: ރޮޒޭނާ
ރާއްޖެ ފަދަ ކުޑަ ގައުމަކަށް ބަރުލަމާނީއަކީ އެންމެ އެކަށީގެންވާ ނިޒާމެއް ނޫން
މެމްބަރު ރޮޒޭނާ
ބަރުލަމާނީ ނިޒާމެއްގައި ކޯލިޝަނާއެކު ނޫނީ ވެރިކަމަށް ނާދެވޭގޮތަށް ރާއްޖޭގައި ދެމިގެންދާ ސަގާފަތަށް ބަދަލެއް ނާންނާނެކަަމަށާއި، އެ ނިޒާމުގައި ކުދި ޕާޓީތަކުގެ ދައުރު ވާނީ ބޮޑު ކަމަށް، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.
ބަރުލަމާނީ ނިޒާމުގައި ސަރުކާރު ހިންގާނެ ގޮތް ހާމަކުރައްވައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ރައީސް، އަދި ކުރީގެ ރައީސް މުހައްމަދު ނަޝީދު ވަނީ، އެމްޑީޕީގެ ކޮންްގްރެސްއަށް ގާނޫނު އަސާސީއަށް އިސްލާހު ހުށަހަޅުއްވާފައެވެ. ރައީސް ނަޝީދު ވަނީ ކޯލިޝަނަކާނުލާއި އެއް ޕާޓީއަކަށް ވެރިކަމަށް ނާދެވުމުން، ވެރިކަމުގައި ހުންނަ މީހަކަށް ވަރަށް ބޮޑެތި ދަތިތަކާ ކުރިމަތިވާނެކަމަށް ވިދާޅުވެފައެވެ. ކުދި ޕާޓީތަކާއެކު ވެރިކަންކުރަން ޖެހުމުން ވެރިކަމުގެ ނިޒާމު ގަޑުބަޑުވާކަމަށްވެސް ރައީސް ނަޝީދު ވަނީ ވިދާޅުވެފައެވެ.
އަންގާރަ ދުވަހުގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން ރޮޒޭނާ ވިދާޅުވީ، ކޯލިޝަނަކާއެކު ވެރިކަން ނުކުރެވެނީ ވެރިކަމުގައި ހުންނަ މީހާގެ އެ ގާބިލުކަން ނެތުމުން ކަމަށެވެ. އެހެންނަމަވެސް ކޯލިޝަނަކާއެކު ކާމިޔާބުކަމާއެކު މަސައްކަތްކުރެވޭނެކަން ރައީސް އިބްރާހީމް މުހައްމަދު ސޯލިހު ސާބިތުކޮށްދެއްވާފައިވާކަަމަށް ރޮޒޭނާ ވިދާޅުވިއެވެ. މީގެ އިތުރުން ތިން ބާރު އެއްކުރަން ދައްކާ ވާހަކަތަކަކީ ރައްޔިތުންނަށް ހެޔޮ އެދިގެން ދެކެވޭ ވާހަކަތަކެއްކަމަށް ގަބޫލުނުކުރެއްވޭކަމަށް އޭނާ ވިދާޅުވިއެވެ.
އަދި ބަރުލަމާނީ ނިޒާމު ގެނައުމަށް ރައީސް ނަޝީދު ހުށަހެޅުއްވި ކަރުދާހުގައި، ބަރުލަމާނީ ނިޒާމުގައި ކޯލިޝަނާމެދު ވަނީ ސައްހަ ވާހަކަތަކެއް ނޫންކަމަށްވެސް އޭނާ ވިދާޅުވިއެވެ.
ރާއްޖެފަދަ ކުޑަ ގައުމަކަށް ބަރުލަމާނީއަކީ އެންމެ އެކަށީގެންވާ ނިޒާމު ނޫންކަމަށާއި، އެމްޑީޕީގެ ގިނަ މެމްބަރުންވެސް ބަރުލަމާނީ ނިޒާމަށް ތާއީދުނުކުރާކަަމަށް ރޮޒޭނާ ވިދާޅުވިއެވެ. ރާއްޖޭގައި ރިޔާސީ ނިޒާމެއްގެ ދަށުން ވެރިކަން ކުރަން ނިންމީ ރައްޔިތުންގެ ވޯޓަކުން ކަމަށްވާއިރު ރައްޔިތުންގެ ބަހަކާނުލައި އެ މަސައްކަތް ނުކުރެވޭނެ ކަމަށްވެސް އޭނާ ވިދާޅުވިއެވެ. ރޮޒޭނާ ވަނީ އެއީ ރައްޔިތުންގެ ބާރު ކަނޑުވާލުންކަން ފާހަގަކުރައްވާފައެވެ. ބަރުލަމާނީ ނިޒާމަކާއެކު ރައްޔިތުންގެ މެދުގައި ބައިބައިވުން އިތުރުވާނެ ކަމަށާއި، ރައްޔިތުންގެ އަތުގައި އޮތް ބާރުތައް ދޫކޮށްލަން ރައްޔިތުން ބޭނުންނުވާނެކަންވެސް އޭނާ ވަނީ ފާހަގަކުރައްވާފައެވެ.
ބަރުލަމާނީ ނިޒާމު ގެންނަން ރައީސް ނަޝީދު މަސައްކަތްކުރައްވާއިރު އިކޮނޮމިކް މިނިސްޓަރ ފައްޔާޒް އިސްމާއީލާއި ހޯމް މިނިސްޓަރ ޝައިޚް އިމްރާން އަބްދު ﷲ އަދި ފޮރިން މިނިސްޓަރ އަބްދުﷲ ޝާހިދު ހިމެނިވަޑައިގަންނަވާހެން އެމްޑީޕީގެ ނަގާކިޔާ ބޭފުޅުން ގެންދަވަނީ ބަރުލަމާނީ ނިޒާމަކަށް ތާއީދު ނުކުރައްވާކަން ހާމަކުރައްވަމުންނެވެ.
