ރިޔާސީ އިންތިޚާބަށް ލަފާ ކުރާ ބަޖެޓުގެ މަސައްކަތް މި ހަފްތާގައި ނިންމާލެވޭނެ ކަމަށް ބެލެވޭ: ފުއާދު
ފުއާދު ވިދާޅުވީ އިންތިޚާބު ދެ ބުރަކަށް ބާއްވަން ޖެހިދާނެތީ ދެ ބަޖެޓް ވަކިން ހަދާ ކަމަށް
އިލެކްޝަންސް ކޮމިޝަންގެ ރައީސް ފުއާދު ތައުފީގު
އަންނަ އަހަރު ބާއްވާ ރިޔާސީ އިންތިޚާބަށް ލަފާ ކުރެވޭ ބަޖެޓުގެ މަސައްކަތް މި ހަފްތާ ނިމުމުގެ ކުރިން ނިންމާލެވޭނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
"ރާއްޖެ އެމްވީ" އަށް މައުލޫމާތު ދެއްވަމުން ފުއާދު ވިދާޅުވީ ބަޖެޓު ހެދުމުގެ މަސައްކަތުގެ ބޮޑުބައެއް މިހާރު ނިމިފައިވާ ކަމަށެވެ. އެހެންވެ، މި ހަފްތާގެ ބުރާސްފަތި ދުވަހާ ހަމައަށް އެ މަސައްކަތް އެއްކޮށް ނިންމާލެވޭނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ.
ފުއާދު ވިދާޅުވި ގޮތުގައި ކުރީގެ ރިޔާސީ އިންތިޚާބުތަކަށް ބަލައި ލަފާ ކުރެވޭ ގޮތުގައި އިންތިޚާބުގެ އެއްބުރުގެ ވޯޓަށް 100 މިލިއަނެއްހާ ރުދިޔާ ހޭދަ ވާނެއެވެ. ނަމަވެސް މިފަހަރު ދެބުރަކަށް ދާން ޖެހިދާނެ ކަމަށް ބެލެވޭތީ ދެ ބުރުގެ އިންތިޚާބުގެ ބަޖެޓު ވަކިން ތައްޔާރު ކުރަމުން އަންނަ ކަމަށް އޭނާ ވިދާޅުވިއެވެ.
ރިޔާސީ އިންތިޚާބް އަކީ ރާއްޖޭގައި ބާއްވާ އެންމެ ބޮޑު އިންތިޚާބްއެވެ. މި އިންތިޚާބުގެ ވޯޓުފޮށިތައް ރިސޯޓުތަކާއި ރާއްޖޭން ބޭރުގެ ޤައުމުތަކާއި އިންޑަސްޓްރިއަލް ރަށްތަކުގައި ވެސް ބަހައްޓަން ޖެހޭއިރު ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުން ވެސް އިތުރުވާނެއެވެ.
2023ވަނަ އަހަރުގެ އިންތިޚާބަށް މިހާރު ވެސް ބައެއް ޕާޓީތަކުން ވަނީ ތައްޔާރުވާން ފަށާފައެވެ. އެގޮތުން، އެ ޕާޓީތަކުން ވާދަ ކުރާނެ ކެންޑިޑޭޓުން ކަނޑައަޅައި ޓިކެޓްވެސް މިހާރު ވަނީ ހަވާލުކޮށްފައެވެ. ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީ އިންވެސް މިއަހަރު އެ އިންތިޚާބުގެ މަސައްކަތް ފަށާނެ ކަމަށް އެ ޕާޓީން ވަނީ ބުނެފައެވެ.
ރިޔާސީ އިންތިޚާބުގެ އިތުރުން ވެރިކަން ހިންގުމުގެ ނިޒާމަށް ބަދަލު ގެންނަނަމަ އެކަމަށް ދާ ޚަރަދާ ގުޅޭ ގޮތުން ވެސް އިލެކްޝަންސް ކޮމިޝަނުގެ ރައީސް ފުއާދު ވަނީ "ރާއްޖެ އެމްވީ" އަށް މައުލޫމާތު ދެއްވާފައެވެ. އޭނާ ވިދާޅުވި ގޮތުގައި ނިޒާމީ ވޯޓެއް ބާއްވާނަމަވެސް ރިޔާސީ އިންތިޚާބެއްގެ އެއްބުރަށް ދާނެ ވަރަށް (100 މިލިއަނެއްހާ ރުފިޔާ) ޚަރަދުވާނެއެވެ.
ނިޒާމީ ވޯޓުގެ ވާހަކަތައް މިހާރު ދެކެވުނު ނަމަވެސް އިލެކްޝަންސް ކޮމިޝަނުން އެފަދަ އެއްވެސް މަޝްވަރާއެއް ނުކުރާ ކަމަށް ފުއާދު ވިދާޅުވިއެވެ. އެ މަޝްވަރާތައް ކުރަން ފަށާއި ރައީސުލްޖުމްހޫރިއްޔާ ނުވަތަ ރައްޔިތުންގެ މަޖިލީހުން އެކަން އީސީއަށް އެންގުމުން ކަމަށާއި ޤާނޫނީ ގޮތުން ހަވާލު ކުރާ ހުރިހާ މަސައްކަތެއް އީސީ އިން ކުރަމުންގެންދާނެ ކަމަށް ފުއާދު ވިދާޅުވިއެވެ.
