ދުނިޔެއަށް އަންނަ ބަދަލުތަކާއި ރާއްޖޭން ކުރާ ތަޖުރިބާތަކަށް ބަލާއިރު މިވަގުތަށް އެންމެ މުހިންމީ ޒުވާނުން އިތުރަށް ބާރުވެރިކުރުވައި ޤައުމުގެ ކަންކަން ނިންމުމުގައި ޒުވާނުންގެ ބައިވެރިވުން އިތުރުކުރުން ކަމަށް ރައީސުލްޖުމްހުރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ބައިނަލްއަގުވާމީ ގޮތުން ފާހަގަ ކުރާ ޒުވާނުންގެ ދުވަހާއި ގުޅިގެން ކުޅުދުއްފުށި ސިޓީގައި ހޮނިހިރު ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. ނައިބު ރައީސް ވިދާޅުވީ ޒުވާނުންނަކީ ހުނަރުވެރި ބަޔަކަށް ހަދަން މަސައްކަތް ކުރަން ޖެހޭ ކަމަށެވެ. ސްކޫލް ދައުރުން ފެށިގެން މިކަން ކުރަން ޖެހޭކަމަށާއި ޤައުމު ކުރިއެރުވޭނީ ރަނގަޅު ޒުވާނުންތަކެއް އުފެއްދިގެންކަން މުޅި މުޖުތަމައު ޤަބޫލުކޮށްގެން ކަމަށް އެމަނިކުފާނު ވިދާޅުވިއެވެ.

ނައިބު ރައީސް އިތުރަށް ވިދާޅުވީ މިއަދު ޤައުމެއް ބިނާ ކުރާއިރު އެންމެ މުހިންމު ކަމަކީ ކޮވިޑް-19 ފަދަ ބަލިމަޑުކަމެއްގެ ތެރޭގައި ވެސް ލޮޅުމެއް ނާންނާނެ ފަދަ މުޖުތަމައު އެއް ބިނާ ކުރުން ކަމަށެވެ. އެހެންކަމުން މިހާރު ތައުލީމު އުނގެނެމުންދާ ދަރިވަރުންނަކީ މާދަމާގެ މުސްތަގުބަލުކަން ދެކިގެން މަސައްކަތް ކުރެއްވުމަށް އެމަނިކުފާނު ވަނީ ބެލެނިވެރިންނާއި މުދައްރިސުންގެ ކިބައިން އެދިވަޑައިގަންނަވާފައެވެ.

ނައިބު ރައީސް ވިދާޅުވީ މުޅި މުޖުތަމައު ގުޅިގެން އެފަދަ މުޖުމަތަމައު އެއް ބިނާ ކުރުމަށް އެއްބައިވުން މުހިންމު ކަމަށެވެ. އެގޮތުން، އެއްބައިވަންތަކަމާއި އެކުވެރިކަން ނެތިދާ ހާލަތް ތަކުގައިވެސް އެކުވެރިކަން ދަމަހައްޓަން އެންމެން ގުޅިގެން މަސައްކަތް ކުރަންޖެހޭ ކަމަށާއި ރާއްޖެ ފަދަ ޤައުމެއްގައި އެންމެ މުހިންމު އެއްޗަކީ އެކުވެރިކަން ކަމަށް އެމަނިކުފާނު ފާހަގަ ކުރެއްވިއެވެ.

މީގެ އިތުރުން ކާމިޔާބާއި ހަމައަށް ދިއުމަށްޓަކައި މިވަގުތު އެންމެ ބޭނުންވަނީ އެންމެން ގުޅިގެން އެކަތިގަނޑަކަށްވެ، މަސައްކަތް ކުރުން ކަމަށް ވެސް ނައިބު ރައީސް ވިދާޅުވިއެވެ.

މިއަހަރުގެ ޒުވާނުންގެ ދުވަހުގެ ޝިއާރަކީ "ޖީލުތަކުގެ މެދުގައި އެއްބައިވަންތަކަން" މިއެވެ. މިއަހަރުގެ ޒުވާނުންގެ ދުވަސް ފާހަގަ ކުރުމަށް ހިންގާ ހަރަކާތްތައް ކުރިޔަށް ދަނީ ކުޅުދުއްފުށި ސިޓީގައެވެ.