200 މީޓަރުގެ ޤައުމީ ރެކޯޑެއް ހިމްނާ މުގުރާލައިފި

އިސްލާމިކް ސޮލިޑާރިޓީ ގޭމްސްގެ އެތުލެޓިކްސް 200 މީޓަރު ދުވުމުގައި ދުވެ، ރާއްޖޭގެ ހިމްނާ ހަސަން ޤައުމީ ރެކޯޑެއް މުގުރާލައިފިއެެވެ.

ތުރުކީގެ ކޮންޏާގައި ބުދަ ދުވަހު ކުރިއަށް ދިޔަ 200 މީޓަރުގެ ދުވުމުގައި ހިމްނާ ވަނީ ދެ ވަނަ ހީޓުގައި ދުވެފައެވެ. ހިމްނާ ހީޓު ނިންމާފައިވަނީ 24.66 ސިކުންތުންނެވެ. ހިމްނާ ދިޔައީ ހީޓުގެ ފަސް ވަނަ އަށެވެ.

މީގެ ކުރިން އަންހެން 200 މީޓަރުގެ ރެކޯޑު އޮންނަނީ 2016 ވަނަ އަހަރު އޮލިމްޕިކްސް ގޭމްސްގައި ރެކޯޑު ހެދި އައިޝަތު އަފާގެ އަތުގައެވެ. އެ އަހަރު އަފާ ރޭސް ނިންމި ރެކޯޑަކީ 24.96 ސިކުންތެވެ. ހިމްނާގެ މި ކާމިޔާބާ ގުޅިގެން ރާއްޖޭގެ އެތުލެޓިކްސް އެސޯސިއޭޝަންގެ ރައީސް މުޙައްމަދު ތޮލާލް ވަނީ ހިމްނާ އަށް މަރުހަބާ ކިޔައިފައެވެ.

ހިމްނާ ވަނީ ދާދި ފަހުން ނިމުނު ކޮމަންވެކްތު ގޭމްްސްގައި ވެސް ޤައުމީ ރެކޯޑެއް މުގުރާލާފައެވެ. އެއީ 100 މީޓަރުގެ ދުވުމުގެ ރެކޯޑެވެ.

ބުދަ ދުވަހު ކުރިއަށް ދިޔަ 200 މީޓަރުގެ ދުވުމުގެ ފުރަތަމަ ހީޓުގައި ރިފާ މުޙައްމަދު ވަނީ ވާދަކޮށްފައެވެ. މި ހީޓުގައި ދުވެ ރިފާ ރޭސް ނިންމީ 26.09 ސިކުންތުންނެވެ. ޖުމުލަ އަށް ދުވުންތެރިން ދުވި މި ހީޓުގައި ރިފާ ދިޔައީ ހަ ވަނަ އަށެވެ.