އޭޝިއާ އެތުލެޓިކްސްގެ އެންމެ މަތީ އެވޯޑު ރާއްޖޭގެ ޠަލާލަށް

އޭޝިއަން އެތުލެޓިކްސް އިން ދެމުން އަންނަ އެންމެ މަތީ އެވޯޑު، އެތުލެޓިކްސް އެސޯސިއޭޝަން އޮފް މޯލްޑިވްސްގެ ކުރީގެ ރައީސް މުޙައްމަދު ޠަލާލް އަށް އަރުވައިފި އެވެ.

ޠަލާލް އަށް މި އެވޯޑު އަރުވާފައި ވަނީ ދެކުނު ކޮރެއާގައި ކުރިއަށް ދިޔަ އޭޝިއަން އެތުލެޓިކްސްގެ ކޮންގްރެސްގަ އެވެ. އެ ކޮންގްރެސްގައި ޠަލާލް އަށް އެވޯޑު އަރުވާފައި ވަނީ އެ ޖަމިއްޔާގެ ރައީސް ދަޙްލާން އަލް ޙަމަދު އެވެ.

ލީޑަޝިޕް އެވޯޑުގެ ނަމުގައި ދެމުން އަންނަ މި އެވޯޑަކީ އޭޝިއަން އެތުލެޓިކްސް އިން ދެމުން އަންނަ އެންމެ މަތީ އެވޯޑެވެ. މި އެވޯޑު ދެމުން އަންނަނީ ޤައުމުތަކުގެ އެތުލެޓިކްސް އެސޯސިއޭޝަންގެ ރައީސް އަދި ޖެނެރަލް ސެކްރެޓަރީގެ މަގާމުގައި ތިއްބަވާ ފަރާތްތަކެވެ.

އެހެން ނަމަވެސް، މިއީ އޭޝިއަން އެތުލެޓިކްސް އިން، އެތުލެޓިކްސް އެސޯސިއޭޝަނެއްގެ ކުރީގެ ރައީސަކަށް މި އެވޯޑު އެރުވި ފުރަތަމަ ފަހަރެވެ. ކޮންގްރެސްގައި ވަނީ ޠަލާލްގެ އިތުރުން، ކުރީގެ އެހެން ރައީސަކަށް ވެސް މި އެވޯޑު އަރުވައިފަ އެވެ.

ޠަލާލް ވަނީ 2012 ވަނަ އަހަރުން ފެށިގެން 2023 ވަނަ އަހަރުގެ ނޮވެމްބަރު މަހާ ހަމަ އަށް އެތުލެޓިކްސް އެސޯސިއޭޝަންގެ ރައީސްކަން ކުރައްވާފައި އެވެ. އެ މަގާމުން އިސްތިއުފާ ދެއްވިއިރު، ޠަލާލް ގެންދެވީ ރައީސް ކަމުގެ ތިން ވަނަ ދައުރު ފުރިހަމަ ކުރައްވަމުންނެވެ.

އެތުލެޓިކްސް އެސޯސިއޭޝަންގެ ރައީސްކަމުގެ މަޤާމުން ޠަލާލް އިސްތިއުފާ ދެއްވާފައި ވަނީ، ކޮމިޝަނަރ އޮފް ސްޕޯޓްސްގެ މަޤާމަށް ވަޑައިގެންނެވުމަަަށެވެ. އެ މަޤާމަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު، ޠަލާލް އައްޔަން ކުރެއްވީ 2023 ވަނަ އަހަރުގެ ނޮވެމްބަރު މަހުގެ 21 ވަނަ ދުވަހު އެވެ.

އެތުލެޓިކްސް އެސޯސިއޭޝަންގެ ރައީސްކަމުގައި ހުންނަވައި، ޠަލާލް ވަނީ މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ ނައިބު ރައީސްކަމުގެ މަޤާމު ވެސް އަދާ ކުރައްވާފައި އެވެ. އެއީ 2021 ވަނަ އަހަރު އޮތް އެމްއޯސީގެ އިންތިޚާބުގައި ވާދަ ކުރައްވައިގެންނެވެ.

ޠަލާލްގެ ރައީސްކަމުގައި އެތުލެޓިކްސް އެސޯސިއޭޝަން އިން ވަނީ ގިނަ ކާމިޔާބީތަކެއް ހޯދައިފަ އެވެ. ޚާއްސަކޮށް ބައިނަލްއަޤުވާމީ މުބާރާތްތަކުގައި ރާއްޖެ އިން ވަނީ އެތުލެޓިކްސް އިން ރަނގަޅު ކާމިޔާބީތަކެއް ހޯދައިފަ އެވެ.