އެއްވެސް މީހެއްގެ ޙައްޤަކަށް އުނިކަން ނާންނާނެކަން ފަނޑިޔާރުން ކަށަވަރު ކުރަންޖެހޭކަމަށް އުއްތަމަ ފަނޑިޔާރު ޑރ މުއުތަސިމް އަދުނާން ވިދާޅުވެއްޖެއެވެ.

ދިވެހިރާއްޖޭގެ ހައިކޯޓަށް އަލަށް އައްޔަނު ކުރެއްވި ފަނޑިޔާރުން ހުވާ ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އުއްތަމަ ފަނޑިޔާރު ވިދާޅުވީ، ހުވާ ކުރުމަކީ ބޮޑު ޒިންމާތަކެއް ކޮނޑުގައި އަޅައި އެކަމަކާއި ޙަވާލުވުން ކަމަށެވެ.

އުއްތަމަ ފަނޑިޔާރު ވިދާޅުވީ، އެއްވެސް މީހެއްގެ ޙައްޤަކަށް އުނިކަން ނާންނާނެކަން ފަނޑިޔާރުން ކަށަވަރު ކުރަންޖެހޭ ކަމަށެވެ. އެގޮތުން ރާއްޖޭގެ ތާރީޚާއި ރާއްޖެ ކުރިއަރަމުންދާ ގޮތަށް ބަލާއިރު، ފަނޑިޔާރުން ވިސްނަވަންޖެހޭ ގިނަ ކަންކަން ހުންނަކަމަށް ވިދާޅުވިއެވެ.

ފަނޑިޔާރުންގެ މަސައްކަތަކީ ޤާނޫނުގެ ޙުކޫމާތް ނެގެހެއްޓުން ކަމަށްވެސް އުއްތަމަ ފަނޑިޔާރު ވިދާޅުވިއެވެ. އެގޮތުން އެ ކަމަކީ ވަރަށް ދުރު ވިސްނުން ގެންގުޅުއްވަން ޖެހޭ ކަމެއްކަން އެމަނިކުފާނުގެ ވާހަކަފުޅުގައި ފާހަގަ ކުރެއްވިއެވެ.

ތަހުޒީބު މުޖުތަމައެއް ބިނާ ކުރުމަށް އަލިއަޅުވާލައްވާ އުއްތަމަ ފަނޑިޔާރު އިތުރަށް ވިދާޅުވީ، ޤާނޫނުގެ ޙުކޫމާތް ނެގެހެއްޓުމަށް އެންމެ ފުރަތަމަ ކުރަންޖެހޭ ކަމަކީ ޤާނޫނުއަސާސީން ކަށަވަރު ކޮށްދީފައިވާ ޙައްޤުތައް މަދަރުސީ ދައުރުން ފެށިގެން ދަރިވަރުންނަށް ދަސްކޮށްދިނުން ކަމަށެވެ.

އޭގެ އިތުރުން، ބައިނަލްއަޤުވާމީ ޤާނޫނުވެސް ޤަބޫލުކުރާ އަދި އެ އުސޫލުތަކާއި ދުރަށް ނުދެވޭނެ ފަދަ އުސޫލުތައް ޤާނޫނީ ނިޒާމުތަކުގައި ހުންނަކަމަށް އުއްތަމަ ފަނޑިޔާރު ވިދާޅުވިއެވެ. އެގޮތުން ޤަތުލުއާންމު، އިންސާނީ ޙައްޤުތަކާއި ގުޅުންހުރި ކަންކަން މިސާލެއްގެ ގޮތުން އެމަނިކުފާނު ފާހަގަ ކުރެއްވިއެވެ.

އެގޮތުން ބަލާއިރު، ދިވެހިރާއްޖޭގައި އެއާއި ދުރަށް ނުދެވޭނެ އެއް ކަމަކީ އިސްލާމީ ޝަރީއާ ކަމަށް ވިދާޅުވިއެވެ. އެއީ މި ޤައުމުގައި ރައްޔިތުންގެ މެދުގައި ވެވިފައިވާ އިޖުތިމާއީ އަޤުުދުގެ ދަށުންވެސް އެންމެން ބަލައިގެންފައިވާ ކަމެއްކަމަށް އެމަނިކުފާނު ވިދާޅުވިއެވެ.

މި ހުރިހާ ކަންކަމަށް ފުންކޮށް ވިސްނެވުމަށް އެމަނިކުފާނު ވަނީ ފަނޑިޔާރުންނަށް ގޮވާލައްވާފައެވެ.

އޭގެ އިތުރުން، އިސްލާމީ ރިވެތި އަޙުލާޤު މުޖުތަމައުގެ ތެރޭގައި އަށަގެންނުވޭނެ ހުރިހާ ގޮތަކާއިމެދު ވިސްނަންޖެހޭކަން ފާހަގަ ކުރައްވައި އުއްތަމަފަނޑިޔާރު އިތުރަށް ވިދާޅުވީ، އެކަމަށްޓަަކައި ފަނޑިޔާރުންވެސް ދިރާސާތައް ހައްދަވަން ޖެހޭ ކަމަށެވެ.

މިނިވަން ފަނޑިޔާރުގެއެއް ކަށަވަރު ކުރުމުގައި ވިސްނަންޖެހޭނެ ކަންކަމަށްވެސް އެމަނިކުފާނުގެ ވާހަކަފުޅުގައި އަލިއަޅުވާލެއްވިއެވެ. އެގޮތުން ބައްލަވާ މައްސަލަތަކުގެ ވާޤިއާތަކާއި، ޤާނޫނުތަކަށް ބަލައި މައްސަލަތައް ނިންމަންޖެހޭކަން ފާހަގަ ކުރެއްވިއެވެ.

މުސްތަޤުބަލު ބިނާކުރަން ޖެހޭނީ މާޒީއާއި ޙާލުގެ މައްޗަށްކަން ފާހަގަ ކުރައްވައި އެމަނިކުފާނު އިތުރަށް ވިދާޅުވީ، އަދުލުވެރިވުމާއެކު، އިޚްސާންތެރިވެސް ވާން ޖެހޭނެ ކަމަށެވެ.