ހޫނުގަދަ ވާނެކަމަށް ލަފާކޮށް އިންގްލަންޑް އަދި ވޭލްސްއަށް އެމްބަރ އެލަރޓް ނެރެފި

އިނގިރޭސި ވިލާތުގެ މޫސުމާބެހޭ އިދާރާއިން އިންގްލަންޑް އަދި ވޭލްސްގެ ބައެއް ހިސާބުތަކަށް ކުރިޔަށް އޮތް ދުވަސްތަކުގައި ވަރަށް ބޮޑަށް ހޫނުގަދަ ވާނެ ކަމަށް ލަފާކޮށް "އެމްބަރ އެލަރޓް" ނެރެފިއެވެ. އެންމެ ހޫނުގަދަވާނެ ކަމަށްބަލާ ނެރެނީ ރަތް އެލަރޓް ކަމަށްވާއިރު އެމްބަރ އެލަރޓްއަކީ ދެވަނަޔަށް އެންމެ ސީރިއަސް އެލަރޓްއެވެ.

މީގެ ދުވަސް ކޮޅެއް ކުރިންވެސް އާދަޔާ ޚިލާފަށް ހޫނު ގަދަވުމުގެ ސަބަބުން އިނގިރޭސި ވިލާތުގެ ބައެއްހިސާބުތަކުގެ ގަސްކަރައިގައި ރޯވެ ބައެއް މަގުތަކުން ވެހިކަލް ނުދުއްވޭވަރަށް ގޮސްފައިވެއެވެ.

އެގައުމުގެ މޫސުމާބެހޭ އިދާރާއިން އަންގާރަ ދުވަހު އިއުލާނުކޮށްފައިވާ ގޮތުގައި އެމްބަރ އެލަރޓް ހިންގަން ފަށާނީ ބުރާސްފަތި ދުވަހުން ފެށިގެން އާދީއްތަ ދުވަހަށެވެ. އަދި ގަދަ ހޫނު ތަހައްމަލް ނުކުރެވޭ މީހުން މި ދުވަސްތަކުގައި މިކަމަށް ސަމާލު ވުމަށާއި ނޫންނަމަ ސިއްހަތަށް ނޭދެވޭ އަސަރު ކުރާނެ ކަމަށް އެޤައުމުގެ މެޓް އޮފީހުން ބުނެފައިވެއެވެ.

އިންގްލަންޑް އަދި ވޭލްސްގައި އާންމުކޮން އެންމެ ހޫނު މިން މައްޗަށް ދަނީ 21 ޑިގްރީ ސެލްސިއަސް އަށް ކަމަށްވާއިރު އެމްބަރ އެލަރޓް ނެރުނު ސަރަހައްދުތަކުގައި ހުކުރު ހޮނިހިރު ދެދުވަހު ހޫނުމިން 36 ޑިގްރީ އަށް އަރާނެ ކަމަށް ވަނީ ލަފާކޮށްފައެވެ.

މީގެ ދުވަސްކޮޅެއް ކުރިން އިންގްލަންޑްއަށް ވަނީ 1935 ގެ ފަހުން އައި އެންމެ ހޫނުގަދަ ދުވަސްތައް ތަޖްރިބާ ކުރަން ޖެހިފައެވެ. ހޫނު ގަދަވުމުގެ ސަބަބުން ކަރަންޓް ކަނޑާލަން ޖެހި ބައެއް އެއާޕޯޓްތަކުގެ ރަންވޭގެ ޓާމެކް އަދި ރޭލު ޓްރެކްތައް ވިރުން ފަދަ ކަންކަން ކުރިމަތިވެފައި ވެއެވެ.

ވާރޭވެހުންދުރުވެ ކޯރުތަކުގެ ފެންގަނޑު ހިންދެމުން ދާތީ ބްރިޓްންގެ އެންމެ ބޮޑު ފެންކުންފުނި ތޭމްސް ވޯޓަރ އިން ދަނީ ފެން ބޭނުން ކުރުމަށް ހުދޫދެއް ކަނޑައަޅަންވެސް ތައްޔާރުވަމުންނެވެ.

ޔޫރަޕްގެ އެހެން ބައެއް ގައުމުތަކަށް ވެސް ޖުލައި މަހު ވަރަށް ވެސް ހޫނު ގަދަވެގެން ގޮސްފައިވާއިރު ބައެއް ހިސާބުތަކުގައި ހޫނުމިން 40 ޑިގްރީ ސެލްސިއަށް އަށް ވެސް އަރާފައިވެއެވެ. މިއީ ޔޫރަޕްގެ ގައުމެއްގައި ދުވަހަކުވެސް ހޫނުމިން މައްޗަށް ދާވަރެއް ނޫނެވެ.